Read Chiquitano JUAN 10 Bible Online

JUAN 10 - Chiquitano bible

JUAN 10

¹Auki nanti Jesús: “Axaño tusiu aume axɨbamantai makusɨpɨka ichepe mayatabayoka tobɨsoma onɨki korax nauki ayepo uimia.

²Tapɨti naki asaratitɨ yutaku nobixhaka, sɨrotitɨpo auki tyurux.

³Axti naki asaratitɨ tyaku tyurux iyaɨbutati nauki aɨrotitɨpo naki asaratitɨ yutaku, auki babikoti yubapa taikiana taman isiuki nobɨrixh, tyoneio yusuputakai nuraxti. Auki sɨrotitɨ tyɨrɨpo yupu,

⁴axtɨ tomenotɨ tyɨrɨpo nanaiña, sɨrotitɨ kusɨrɨboti yupu. Axɨmanio nobixhaka omenotɨ isiuti ityopiki yusuputakai nuraxti.

⁵Tapɨti kiatax, chomenopɨtɨ isiuti, bopesɨburu ñɨnanati, ityopiki chiyusuputakaipɨ nuraxti.

⁶Iñatati Jesús ɨmoma axɨna machepekatax, tapɨ axɨma chiyebopɨ uimia axɨna xhanxti nanti ɨmoma.

⁷Auki nanti tatityo ɨmoma: “Axɨna sukanañɨ aume: Axɨñɨ tyuruxɨñɨ ñome nobixhaka.

⁸Namanaiña axɨbama kusɨrɨboma tɨkañe xhopɨnanakiñɨ, tyonema axɨbama makusɨpɨka mayatabayokaityo. Tapɨ axɨba nobixhaka chopikokotapɨ nuraxɨma.

⁹Axɨñɨ tyuruxɨñɨ ɨmo napes: axɨna nobixhax sɨrotɨpo auki axɨna tyurux, moximiakana tato nomɨnantɨ uixh. Sɨrotɨpo, sɨrotɨ tatityo tyɨrɨpo, taikiana atabɨ uixh utuburiboti.

¹⁰Axti kusɨpɨx kuatatiatai akusɨpɨti, atabaiti nauki aiñamesokoti nanaiña. Tapɨ axɨñɨ isekatɨ nauki ane kɨtɨpɨx ausɨborikibo sobi.

¹¹Axɨñɨ ipiaka nuxia yasaratɨ yutaku nobixhaka. Axti naki ipiaka asaratitɨ yutaku nobixhaka ityoximiatati nisɨborikixhti yutaku.

¹²Tapɨti naki asaratitɨ yutaku nobixhaka ityobo monixh, axtɨ asaratitɨ kɨmenu nuitɨmɨx besɨburuti. Omonkono nobixhaka uiti, ityopiki chityonentipɨ naki ipiakati asaratitɨ yutaku tyopiki chɨtɨpɨ niyabuxti. Auki axɨmanu nuitɨmɨx batabaiyo nobixhaka tapɨ pikiataka omiñaxio.

¹³Axti maniki ñoñɨnx besɨburuti ityopiki axɨna iyoche uiti ta axɨmanuantai bapakatar ɨmoti, tapɨ nobixhaka champɨ nɨmoche uiti.

¹⁴Axɨñɨ ipiaka nuxia yasaratɨ yutaku nobixhaka. Sane takanati Iyaɨ isuputaratiñɨ axɨñɨntyo isuputakati, saneityo axɨñɨ isuputakio niyabu nobixhaka tapɨ axio opisuputarañɨntyo.

¹⁵“Sane takanati Tupax axti naki Iyaɨ isuputaratiñɨ, axɨñɨntyo isuputakati. Saneityo axɨñɨ isuputakama axɨbama sɨromatɨ isiuñɨ axɨmaintyo isuputaramañɨ. Axɨñɨ ityoximiata nisɨboriki yutaku niyabu nobixhaka.

¹⁶Abetyo pikiataka niyabu nobixhaka axɨba chɨtɨpɨ auki axɨna korax. Axɨmanio kuantionki sobi tauna omonkoityo ñana nisura, sane ñana chepe nubakax, tamantiatai naki asarabotɨ yutaku.

¹⁷Isuasɨrɨka ɨmoti Iyaɨ, ityopiki ityoximiata nisɨboriki nauki yasuriu tatityo.

¹⁸Champɨti naki ikiaɨbutati nisɨboriki, axɨñɨ ityoximiata ui niñoñemantoe. Ane nisɨriaka nauki ityoximia nisɨboriki, anentyo nisɨriaka nauki yasuriu tatityo, tyone axɨna yakɨpukuxti Iyaɨ nauki isamune.

¹⁹Chichepepɨ tatityo ñakionkoxɨma axɨmanuma judíos, oboi axɨba sane nuraxti.

