Read Chiquitano JUAN 13 Bible Online

JUAN 13 - Chiquitano bible

JUAN 13

¹Kɨmenu nuxia axɨmanu pukɨnunkux Paxkua, tapɨti Jesús tɨtusiu ɨmoti tɨsaimia axɨmanu mapakɨmunkutux ɨmoti aiñokoti axɨna kɨx nauki aɨrotitɨ tato esati Yaɨtoti. Taikiana taruku nikuasɨrɨkɨxɨma ɨmoti axɨbama aboma iku axɨna kɨx, sane nikuasɨrɨkɨxɨma ɨmoti ichepe nityakɨrux.

²Axti chobores chauki tɨsɨro uiti nomɨnantɨ au nausasɨxti Judas aɨtoxti Simón Iscariote, nauki aityoximianati Jesús. Axti Jesús tusiu ɨmoti ta esakiti Tupax ayetitɨ, auki sɨrotitɨ tatityo ñana esati Tupax, uiti Yaɨtoti toxio ɨmoti nanaiña ɨriakaboti.

⁴Naukiche amonkoma basoma, atɨraiti Jesús ikiaɨbutati nikɨbuxixhti tomoeno uiti taman xɨrɨpɨtɨx tyupekuti.

⁵Auki araparati uiti tux au taman kuxabixh ubaxɨbio uiti nipopesɨma axɨmanuma nesaxti apóstoles auki iñuɨmamakati ui axɨmanu xɨrɨpɨtɨx tomoeno tyupekuti.

⁶Naukiche iñataiti esati Peru, nanti ɨmoti Jesús: — Axɨkɨ Yɨriabux, ¿kausane aiyaxɨbirio nipope?

⁷Aiñumuti Jesús nuraxti: — Kaɨma chɨtusiupɨ aemo axɨna isamute, taunainki tusiu aemo.

⁸Nanti Peru ɨmoti: — ¡Axɨñɨ chichebopɨ sobi nauki aiyaxɨbirio nipope! Aiñumuti Jesús nuraxti: — Axtɨ chubaxɨbiopɨ sobi napope, chɨkoñopɨtɨ aemo aɨrotɨ isiuñɨ.

⁹Nanti Simón Peru ɨmoti: — ¡Axɨkɨ Yɨriabux, axtɨ sane, tapɨ aiyaxɨbikio nipopeatai, aiyaxɨbityo nichanu yochepe niñee!

¹⁰Nanti Jesús ɨmoti: — Axti naki aɨbo atopiti, champɨ nɨmoche atopiti tatityo, nipopestiatai ubaxɨbio. Axaño uxia naukɨtɨpɨ, champɨityo axtɨ namanaiña.

¹¹Tɨtusiu ɨmoti Jesús ñakuti uiche ñana aityoximianati, sane naukiche nanti “chɨnamanañampɨ uxia naukɨtɨpɨ”.

¹²Naukiche tubaxɨbio uiti nipopesɨma, iñatati tatityo Jesús nikɨbuxixhti kɨtɨpɨti auki tɨmonsoti tatityo nanti ɨmoma: — ¿Tusiu aume axɨna isamute sane?

¹³Axaño amukanaño iñemo Maestro Yɨriabux, uxia axɨna sane nabura, ityopiki ñemanuntu axɨna sane.

¹⁴Axtɨ axɨñɨ Yɨriabuxɨñɨ xhanunekakaityo aume, ubaxɨbio sobi naupope, saneityo aboi apiyaxɨbisio naupope aumeampatoe.

¹⁵Sobi ityusianka ausukarɨ, axaño apisamuse sane takana axɨna isamute aume.

¹⁶Axaño tusiu aume champɨti kumanakax taruku nɨriakaxti pɨnanakiti naki ɨmoche aserebiti, champɨtityo naki ane bakɨpukux ɨmoti taruku nɨriakaxti pɨnanakiti naki uiche aikɨpuruti.

¹⁷Axtɨ iyebo aboi axɨba nixhanunekaka apiñataityo nausɨboriki isiuki, tyone ñana axɨna aupukɨnunkubu.

¹⁸“Chixhanityakapɨ ɨmo namanaiña axaño. Tusiu iñemo ñakusanema axɨbama samamekanama sobi. Axɨna nantɨ iku Nikorox ta omixhankio ñana: ‘Axti naki basoti ichepeñɨ, chuxiampɨ uiti iñemo.’

¹⁹Surapoikai ausukarɨ nanaiña axɨna sane, axtɨ omixhankio taunainki, apikoko ta Axɨñɨ.

