Read Chiquitano JUAN 21 Bible Online

JUAN 21 - Chiquitano bible

JUAN 21

¹Auki ityusiankanatiyɨ tatityo Jesús sukarɨma axɨmanuma nesaxti apóstoles, abeu axɨmanu narubaityu tux nɨrixh Tiberias. Ityusiankanatiyɨ sane:

²Amonkoma chepe nakaxɨma axti Simón Peru, axti Tyomanxi namatɨ ɨmoti tokax, axti Natanael auki Caná auki axɨmanu kɨx Galilea, axɨmanuma toxɨma aɨtoxti Zebedeo axti Santiago chepeti Kuan abomaintyo toxɨma makiataka axɨbama apóstoles.

³Nanti Simón Peru ɨmoma: — Yɨkatɨ yasu nopiokox. Axɨmanuma makiataka namatɨ ɨmoti: — Somekatɨ tanu achepekɨ. Auki sɨromatɨ au taman canoa. Au axɨmanu tobixh champɨ iyebo uimia.

⁴Naukiche tɨtaneneka, anankati Jesús isiu nabeux axɨmanu narubaityu tux, tapɨ axɨmanuma nesaxti apóstoles chɨtusiupɨ ɨmoma axtɨ tyonenti.

⁵Ñankitioti Jesús pɨnanakimia: — Ma churapataiki, ¿ane nopiokox aboi? Axɨma aiñumuma: — Champɨ.

⁶Nanti Jesús ɨmoma: — Apiña tatityo momes au tux au nepanaunku naubesa canoa. Sane kaɨma ane iyebo aboi. Sane ikokotama nuraxti, auki chɨkusɨurupɨma aityonoma tanene nimomesɨma ityopiki tarukapae nopiokox iyebo uimia.

⁷Auki axti maniki kuasɨrɨtiapae ɨmoti Jesús nanti ɨmoti Peru: — ¡Unka tyonenti Yɨriabux! Naukiche onkoiti Peru axɨna sane ta tyonenti Yɨriabux, aiñanti kɨtɨpɨti naibixhti ityopiki anankati kɨsuasati, auki atobɨti au tux.

⁸Axɨmanuma makiataka amonkoma isiuti iñataimia isiu nabeux aɨbu axɨmanu canoa ityonotama axɨmanu momes ataso oboi nopiokoka, amonkoma taki cien metros pɨnanaki nabeux.

⁹Naukiche tiñataimia abeu, astaimia onximiana pes, ananka onɨ taman nopiokox chepe pan.

¹⁰Nanti Jesús ɨmoma: — Apaka tauna mɨmanantai nopiokoka omeanaki axɨmanio aɨbo apakaɨbuka.

¹¹Sɨrotitɨ Simón Peru au axɨmanu canoa auki aityonoti isiu nabeux axɨmanu momes ataso oboi nopiokoka posɨrɨmanaka, amonkio ciento cincuenta trex. Ui axɨna sane nisubaiki nopiokox, axɨmanu momes chɨkiopɨropɨ.

¹²Nanti Jesús ɨmoma: — Ausiapata auba. Champɨti axɨpekukimia axɨmanuma amonkoma isiuti ñankitio pɨnanakiti ñakuti, ityopiki tusiu ɨmoma ta tyonenti Yɨriabux.

¹³Auki aikianti Jesús mekuti axɨmanu pan, ityoximiati ɨmoma. Saneityo uiti aɨbu axɨmanu nopiokox.

¹⁴Ui axɨna tɨtabe trex ityusiankanatiyɨ Jesús sukarɨ axɨmanuma amonkoma isiuti naukiche tɨsɨborikoti tato.

¹⁵Naukiche tɨchauki niyakaxɨma, ñankitioti Jesús pɨnanakiti Simón Peru: — Simón, aɨtoxti Kuan, ¿isuasɨrɨka aemo pɨnanaki axɨbama makiataka? Aiñumuti Peru nuraxti: — Unka sane Yɨriabux, tusiu aemo axɨkɨ akuasɨrɨka iñemo. Nanti Jesús ɨmoti: — Asasatɨ tyakuma axɨbama amonkoma isiuñɨ, takanati naki asaratitɨ yutaku nobixhamanka.

