Read Chiquitano JUAN 8 Bible Online

JUAN 8 - Chiquitano bible

JUAN 8

¹Tapɨti Jesús sɨrotitɨ onɨ axɨmanu yirityux Olivos,

²au axɨmanu kiatax nanenes, naukiche tɨtaneneka, sɨrotitɨ tatityo au nipo meankax. Namanaiña sɨromatɨ esati, tapɨti tɨmonsoti auki manunekanati ɨmoma.

³Axɨmanuma manunekanama bakɨpukux uiti Moisés ichepe axɨmanuma fariseos sɨrotɨ uimia taman paɨx, axɨna tabɨko uimia aɨbuti kiatax ñoñɨnx. Sɨro uimia kɨmuintya ɨmoma axɨmanuma amonkoma akamanu,

⁴auki namatɨ ɨmoti Jesús: — Maestro, axɨna paɨx tabɨko soboi ananka aɨbuti kiatax ñoñɨnx.

⁵Axɨna bakɨpukux uiti Moisés nantɨ, tari koma oboi kanka axɨna paɨx sane nisɨborikixh. ¿Karɨkɨ urakɨ sane?

⁶Axɨma ñankitioma pɨnanakiti axɨna sane nauki aiñama ñakokotoxɨma ɨmoti, sane ane ityopikiche urabomati. Tapɨti Jesús matakonokonoti, makonomonoti akɨ ui ne'esti.

⁷Auki ñankitioma tatityo pɨnanakiti, axti atɨraiti, nanti ɨmoma: — Axtɨ anati naki abaxɨpekuki champɨ nomɨnantɨ uiti, tari kusɨrɨboti aruruiti.

⁸Auki makonomonoti tatityo akɨ ui ne'esti.

⁹Naukiche onkoimia axɨna nuraxti sane, taikianati taman sɨromatɨ tato, kusɨrɨboma aɨromatɨ tato axɨbama tɨyarusɨrɨma. Naukiche tɨsɨsioti Jesús tamanti ichepe axɨmanu paɨx,

¹⁰atɨraiti tato ñankitioti pɨnanaki axɨmanu paɨx: — ¿Kauta nakaxɨma? ¿Champɨti naki ityabairɨ?

¹¹Tyone aiñumu nuraxti: — Sane, Nɨriabux. Auki nanti Jesús ɨmo: — Axɨñɨntyo champɨ tyakuchekɨ sobi. Akosi tato, tapɨ ananto obi sane nasɨboriki.

¹²Manityanati tatityo Jesús ɨmo namanaiña, nanti sane: — Axɨñɨ basaruxɨñɨ ɨmo axɨbama sɨborikoma iku axɨna kɨx. Axti naki kuatati isiuñɨ, ane nanentax ɨmoti uiche asɨboriti, chanantopɨ amenti au tomikianene.

¹³Axɨmanuma fariseos namatɨ ɨmoti: — Axɨkɨ anityaka atakukɨatoe, ¿kausane atusi suiñemo axtɨ ñemanauntu axɨna ukanɨ?

¹⁴Aiñumuti Jesús nuraxɨma: — Axɨna nisura sɨtɨpɨñɨantoe baserebio, axɨna sukanañɨ ta ñemanauntu. Tyopiki tusiu iñemo aukiche isetɨ kautaityo niyɨkɨ. Tapɨ axaño chɨtusiupɨ aume.

¹⁵Axaño amastai takana axɨbama mañoñɨnka tapɨ axɨñɨ chɨsanempɨ sobi.

¹⁶Axtɨ sobi ñana yasarai, isamute isiuki axɨna ñemanauntu, tyopiki chɨtamampɨñɨ yasarai, axti Iyaɨ naki uiche aikɨpuruñɨ astaitityo chepeñɨ.

¹⁷Nantɨ axɨmanu bakɨpukux aume uiti Moisés, axtɨ aboma toxɨma chepe nuraxɨma, auki kaɨma axɨmanu nuraxɨma baserebio.

¹⁸Axtɨ sane, axɨñɨ uxia nisura sɨtɨpɨñɨantoe, axtityo Iyaɨ naki uiche aikɨpurutiñɨ, uxiaintyo nuraxti iñemo.

¹⁹Ñankitioma pɨnanakiti — ¿Kauta nakaxti aɨma? Aiñumuti Jesús nuraxɨma: — Axtɨ ausuputakapɨñɨ, ausuputakatipityo Iyaɨ.

²⁰Nanti Jesús nanaiña axɨna sane naukiche anankati manunekanati au nipo meankax, yobesa axɨmanio kauta omeno makumanatax. Champɨti iñenoti, ityopiki chiñataikipɨ mapakɨmunkutux ɨmoti.

