Read Chiquitano JUAN 20 Bible Online

JUAN 20 - Chiquitano bible

JUAN 20

¹Au axɨmanu tɨkañe nanenes tominko tansɨrapae tomikianenenki, Mariax Magdalena yebotɨ asarai nikɨxti Jesús. Naukiche tɨtane saimia astai axɨmanu kanx nityabuxi nikɨxti kaɨburu.

²Auki sɨrotɨ tato yarukux esati Simón Peru axtityo maniki kiatax anankati isiuti axti naki taruku nikuasɨrɨkɨxti ɨmoti, nantɨ ɨmoma: — ¡Sɨrotɨ oboi nikɨtɨpɨ Nɨriabux auki nikɨx, chɨtusiupɨ suiñemo kauta apiña!

³Auki axti Peru ichepeti maniki kiatax nesaxti apótol sɨromatɨ kauta naka nikɨxti.

⁴Axɨmanuma tox sɨromatɨ chepema yarukuxɨma. Axti maniki kiatax aruku nuxia yarukuxti kusɨrɨboti aiñanainti esa nikɨxti.

⁵Matakonokonoti nauki asaratitɨpo, astaiti akamanu axɨmanio nikɨbuxixhti, ta chisɨrotitɨpɨpo.

⁶Isiutikai iñataiti Simón Peru, auki sɨrotitɨpo au nikɨxti. Astaitityo akamanu axɨmanio nikɨbuxixhti.

⁷Astaitityo axɨmanu xɨrɨpɨtɨx uiche ananka kiñoeno nityanuxti Jesús chanankapɨ yochepe axɨmanio pikiataka nikɨbuxixhti, ananka au kiatax narɨkɨkixh tasumanakana nuxia nakax.

⁸Auki axti maniki kiatax anankati isiuti maniki kusɨrɨboti aiñanainti sɨrotitɨpoityo au nikɨxti. Astaitityo axɨna sane, auki ikokotati.

⁹Chiyebopɨ uimia axɨna nantɨ iku Nikorox, ta sɨborikoti tato ñana Jesús.

¹⁰Auki, axɨmanuma amonkoma isiuti sɨromatɨ tato au nipoxɨma.

¹¹Mariax sɨsio tyɨrɨpo, esa nikɨxti Jesús, areoro. Auki nareox, matakonokono nauki asaboripo,

¹²asaratɨ ɨmo axɨbama toxɨma ángeles purusubí naibixhimia, amonkoma tɨmonsoma kauta ananka nikɨtɨpɨxti Jesús. Tamanti kauta ananka nityanuxti tapɨti kiatax kauta amonkio nipopesti.

¹³Axɨmanuma ángeles ñankitioma pɨnanaki: — Axɨkɨ paɨx, ¿kausane areorakakɨ? Tyone aiñumu nuraxɨma: — Tyopiki sɨrotɨ oboi nikɨtɨpɨ Nɨriabux iñemo, chɨtusiupɨ iñemo kauta opiñata.

¹⁴Naukiche tɨnantɨ sane, asaratato chaku auki asaratɨ ɨmoti Jesús, ta chɨtusiupɨ ɨmo axtɨ tyonenti.

¹⁵Ñankitioti Jesús pɨnanaki: — Axɨkɨ paɨx, ¿kausane areo? ¿Ñakuti iyoche napacheki? Tyone ñakionkox ananka bapario aɨbuti maniki asaratitɨ tyaku axɨmanu ñanaunx, nantɨ ɨmoti: — Axtɨ obi aikia aukina, urasoi sukarɨñɨ kauta nakax obi, nauki yɨrotɨ yapacherio.

¹⁶Nanti Jesús ɨmo: — ¡Mariax! Tyone basɨkɨbɨko tato nantɨ ɨmoti auki hebreo: — ¡Rabuni! (nantɨ auki besɨro: “Maestro”).

