Read Chiquitano JUAN 4 Bible Online

JUAN 4 - Chiquitano bible

JUAN 4

¹Axɨmanuma fariseos ipiatema sɨrɨmanama axɨbama sɨromatɨ isiuti Jesús sɨrɨmanamaintyo axɨbama ɨrioma uiti pɨnanakiti Kuan

²(axɨna ñemanauntu chityonentipɨ Jesús naki maunimiana, ta axɨbama nesaxti apóstoles).

³Naukiche tɨtusiu ɨmoti Jesús, sɨrotitɨ auki Judea niyɨkɨxti tato au Galilea.

⁴Auki axɨmanu niyɨkɨxti, sɨrotitɨ auki axɨmanu kɨx Samaria.

⁵Sane naukiche iñataiti au axɨmanu tube au Samaria nɨrixh Sicar, saimia axɨmanu ñanaunx toxio tɨkañe uiti Jacob ɨmoti aɨtoxti Kiosen.

⁶Akamanu nakax nipiauruxti Jacob. Batacheboti Jesús ui kutubiux, atɨmoti esa axɨmanu paurux. Tɨsaimia kɨmuintya nanenes.

⁷Iñatai taman paɨx auki Samaria axikia tux. Nanti Jesús ɨmo: — Aichamasañɨ tux.

⁸Axɨmanuma nesaxti apóstoles ta yebomatɨ au tube apachema utuburiboma.

⁹Axɨmanu paɨx auki Samaria nantɨ ɨmoti: — ¿Kausane axɨkɨ, ankikia tux xhopɨnanakiñɨ atɨpobokɨ, abo axɨkɨ judíokɨ, tapɨ axɨñɨ auki Samariañɨ? — ¿Tyopiki axɨmanuma judíos chuxiampɨ nisɨborikixhimia aɨbuma axɨmanuma auki Samaria?

¹⁰Aiñumuti Jesús nurax: — Axtɨ asuputakaipɨ axɨna ñakumanataxti Tupax, ñakutityo naki mankioti tux apɨnanakikɨ, axɨpɨkɨ ankikia pɨnanakiti, toxiopɨ kaɨma aemo uiti axɨna tux sɨboriko.

¹¹Nantɨ axɨmanu paɨx ɨmoti: — Axɨkɨ Nɨriabux, champɨ uiche axikianka tux, axɨna paurux otɨsa: ¿aukiche aemo tux axɨna sɨboriko nauki aichamanañɨ?

¹²Axɨmanu kusɨrɨbo tɨkañe Jacob onkono uixh suiñemo axɨna paurux, aukina tɨkañe tyone chabo tux yochepe axɨba naɨtaiki axɨbaityo niyabux numukianka. ¿Ensapɨ axɨkɨ taruku nɨriaka pɨnanaki?

¹³Aiñumuti Jesús nurax: — Namanaiña axɨbama chabo axɨna tux, tosɨoma tatityo ñana.

¹⁴Tapɨti naki chaboti axɨna tux toxiobo sobi, chanantopɨ atosɨti tato. Axɨna tux toxiobo sobi ɨmoti isamunɨ kɨtɨpɨti nantaityux uixh champɨ nityakɨru nisɨborikixhti.

¹⁵Axɨmanu paɨx nantɨ ɨmoti: — Axɨkɨ Nɨriabux, aichamasañɨ axɨmanu tux, tapɨ ananto ichosɨ tato tapɨtyo isekatɨ tato auna ñaxɨkia tux.

¹⁶Nanti Jesús ɨmo: — Akosi aityasuruti aikianɨ auki ariaku tatityo tauna aɨbuti.

¹⁷Axɨmanu paɨx aiñumu nuraxti: — Champɨ nikianañɨ. Nanti Jesús ɨmo: — Ñemanauntu axɨna ukanɨ champɨti aikianɨ.

¹⁸Tyopiki cinkoma tɨkañe axɨbama aikianɨ, axti maniki kaɨma aka isiuti chɨtɨpɨ aikianɨti. Ñemanauntu axɨna ukanɨ.