²¹Nanti tatityo Jesús ɨmoma: — Axɨñɨ yɨkatɨ aukina, axaño apapachekañɨ ñana, aukonka ñana aɨbu axɨmanio nomɨnantɨ aboi. Axɨna kauta niyɨkɨ, axaño chiyebopɨ aboi.

²²Axɨmanuma ɨriatu axɨbama judíos namatɨ: — ¿Kausane nanti sane chiyebopɨ osoi kauta niyɨkɨxti? ¿Taki xhanxti aityabairotiyɨ?

²³Nanti Jesús ɨmoma: — Axaño ikuki axɨnantai kɨx año, tapɨ axɨñɨ isekatɨ auki napes.

²⁴Sane naukiche tɨsukanañɨ aume aukonka ñana aɨbu nomɨnantɨ aboi. Tyopiki axaño chapikokotapɨ ta Axɨñɨ, sane naukiche aukonka ñana aɨbu nomɨnantɨ aboi.

²⁵Auki ñankitioma pɨnanakiti: — ¿Ñakutikɨmo? Aiñumuti Jesús nuraxɨma: — ¿Kausane iñumu nabura?

²⁶Chiyaupɨ surapoboiboñɨ kɨtɨpɨ axɨna chuxiampɨ nausɨboriki. Axti naki uiche aikɨpuruñɨ nanti axɨna ñemanauntu, axɨñɨ sukanañɨ aume axɨna ñonkoi nuraxti.

²⁷Axɨma chiyebopɨ uimia axɨna nuraxti ɨmoma kɨtɨpɨti Yaɨtoti.

²⁸Sane naukiche nanti ɨmoma: — Axaño tusiu ñana aume ñemanaunkuxatoe ñakuti naki Aɨtoxti ñoñɨnx, axtɨ apityakubaxikiañɨ kɨtɨpɨ kurusɨx. Tusiuityo aume ñana axɨñɨ champɨ isamute ui niñoñemantoe, axɨñɨ isamute axɨna ñanunekakaxti Iyaɨ iñemo.

²⁹Axti Iyaɨ chiñokonotiñɨpɨ, ityopiki axɨñɨ isamute axɨna uxia ɨmoti.

³⁰Naukiche nanti Jesús axɨna sane, sɨrɨmanama axɨbama ikokoromati.

³¹Nanti Jesús ɨmo axɨmanuma judíos ikokoromati: — Axtɨ apikokota nihxanunekaka, ñemanaunkuxatoe tyonema axɨbama amonkaño isiuñɨ.

³²Ausuputakai axɨna ñemanauntu, uixh ñana uxia nausɨboriki.

³³Axɨma iñumutama: — Axɨsomɨ nityakɨbaɨtuxti Abraham, chɨsupaserebikiapɨ ɨmoti kiatax. ¿Kausane ukanɨ champɨti ñana ɨmoche supaserebi?

³⁴Nanti Jesús ɨmoma: — Ñemanauntu sukanañɨ aume axɨbama isamutema nomɨnantɨ, kumanakaxɨma ɨmo nomɨnantɨ.

³⁵Champɨti kumanakax sɨsioti ɨmo nanaiña nisɨborikixhti ityupekuti naki ɨmoche aserebiti. Tapɨti naki aɨtoxtiatoe tyonenti naki sɨsioti ɨmo nanaiña naskɨbeka ityupekuti.

³⁶Sane naukiche, axtɨ axɨñɨ Aɨtoxti Tupax, ixhimiakata axɨna nomɨnantɨ aboi, ñemanaunkuxatoe uxia nausɨboriki.

³⁷Tusiu iñemo ta axaño nityakɨbaɨtuxti Abraham. Axaño auxianka apityabairoñɨ ityopiki chauxiankapɨ apasuriu nisura.

³⁸Axɨñɨ surapoi axɨna ityusiankatati naki Iyaɨ sukarɨñɨ. Saneityo axaño apisamuse axɨna amonkoi uiti Iyaɨ.

³⁹Axɨma namatɨ ɨmoti: — ¡Axti naki suiyaɨ tɨkañe, tyonenti Abraham! Aiñumuti Jesús nuraxɨma: — Axtɨ ñemanauntupɨ axaño aɨtoxti Abraham, apisamutempɨ isiu axɨna isamutenti tɨkañe.

⁴⁰Chɨsanempɨ, tɨsukanañɨ aume axɨna ñemanauntu nanti Tupax iñemo, tapɨ axaño auxianka apityabairoñɨ. ¡Champɨ isamutenti Abraham takana axɨna sane!

⁴¹Axaño apisamute takana axɨna isamutema axɨbama aubaɨtaiki. Axɨma namatɨ ɨmoti: — ¡Axɨsomɨ champɨti kiatax suiyaɨ, kunauntañatiatai Tupax tyonenti Suiyaɨ!

