Read Chiquitano ROMANOS 10 Bible Online

ROMANOS 10 - Chiquitano bible

ROMANOS 10

¹Masarukityaiki, axɨna nixhantɨmo niyausasɨ ichepe nixheanka ɨmoti Tupax ta tyakuma axɨbama auki Israel nauki aye uimia nisɨborikixhimia.

²Axɨñɨ sukanañɨ ñemanauntu ta xhanxɨma aserebimia ɨmoti Tupax. Ta axɨmanu nixhankaxɨma chiyebopɨ nuxia uimia.

³Chɨtusiupɨ ɨmoma axtɨ uiti Tupax uxia nisɨboriki mañoñɨnka, tapɨ axɨma au ñakionkoxɨma besɨro ñapanaunkuxɨma. Sane naukiche chisamutempɨma axɨna yakɨpukuxti Tupax uiche besɨro nosɨboriki.

⁴Tyopiki axɨmanu bakɨpukux uiti Moisés iñatai nityakɨrux aɨbuti Cristo, nauki namanaiña axɨbama ikokoromati uiti uxia nisɨborikixhimia.

⁵Axɨba uxia mapanaunkux au bakɨpukux uiti Moisés ikonomotati sane: “Axti naki isamutenti nisɨborikixhti isiuki axɨna bakɨpukux, uixh uxia nisɨborikixhti.”

⁶Tapɨ axɨmanu uiche uxia nosɨboriki tyopiki numakokonaunku nantɨ: “Tapɨ ukanɨ au nausasɨ: ‘¿Ñakutipɨ naki sɨrobotɨ au napes?’ — axɨna sane, ta nauki ayetitɨ akɨ Cristo — .

⁷Tapɨ ukanɨntyo ‘¿Ñakutipɨ naki sɨrotitɨ ñana kauta taruku tomikianene?’ ” — axɨna sane, ta nauki axti Cristo aɨrotitɨ tato au napes axɨpekukimia makoiñoka.

⁸¿Isanemo axɨmanu nantɨ sane?: “Axɨna manityakax ane saimiantai aemo, ane aikɨ anentyo au nausasɨ.” Tyone axɨna uxia manityakax supanunekaka.

⁹Axtɨ obiatoe ukanɨ ta axti Jesús tyonenti Yɨriabux axtɨ aikokotaityo au nausasɨ ta uiti Tupax asɨboriti tato, iyebo obi esati Tupax.

¹⁰Tyopiki ui nuyausasɨ uikokota nauki aye uxia nosɨboriki tapɨ ui nusaru tusiu nikuaxti Jesucristo oemo nauki aye osi champɨ nityakɨru nosɨboriki.

¹¹Nantɨ iku Nikorox: “Axti naki onkotitɨ ɨmoti, chɨkɨsobotipɨ ñana.”

¹²Tyopiki chepatai nikuaxɨma axɨbama judíos takana axɨbamaintyo chɨtɨpɨ judíos. Tyopiki axti naki Yɨriabux tyonenti Yɨriabux ɨmo namanaina axɨbama akionomakɨ ɨmoti.

¹³Tyopiki tyone axɨna nantɨ sane: “Namanaiña axɨbama akionomakɨ iyo nɨrixhti Yɨriabux, tyonema axɨbama ane maximiakatax ɨmoma.”

¹⁴¿Kausane akionomakɨ ɨmoti, abo chikokoromatipɨ? ¿Kausane aikokoromati, axtɨ chonkoipɨma nɨrixhti? ¿Kausane onkoimia nɨrixhti axtɨ champɨti naki uiche uraboiti sukarɨma axɨba omixhia manityakax?

¹⁵¿Kausane anunekama axɨba omixhia manityakax axtɨ chɨtyonempɨma axɨbama ɨmoche bakɨpukux? Takana nantɨ iku Nikorox: “¡Taruku nikoñokokox axtɨ iñataimia axɨbama kuamatɨ yupu axɨba omixhia manityakax!”

¹⁶Chɨnamanaiñampɨ yasutiuma axɨmanio omixhia manityakax. Ta takana nanti naki profeta Isaías: “Yɨriabux, ¿Ñakutipɨ ikokotati naukiche onkoiti supanunekaka?”

¹⁷Sane, axɨna numakokonaunku kuatɨ axtɨ oñonkoi axɨmanio omixhia manityakax, axɨmanio omixhia manityakax kuantio oboi nuraxti Jesucristo.

¹⁸Tapɨ axɨñɨ xhankitio: ¿Ensapɨ chonkoipɨma axɨmanio omixhia manityakax? ¡Abo onkoimia! Tyopiki nantɨ sane iku Nikorox: “Axɨmanio ñanunekakaxɨma sɨrotɨ iku nanaiña kɨx au nanaiña nityakɨru kɨx iñatai ñanunekakaxɨma.”

¹⁹Xhankiriora tatityo: ¿Ensapɨ chiyebopɨ au ñakiokoxɨma axɨbama auki Israel? Kusɨrɨboti Moisés nanti sane: “Sobi ñana chuxiampɨ napakionko ɨmoma axɨbama chɨtɨpɨ judíos. Autɨborikia ñana sobi ɨmoma axɨbama chixhanxɨpɨma uxia ñapanaunkuxɨma.”

²⁰Nantityo sane Isaías: “Axɨbama chiyapacherioropɨmañɨ ichabɨka uimia. Axɨñɨ ityusiankakañɨ sukarɨma axɨbama chakionopɨmakɨ iyoñɨ.”

²¹Tapɨ ɨmoma axɨbama auki Israel nanti Isaías: “Auki tansɨrɨ ichepe sux niyatasuku ɨmoma axɨbama chixhanxɨpɨma akokonauma champɨityo uxia ɨmoma.”