¹⁷Nanti Jesús ɨmo: — Aiñemekasañɨ, ityopiki chiyakapɨtɨki esati Iyaɨ. Akosi uraboi sukarɨ axɨbama masarukityaiki yɨkatɨ tato esati Iyaɨ, aubaɨtityo, axti Tupax iñemo Tupaxtityo aume.

¹⁸Auki Mariax Magdalena sɨrotɨ uraboi sukarɨma axɨmanuma amonkoma isiuti ta tyone asarati Yɨriabux, urapoityo sukarɨma axɨna nanti sukarɨ.

¹⁹Naukiche tɨtobikia au axɨmanu nanenes tominko, axɨmanuma amonkoma isiuti Jesús iyoberabaramakɨ au taman pox. Amonkio tyuruka umamana nuxia uimia ui nixhukuxɨma ñɨnanama axɨmanuma ɨriatuma axɨmanuma judíos. Sɨrotitɨpo Jesús axɨpekuma, atɨraiti kɨmuintya axɨpekuma, mankioti nuxia ɨmoma, nanti: — ¡Taikiana uxia aboi aumeampatoe!

²⁰Naukiche tɨnanti axɨna sane, ityusiankatati sukarɨma axɨmanio nobɨrityuka ñome ne'esti ichepe nipetakuxti. Axɨma pukɨnuñama ui axɨna asaramati Yɨriabux.

²¹Auki nanti tatityo ɨmoma: — ¡Taikiana uxia aboi aumeampatoe! Takanati Iyaɨ ikɨpurutiñɨ, saneityo axɨñɨ ikɨpukaño.

²²Auki bausukɨroti onɨma, nanti ɨmoma: — Apasusiusuxti Espíritu Santo.

²³Axɨbama xhimiakana aboi nomɨnantɨ uimia, xhimiakana ɨmoma. Axɨbama chapixhimiakatapɨ nomɨnantɨ uimia, sɨsioma yupu.

²⁴Tamanti Tyomanxi axɨpekukimia axɨmanuma doce amonkoma isiuti Jesús, nɨrixhti uimia Tokax, chanankatipɨ ichepema naukiche ityusiankanatiyɨ Jesús sukarɨma.

²⁵Naukiche iñataiti tato Tyomanxi, axɨmanuma makiataka urapoimia sukarɨti: — Sumasakati Yɨriabux. Tapɨti Tyomanxi aiñumuti nuraxɨma: — Axtɨ chiyastaipɨ nobɨrityu ne'esti oboi krabuka, axtɨ chiñatapɨ niñee ubau nobɨrityux autyo nipetakuxti, chikokotapɨ.

²⁶Yopɨrɨkɨ ocho naneneka, axɨmanuma amonkoma isiuti oberabarama tatityo au axɨmanu pox, auki anankati Tyomanxi ichepema. Amonkio tyuruka umamana uimia, auki sɨrotitɨpo Jesús, sɨroti kɨmuintya axɨpekuma auki mankioti ɨmoma, nanti: — ¡Taikiana uxia aboi aumeampatoe!

²⁷Auki nanti ɨmoti Tyomanxi: — Asasio niñee asasaityo nipetaku, aisɨkɨma ne'e au nobɨrityux. Tapɨ chakokonaunkapɨ. ¡Akokonau!

²⁸Aiñumuti Tyomanxi: — ¡Axɨkɨ Tupaxɨkɨ axɨkɨtyo Yɨriabuxɨkɨ iñemo!

²⁹Nanti Jesús ɨmoti: — Aikokota ityopiki asakañɨ. ¡Taikiana chiyaupɨ nipukɨnunkuxɨma axɨbama ikokotama axtɨ chastaipɨma!

³⁰Sɨrɨmana pikiataka omixhante uiti Jesús axɨba champɨ tu bastai, sukarɨ axɨmanuma amonkoma isiuti, chɨbokorobopɨ iku axɨna Nikorox.

³¹Axɨba bokorobo auna tyoneio axɨba oboiche apikokoroti Jesús tyonenti naki Mesías, Aɨtoxti Tupax, ui axɨna apikokota ane ñana ausɨborikibo ityopikiti.