Read Chiquitano JUAN 18 Bible Online

JUAN 18 - Chiquitano bible

JUAN 18

¹Naukiche tɨchauki neankaxti, sɨrotitɨ Jesús aɨbu axɨmanuma nesaxti apóstoles tyopɨ axɨmanu nusɨrux Cedrón. Akamanu ananka taman ñanaunx, kauta sɨrotitɨ Jesús aɨbuma axɨmanuma amonkoma isiuti.

²Axti Judas, naki xhanxti aityoximianati, isuputakaitityo axɨmanu kauta niyɨkɨxɨma, tyopiki nantaxtai oberabarama akamanu uiti Jesús axɨbama nesaxti apóstoles.

³Sane naukiche iñataiti Judas akamanu aɨbu masortaboka chepetyo axɨmanuma asaramatɨ tyaku nipo meankax yakɨpuku axɨmanuma ɨriatu axɨbama sacerdotes ichepe axɨbama fariseos. Amonkoma yupu nikomesɨma abetyo uimia basaruka.

⁴Tɨtusiu ɨmoti Jesús axɨna ɨmoche ayematɨ, sɨrotitɨ kɨmenuma ankirioti pɨnanakimia: — ¿Ñakuti naki iyoche napapacheki?

⁵Axɨma aiñumuma nuraxti: — Iyoti Jesús auki Nazaret. Aiñumuti Jesús: — Unka axɨñɨ. Axti Judas, naki uiche aityoximianati, anankati akamanu chepema.

⁶Naukiche nanti Jesús ɨmoma “Unka axɨñɨ”, bataruruma tato chakuma taɨbɨkoma akɨ ui nichakuxɨma.

⁷Auki ñankitioti tatityo Jesús pɨnanakimia: — ¿Ñakuti iyoche napapacheki? Axɨma namatɨ tatityo: — Iyoti Jesús auki Nazaret.

⁸Nanti Jesús tatityo ɨmoma: — Chauki tɨsukanañɨ aume unka axɨñɨ. Axtɨ iyoñɨ napapacheki, axɨbama makiataka asioma sane aboi tari yɨrakamatɨ tato.

⁹Axɨna sane uxiante nauki atusianka axɨmanu nanti Jesús: “Iyaɨ champɨti ensoro axɨpekukimia axɨbama toxioma obi iñemo.”

¹⁰Auki axti Simón Peru, ananka uiti nikɨsesti, aikiaɨbuti aiyokiti nepanaunku numasuxti maniki nɨrixhti Malco, nikumanakataxti ɨriatu axɨbama sacerdotes.

¹¹Tapɨti Jesús nanti ɨmoti Peru: — Aiñaɨbu tato nakɨse. Axtɨ axti Iyaɨ ikɨpurutiñɨ nauki ichakisɨrɨ, ¿nakionko chiyasutiupɨ nichakisɨrɨkɨ?

¹²Axɨmanuma masortaboka ichepeti ɨriatuxɨma ichepetyo axɨmanuma judíos asaramatɨ tyaku nipo meankax, iñenomati Jesús auki tomoenoti uimia.

¹³Auki kusɨrɨbo aɨromatɨ aɨbuti au nipoxti Anás, ityopiki tyonenti yaɨstoti Caifás, ɨriatu axɨbama sacerdotes au axɨmanio nasɨkɨbeka.

¹⁴Axti naki Caifás tyonenti maniki nanti tɨkañe ɨmo axɨbama judíos, uxia axtɨ koiñoti taman ñoñɨnx tyaku namanaiña.

¹⁵Axti Simón Peru ichepeti kiatax sɨromatɨ isiuti Jesús. Axti maniki kiatax isuputarati nuxia maniki ɨriatu axɨbama sacerdotes, sane naukiche sɨrotitɨpo ichepeti Jesús au nipoxti Anás.

¹⁶Naukiche astaiti onkonoti Peru tyɨrɨpo, sɨrotitɨ anityati aɨbu axɨmanu kupikixh asaratɨ tyaku tyurux, nauki chebo uixh aɨrotitɨpo.

¹⁷Tyone ñankitio pɨnanakiti Peru: — ¿Kanapaemo axɨkɨ anankɨtyo isu axɨmanu noñɨnx? — Aiñumuti Peru nurax — chaxɨpɨñɨ

¹⁸Axɨmanu tobixh ximianene, axɨmanuma kumanakaka ichepe axɨmanuma asaramatɨ tyaku nipo meankax, maunximianama pes uiche apee ɨmoma. Anankatityo Peru akamanu ichepema baperoti.

¹⁹Axti maniki ɨriatu axɨbama sacerdotes ñankitioti pɨnanakiti Jesús, kɨtɨpɨ axɨbama nesaxti apóstoles axɨnaintyo ñanunekakaxti.

²⁰Nanti Jesús ɨmoti: — Axɨñɨ xhanityaka sukarɨ namanaiña. Nantax xhanunekaka ubau sinagoga autyo nipo meankax, chiñanekatapɨ nixhanunekaka.

²¹¿Kausane asikia ankirio xhopɨnanakiñɨ? Ankisio pɨnanakimia axɨbama onkoimia nisura, tari uimia uraboimia isane surapoi sukarɨma. Axɨma tusiu ɨmoma axɨna surapoi sukarɨma.