⁴²Aiñumuti Jesús nuraxɨma: — Axtɨ ñemanauntupɨ aɨtoxti Tupax año, isuasɨrɨkapɨ aume, ityopiki axɨñɨ isekatɨ esakiti Tupax. Chisekapɨtɨ ui niñoñemantoe, uiti Tupax aikɨpurutiñɨ.

⁴³¿Kausane chiyebopɨ aboi nixhanunekaka? Ityopiki chuxiampɨ aume amonsaperio nixhanunekaka.

⁴⁴Axti aubaɨ tyonenti chobores. Axaño auxianka apisamune isiu axɨna nixhankaxti. Axti chobores aukiapae tɨkañe yatabayoxti tarukuityo ñapantuxti. Nanaiña axɨna nuraxti chiñemanauntupɨ, uiti taruku ñapantuxɨma mañoñɨnka.

⁴⁵Sane naukiche axaño chapikokotapɨ axtɨ axɨñɨ sukanañɨ axɨna ñemanauntu.

⁴⁶¿Ñakuti abaxɨpekuki ane uiche aityusiankati axtɨ ane nomɨnantɨ sobi? Axtɨ ñemanauntu axɨna sukanañɨ, ¿kausane chapikokotapɨ nisura?

⁴⁷Axɨbama aɨtoxti Tupax onsapetioma nuxia nuraxti. Tyopiki axaño chɨtɨpɨ aɨtoxti Tupax año, sane naukiche chauxiankapɨ amonkoi nuraxti.

⁴⁸Auki namatɨ axɨmanuma judíos ɨmoti: — Axɨsomɨ suisoñoka axtɨ sukanasomɨ axɨkɨ po'osokɨ au samaria anatityo chobores akɨtɨpɨkɨ.

⁴⁹Aiñumuti Jesús nuraxɨma: — Axɨñɨ champɨti chobores sɨtɨpɨñɨ. Axɨna niyachɨkoi ta isamune noñemaxti Iyaɨ. Tapɨ axaño chuxiampɨ nabura sɨtɨpɨñɨ.

⁵⁰Axɨñɨ chiyapachekapɨ nauki uxia nastaxɨma makiataka iñemo. Axti Tupax tyonenti naki xhanxti nauki sane, tyonentityo naki uiche asaraiti.

⁵¹Ñemanauntu axti naki ikokotati nixhanunekaka, sɨborikoti ɨmo nanaiña naskɨbeka ichepeti Tupax.

⁵²Axɨmanuma judíos aiñumuma nuraxti: — Ñemanauntu kaɨma sopikokota ta anati chobores akɨtɨpɨkɨ. Axti Abraham ichepe axɨbama profetas koiñoma, tapɨ axɨkɨ ukanɨ: ‘Naki ikokotati nura chɨkoiñotipɨ ñana.’

⁵³¿Ensapɨ taruku nɨriaka pɨnanakiti suiyaɨ Abraham? Koiñoti, axɨmanumaintyo profetas koiñoma. ¿Isane naka au nakionko?

⁵⁴Aiñumuti Jesús nuraxɨma: — Axtɨ uxia nisura sɨtɨpɨñɨantoe, axɨmanu nisura sɨtɨpɨñɨantoe champɨ nanenekiche. Axti Iyaɨ tyonenti naki uxia nuraxti sɨtɨpɨñɨ, tyonenti naki amukanaño Tupaxti aume.

⁵⁵Ñemanaunkuxatoe, axaño chausuputakatipɨ. Axɨñɨ isuputakati. Isuputakati sane naukiche xhakokonaunka ɨmoti. Axtɨ sukanañɨ chisuputakatipɨ, taruku nixhapantu takana axaño.

⁵⁶Axti Abraham, kusɨrɨboti tɨkañe amopɨnanaki taruku nipukɨnunkuxti ui axɨna ipiatenti isekatɨ iku axɨna kɨx. Naukiche astaiti taruku nipukɨnunkuxti uixh.

⁵⁷Auki ñankitioma pɨnanakiti: — Champɨki aemo cincuenta nasɨkɨbeka, ¿axɨkɨ ukanɨ ta asuputakati Abraham?

⁵⁸Aiñumuti Jesús nuraxɨma: — Ñemanauntu sukanañɨ aume naukiche anati iku kɨx Abraham axɨñɨ anankañɨantai.

⁵⁹Auki axɨmanuma judíos xhanxɨma arurumati oboi kanka. Tapɨti Jesús matanekanati axɨpekuma makiataka auki sɨrotitɨ tyɨrɨpo auki nipo meankax.