²⁰Sɨrɨmanama axɨbama namatɨ: — ¿Kausane abasikia amonsaperio nuraxti?

²¹Tapɨ makiataka namatɨ: — Champɨti naki anati chobores kɨtɨpɨti manityanati sane. Champɨtityo chobores asaratitɨ tato uiti axti naki supusu.

²²Au axɨmanio naneneka tɨkañe xhimianene, axti Jesús yebotitɨ au Jerusalén ɨmo axɨmanu pukɨnunkux nesa nipo meankax.

²³Anankati Jesús au nipo meankax, amenkoti saimia axɨmanu tyurux nɨrixh Salomón.

²⁴Auki axɨmanuma judíos pesuarama tyupekuti ñankitioma pɨnanakiti: — ¿Auchepɨ ñana uraboi suisukarɨ? Axtɨ ñemanauntu axɨkɨ tyonenti Mesías, urasoi nuxia kaɨma suisukarɨ.

²⁵Aiñumuti Jesús nuraxɨma: — Chauki tɨsukanañɨ aume, axaño chapikokotapɨ nisura. Axɨba isamukio omixhante sobi ui yakɨpukuxti Iyaɨ, oboi atusi nuxia isane niyaka.

²⁶Tapɨ axaño chapikokotapɨ, ityopiki chabekapɨtɨ isiuñɨ chapikokotapityo nisura.

²⁷Axɨbama aboma isiuñɨ isuputaramañɨ, axɨñɨntyo isuputakama. Axɨma takana nobixhaka opisuputakai nuraxti naki asaratɨ yutaku, axtityo isuputariontiño. Axɨbama aboma isiuñɨ ikokotama nisura,

²⁸sobi sɨborikoma ɨmo nanaiña naskɨbeka, chɨkoiñopɨma ñana champɨtityo uiche aikiaɨbuti xhopɨnanakiñɨ.

²⁹Axɨna toxio iñemo uiti Iyaɨ taruku niyarusɨrɨkɨx pɨnanaki namanaiña, champɨti naki ikiaɨbutati pɨnanakiti.

³⁰Axɨñɨ ichepeti Iyaɨ kunauntañantai subaka.

³¹Axɨmanuma judíos makanama tatityo kanka uiche arurumati.

³²Tapɨti Jesús nanti ɨmoma: — Sɨrɨmana axɨba champɨ tamastai omixhiante sobi au nɨrixhti Iyaɨ ausukarɨ. ¿Ñakusane axɨna tyakuche auxianka apityabairoñɨ?

³³Axɨmanuma judíos aiñumuma: — Chisuixhankapɨ suparurɨ oboi kanka ityaku axɨna uxia aisamute, ta ityaku axɨna chuxiampɨ nura kɨtɨpɨti Tupax. Axɨkɨ takana axɨsomɨantai mañoñɨnka, tapɨ axɨkɨ ukanɨ takanati Tupax naka.

³⁴Nanti Jesús ɨmoma: — Ane Korobo iku bakɨpukux uiti Moisés aboi: ‘Sukanañɨ axaño Tupax año.’

³⁵Tusiu oemo axɨna nantɨ iku Nikorox, ñemanauntu axɨna nantɨ. Axti Tupax nɨrixhimia uiti axɨbama ɨmoche akɨputi tɨkañe ayematɨ uraboimia nuraxti.

³⁶Axtɨ uiti Tupax aikɨpurutiñɨ iku axɨna kɨx, ¿kausane amukanaño chuxiampɨ nisura kɨtɨpɨti Tupax ui axɨna sukanañɨ axɨñɨ Aɨtoxti?

³⁷Axtɨ chisamutempɨ axɨna uxia ɨmoti Iyaɨ, tapɨ apikokokañɨ.

³⁸Tapɨ axtɨ isamute axɨna yakɨpukuxti, apikokosio axɨmanio omixhante sobi, nauki atusi aume axti Iyaɨ anati chepeñɨ.

³⁹Auki xhanxɨma aiñenomati tatityo, tapɨti matanekanati ñɨnanama.

⁴⁰Basɨkɨbɨkoti tato Jesús tyopɨ axɨmanu nusɨrux Jordán, sɨsioti akamanu kauta anankati tɨkañe Kuan Bautixhta maunimianati.

⁴¹Sɨrɨmanama yebomatɨ asaramati, namatɨ: — Axti Kuan tɨkañe chɨmasamunutipɨ axɨba champɨ tu bastai, nanaiña axɨna nanti tɨkañe kɨtɨpɨti naki ñoñɨnx ta ñemanauntu.

⁴²Sɨrɨmanama axɨpekukimia axɨmanuma po'osoma akamanu ikokoromati Jesús.