¹⁹Naukiche onkoi axɨna sane, axɨmanu paɨx nantɨ: — Axɨkɨ Nɨriabux, yasakatɨ aemo tyonenkɨ profeta.

²⁰Axɨba tɨkañe pasɨnɨtaña, axɨba auki Samaria, opiñanaunta Nixhupu Tupax auna, onɨ axɨna yirityux. Tapɨ axaño axɨba judíos amukanaño Jerusalén tyone axɨna kauta somenotɨ supanau.

²¹Aiñumuti Jesús nurax: — Aikokosoñɨ paɨx, kuatɨki axɨna auche ñana champɨ nɨmoche amenotɨ apiñanaunuti Tupax onɨ axɨna yirityux autyo Jerusalén.

²²Axaño chɨtusiupɨ aume ñakuti ɨmoche apanau. Tapɨ axɨsomɨ tusiu suiñemo ñakuti ɨmoche supanau, ityopiki axɨna nautaesɨbuku eanaki nomɨnantɨ kuatɨ axɨpekukimia axɨbama judíos.

²³Chauki tiñatai mapakɨmunkutux, kaɨma tusiu axɨbama ñemanaunkuxatoe manaunuma ɨmoti Tupax ñemanaunkuxatoe ñanaunkuxɨma, auki nausasɨxɨma uityo nesaxti Espíritu axti Tupax. Tyopiki xhanxti Tupax nauki aisamunema sane axɨbama iñanaunumati.

²⁴Espíritu nakaxti Tupax, axɨbama iñanaunumati tari aisamunema ñemanauntu ñanaunkuxɨma, takana noñemaxti Tupax.

²⁵Axɨmanu paɨx nantɨ ɨmoti: — Axɨñɨ tusiu iñemo kuatɨ ñana axɨmanu Mesías (nantɨ sane, axti Cristo). Axtɨ kuatɨ ñana, nanaiña iñununekanasomɨ.

²⁶Nanti Jesús ɨmo: — Axti maniki, unka axɨñɨ, naki manityanati aɨbukɨ.

²⁷Auki iñataimia tato axɨmanuma nesaxti apóstoles, sɨsioma taruku nikɨtobɨxɨma ityopiki anankati Jesús baparioti aɨbu taman paɨx. Champɨti naki ñankitio pɨnanakiti isane nixhantɨmo o isane axɨna nipiarixhti aɨbu.

²⁸Axɨmanu paɨx onkono uixh niyausɨx sɨrotɨ tato au tube, uraboi sukarɨ namanaiña:

²⁹— Ausiapata amasarai taman noñɨnx urapoi sukarɨñɨ nanaiña axɨna uxiante sobi. ¿Ensapɨ chityonempɨ axɨmanu Mesías?

³⁰Auki axɨmanuma po'oso sɨromatɨ auki tube asaramati Jesús.

³¹Auki axɨmanuma nesaxti apóstoles namatɨ ɨmoti asamuti nuxia: — Maestro, ariako pariu a'a.

³²Tapɨti nanti ɨmoma: — Axɨñɨ ane nixharata, axɨna chausuputakaipɨ.

³³Axɨmanuma nesaxti apóstoles ñankitioma pɨnanakimiantoe: — ¿Taki anati naki makanati tauna utuburiboti?

³⁴Tapɨti Jesús nanti ɨmoma: — Axɨna nixharata tyone axɨna noñemaxti naki uiche aikɨpurutiñɨ nauki iñanai tyakɨru yachɨkoiti.

³⁵Axaño amukanaño: ‘Sɨrotiki cuatro panka nauki bapakɨtau.’ Tapɨ axɨñɨ sukanañɨ aume amasasatɨ ñome axɨba ameno kɨtu, tɨkoñotɨ nauki bapakɨtau.

³⁶Axti naki bapakɨtauruti ane toxiobo ɨmoti axɨmanu iyebo uiti tyone axɨna sɨborikixh champɨ nityakɨrux, nauki axti naki mankɨturu ichepeti naki bapakɨtauru taruku nipukɨnunkuxɨma.

³⁷Ñemanauntu axɨmanu manityakax nantɨ sane, ‘Aboma axɨbama mankɨturuma tapɨ makiataka bapakɨtauruma.’