²⁰Ñemanauntu sukanañɨ aume axti naki yasuriuruti naki ɨmoche xhakɨpuka, iñemo yasuriurutiñɨ. Axti naki yasuriurutiñɨ, yasuriurutityo naki uiche aikɨpuruñɨ.”

²¹Naukiche tɨnanti nanaiña axɨna sane, onkisioti Jesús nisuchekixhti, auki nantityo: — Ñemanauntu sukanañɨ aume tamanti abaxɨpekuki uiti ñana aityoximianatiñɨ.

²²Auki axɨmanuma nesaxti apóstoles asaramatɨ ɨmomantoe, chɨtusiupɨ ɨmoma ñakuti ɨmoche axɨmanu sane nuraxti.

²³Tamanti axɨpekukimia, axti naki taruku nikuasɨrɨkɨxti ɨmoti Jesús, anankati tɨmonsoti petakuti, naukiche amonkoma basoma,

²⁴axti Simón Peru nanti ɨmoti ui ne'esti nauki ankirioti pɨnanakiti Jesús, ñakuti maniki ɨmoche sane nuraxti.

²⁵Auki sɨrotitɨ saimia ɨmoti Jesús, ankirioti pɨnanakiti: — Yɨriabux, ¿ñakuti maniki?

²⁶Aiñumuti Jesús nuraxti: — Axtɨ pankana sobi pan, axti maniki ɨmoche ityoximia, tyonenti. Auki aipiankati axɨmanu pan aityoximiati ɨmoti Judas, aɨtoxti Simón Iscariote.

²⁷Isiukai, sɨroti chobores au nausasɨxti Judas. Nanti Jesús ɨmoti: — Judas aisamusenkai axɨmanu naxiantɨmo aisamune.

²⁸Champɨti axɨpekukimia axɨmanuma amonkoma akamanu basoma tusiu ɨmoti kausane sane nuraxti Jesús ɨmoti.

²⁹Tyopiki axti Judas tyonenti iñaɨbutati nimonixhimia, aboma axɨbama kuatɨ au ñakionkoxɨma bakɨpuruti Jesús ɨmoti apacheti axɨna nixhantɨmoma ɨmo axɨmanu pukɨnunkux Paxkua, o acheti monixh ɨmo axɨbama taruku nityakisɨrɨkɨxɨma.

³⁰Naukiche tɨtoxio pan ɨmoti Judas, atɨraiti sɨrotitɨ tyɨrɨpo. Chauki tɨtobikia.

³¹Naukiche tɨsɨrotitɨ Judas, nanti Jesús ɨmo axɨmanuma makiataka nesaxti apóstoles: — Kaɨma namanaiña astaimia niyarusɨrɨkɨ nisɨriakaxti naki Aɨtoxti ñoñɨnx. Sobityo ityusianka niyarusɨkɨ nɨriakaxti Tupax.

³²Axtɨ axɨñɨ sobi ityusianka niyarusɨrɨkɨ nɨriakaxti Tupax, axtityo Tupax ityusiankatati axɨna niyarusɨrɨkɨ nisɨriaka. Axti Tupax konto isamutenti axɨna sane.

³³Taruku naukuasɨrɨkɨ iñemo machurapataiki, chauki tɨsaimia mapakɨmunkutux iñemo chiyasikiaikipɨ auchepe. Axtɨ apapacheka iyoñɨ chichabɨkapɨ aboi, sukanañɨ aume takana nisura ɨmoma axɨbama ɨriatu axɨbama judíos: Chiyebopɨ aboi kauta niyɨkɨ.

³⁴“Toxio sobi aume axɨna aɨbo bakɨpukux: Aukuasɨrɨ aumeampatoe. Sane takana naukuasɨrɨkɨ iñemo.”

³⁵Axtɨ aukuasɨrɨka aumeampatoe, sane tusiu ɨmo makiataka ta axaño amonkaño isiuñɨ.

³⁶Ñankitioti Simón Peru pɨnanakiti Jesús: — Axɨkɨ Yɨriabux, ¿kauta naɨkɨ? Aiñumuti Jesús nuraxti: — Chaɨkapɨtɨ kaɨma isiuñɨ. Taunainki aɨkatɨ.

³⁷Axti Peru yachɨroti tatityo: — Axɨkɨ Yɨriabux, ¿kausane chiyɨkapɨtɨ tanu asiukɨ kaɨma? — ¡Axɨñɨ toxio sobi nisɨboriki atakukɨ!

³⁸Aiñumuti Jesús nuraxti. — ¿Ñemanauntu aityoximiata nasɨboriki ichopikiñɨ? Ñemanauntu sukanañɨ aemo kɨmenu nipuku po'ox trex urapakai chasuputakapɨñɨ.