¹⁶Ñankitioti tatityo Jesús pɨnanakiti: — Simón, aɨtoxti Kuan, ¿isuasɨrɨka aemo? Aiñumuti Peru nuraxti: — Unka sane Yɨriabux, tusiu aemo axɨkɨ akuasɨrɨka iñemo. Nanti Jesús ɨmoti: — Asasatɨ yutaku niyabu nobixhaka.

¹⁷Tɨtabe trex ñankikixhti pɨnanakiti nanti ɨmoti: — Simón, aɨtoxti Kuan, ¿isuasɨrɨka aemo? Auki sucheboti Peru tyopiki tɨtabe trex ñankikixhti pɨnanakiti axtɨ kuasɨrɨti ɨmoti. Aiñumuti nuraxti: — Yɨriabux, tusiu aemo nanaiña: axɨkɨ tusiu aemo ta akuasɨrɨka iñemo. Nanti Jesús ɨmoti. — Asasatɨ yutaku niyabu nobixhaka.

¹⁸Ñemanauntu sukanañɨ aemo tɨkañe naukiche yaɨxɨkɨki, aiñakio akɨtɨpɨkɨ naibi auki aɨkatɨ amenka kauta naxianka. Tapɨ axtɨ tiyarusɨrɨxɨkɨ, aipesɨnakakio napa nauki uiti kiatax aiñanti naibi akɨtɨpɨkɨ, sɨrotityo aɨbukɨ kauta chaxiankapɨ aɨrotɨ.

¹⁹Ui axɨna sane nuraxti Jesús, urapoiti kausane ñana nikonkoxti Peru axɨnaintyo nikuasɨrɨkɨxti Tupax ɨmoti ui nikonkoxti. Auki nanti ɨmoti: — ¡Ariaku isiuñɨ!

²⁰Naukiche asaratitɨ tato Peru chakuti, asaratitɨ ɨmoti maniki nesaxti apóstol maniki taruku nikuasɨrɨkɨxti ɨmoti Jesús, tyonenti naki anankati petakuti Jesús naukiche tyakɨrux niyakaxɨma ɨmo axɨmanu Paxkua, tyonentityo ñankitioti pɨnanakiti: “Yɨriabux, ¿ñakuti naki uiche aityoximianɨ?”

²¹Naukiche asaratitɨ Peru ɨmoti, ñankitioti pɨnanakiti Jesús: — Yɨriabux, karɨti naki, ¿kausane ñana nisɨborikixhti?

²²Aiñumuti Jesús nuraxti: — Axtɨ ixhanka asɨboriti iku axɨna kɨx chepe axtɨ isekatɨ tato ñana, ¿isane nɨmoche obi? Axɨkɨ ariaku isiuñɨ.

²³Sane naukiche ane axɨmanu manityakax axɨpekuma axɨmanuma amonkoma isiuti Jesús, axti maniki taruku nikuasɨrɨkɨxti chɨkoiñotipɨ ñana. Tapɨti Jesús chɨnanti ta chɨkoiñotipɨ ñana. Nanti sane: “Axtɨ ixhanka asɨboriti chepe axtɨ isekatɨ tato ñana, ¿isane nɨmoche obi?”

²⁴Axti naki tyonenti maniki nesaxti apóstol Jesús naki urapoiti nanaiña axɨba sane. Uiti aikonomoti, tusiu oemo ta ñemanauntu axɨna nuraxti.

²⁵Abe pikiataka sɨrɨmana axɨba omixhiante tɨkañe uiti Jesús. Taruku nububikixh, axtɨ bokorobopɨ nanaiña taikiana taman, iku nanaiña kɨx champɨ kautapɨ ameno axɨmanio Nikorox.