³⁸Axɨñɨ ikɨpukaño apapakɨtau axɨna chɨtɨpɨ aboi apiña kɨtu. Makiataka axɨbama uiche aiñama kɨtu, axaño kaɨma sɨrotɨ aboi niyachɨkoimia.

³⁹Sɨrɨmanama axɨbama po'osoma auki axɨmanu tube Samaria ikokoromati Jesús ui nurax axɨmanu paɨx sukarɨma: “Urapoi sukarɨñɨ nanaiña axɨna uxiante sobi.”

⁴⁰Sane naukiche axɨmanuma po'oso auki Samaria iñataimia esati, namamatɨ ɨmoti asamuti nuxia sɨsioti ichepema. Axti sɨsioti ichepema tox naneneka,

⁴¹sɨrɨmanama axɨbama ikokoromati naukiche onkoimia axɨna nuraxtiatoe.

⁴²Auki namatɨ ɨmo axɨmanu paɨx: — Kaɨmampae sopikokota, chɨtɨpɨ ui axɨna urapoi suisukarɨ, ta ui axɨna somonkoi axɨsomɨ nuraxtiatoe tusiu suiñemo ñemanauntu tyonenti naki uiche aityaesɨmunuti axɨna kɨx eanaki nomɨnantɨ.

⁴³Yopɨrɨkɨ axɨmanio tox naneneka, sɨrotitityo Jesús auki Samaria niyɨkɨxti au Galilea.

⁴⁴Tyopiki, uixhtiatoe nanti, ɨmoti naki profeta chiñanaunumatipɨ au nikɨxtiatoe.

⁴⁵Naukiche iñataiti au Galilea, axɨmanuma po'oso auki axɨmanu kɨx uxia ñakionkoxɨma kɨmenuti, ityopiki yebomatityo ɨmo axɨmanu pukɨnunkux Paxkua au Jerusalén astaimia nanaiña axɨna isamutenti akamanu.

⁴⁶Basɨkɨbɨkoti tato Jesús au Caná auki Galilea, kauta isamutenti tux ɨmo vino. Anankati akamanu tamanti ɨriatuxɨma axɨbama masortaboka, anati aɨtoxti maunxokonoti au Cafarnaúm.

⁴⁷Naukiche tɨtusiu ɨmoti maniki yɨriabux tiñataiti tato Jesús auki Judea au Galilea, sɨrotitɨ asarati nanti ɨmoti asamuti nuxia aɨrotitɨ isiuti au nipoxti nauki uxianati tato uiti aɨtoxti, tɨsaimiampae nikonkoxti.

⁴⁸Aiñumuti Jesús nuraxti: — Axaño chapikokotapɨ, axtɨ chamastaipɨ axɨba champɨ tamastai.

⁴⁹Axti maniki ɨriatu masortaboka nanti ɨmoti: — Axɨkɨ Yɨriabux, ariaku konto, tɨsaiyapae akonti isaɨ.

⁵⁰Auki nanti Jesús ɨmoti: — Akosi tato au napo. Axti maniki aɨ champɨ kausane ɨmoti.

⁵¹Naukiche tɨniyɨkɨxti tato au nipoxti, sɨromatɨ kɨmenuti axɨmanuma nikumanakataxti namatɨ ɨmoti: — Axti aɨ chauki tuxiankati tato.

⁵²Ñankitioti pɨnanakimia isane horax onkisioti uxia tato ɨmoti aɨtoxti, axɨma aiñumuma: — Tɨmɨka iyau tose sɨrotɨ pɨnanakiti nipiakɨtaikixhti.

⁵³Axti maniki yaɨtoti akionotiyɨ ta axɨmanu horax naukiche nanti Jesús ɨmoti: “Champɨ kausane ɨmoti aɨ”. Axti kaɨma ichepe namanaiña axɨbama auki nipoxti ikokoromati Jesús.

⁵⁴Tyone axɨna kiatax isamutenti Jesús axɨna champɨ tastaimia, naukiche iñataiti tato auki Judea au Galilea.