²²Naukiche nanti Jesús axɨna sane, tamanti maniki asaratɨ tyaku nipo meankax ompeborioti uiti: — ¿Sane aiñumuta nuraxti naki ɨriatu axɨbama sacerdotes?

²³Aiñumuti Jesús nuraxti: — Axtɨ sukanañɨ axɨna chuxiampɨ, ukanɨ iñemo isane axɨna chuxiampɨ nisura. Tapɨ axtɨ uxia nisura ¿kausane okɨsi iñemo?

²⁴Auki axti Anás bakɨpuruti aɨbuti Jesús, tomoenoti esati Caifás, ɨriatu axɨbama sacerdotes.

²⁵Tapɨti Peru, anankatiki akamanu, baperoti pes. Ñankitioma pɨnanakiti: — ¿Kanapaemo axɨkɨtyo anankɨ isiuti maniki noñɨnx? Tapɨti Peru nanti ta chisuputaratipɨ, nanti sane: — Chaxɨpɨñɨ.

²⁶Anankati akamanu maniki taman nikumanakataxti ɨriatu axɨbama sacerdotes, yarukityoboti maniki okio numasuxti uiti Peru, nanti ɨmoti Peru: — Yasakɨ ichepeti maniki ñoñɨnx kauta aiñenomati.

²⁷Auki nanti tatityo Peru ta chisuputaratipɨ, isiukai puru taman po'ox.

²⁸Tansɨrapae, sɨromatɨ aɨbuti Jesús auki nipoxti Caifás au nipo nɨriakaxti maniki yɨriabux auki Roma. Axɨmanuma judíos chɨsɨromapɨtɨpo ityopiki axɨmanu bakɨpukux uiti Moisés chichebopɨ uixh aɨromatɨpo au nipoxti naki auki kiatax kɨx kɨmenu axɨmanu pukɨnunkux Paxkua.

²⁹Sane naukiche sɨrotitɨ Pilato tyɨrɨpo ankirioti pɨnanakimia: — ¿Isane ityopikiche aburaboti naki ñoñɨnx?

³⁰Axɨma aiñumuma: — Axtɨ chɨtɨpɨ naki yatabayox chisopikiakatipɨ tauna aesakɨ.

³¹Nanti Pilato ɨmoma: — Amekosi aɨbuti apisamuse ɨmoti isiuki axɨmanu bakɨpukux uiti Moisés aume. Axɨmanuma ɨriatu axɨbama judíos aiñumuma: — Axɨsomɨ champɨ sobɨriaka nauki sopityabairoti taman ñoñɨnx.

³²Sane uxiante axɨmanu nanti Jesús kausane ñana nikonkoxti.

³³Auki sɨrotitɨpo tatityo Pilato, aityasuruti Jesús nauki ankirioti pɨnanakiti: — ¿Axɨkɨ tyonenkɨ ɨriatu axɨbama judíos?

³⁴Nanti Jesús ɨmoti: — ¿Ankitio axɨna sane xhopɨnanakiñɨ auki noñemantoe, o tyopiki makiataka urapoimia asukarɨkɨ?

³⁵Aiñumuti Pilato nuraxti: — ¿Asakatɨ iñemo takana axɨbama judíos niyaka? Axɨbama po'osoma auki axɨna nakɨ ichepe axɨbamaintyo ɨriatu axɨbama sacerdotes uimia aityoximianamakɨ iñemo. ¿Isane axɨna naipɨnate?

³⁶Aiñumuti Jesús nuraxti: — Nisɨriaka chɨtɨpɨ ikuki axɨna kɨx. Axtɨ sanempɨ, axɨbama aboma isiuñɨ okɨmanapɨma chakuñɨ, tapɨ ityoximianamañɨ mekuma axɨbama judíos. Axɨna nisɨriaka chityonempɨ ikuki axɨna kɨx.

³⁷Auki ñankitioti tatityo Pilato pɨnanakiti: — ¿Sane, axɨkɨ yɨriabuxɨkɨ? Aiñumuti Jesús nuraxti: — Sane, obi uraboi axɨñɨ yɨriabuxɨñɨ. Axɨñɨ isekatɨ iku axɨna kɨx nauki suraboi axɨna ñemanauntu. Namanaiña axɨbama isuputakaimia axɨna ñemanauntu ta onkoimiaintyo nisura.

³⁸Nanti Pilato ɨmoti: — ¿Isane axɨmanu ñemanauntu? Naukiche tɨnanti axɨna sane, sɨrotitɨ tatityo Pilato tyɨrɨpo kauta amonkoma axɨmanuma judíos, nanti ɨmoma: — Axɨñɨ champɨ tabɨko sobi nipɨnatenti naki ñoñɨnx.

³⁹Axaño napacheata, nauki iñemekanati aume tamanti naki amanatipo ɨmo axɨna pukɨnunkux Paxkua: ¿Auxianka iñemekanati naki ɨriatu axɨbama judíos?

⁴⁰Auki namanaiña tosibikoma tatityo: — ¡Axti maniki tapɨ aiñemekakati! ¡Aiñemekasaxti Barrabás! Axti Barrabás tyonenti maniki yatabayoxti.