Read Chiquitano ROMANOS 11 Bible Online

ROMANOS 11 - Chiquitano bible

ROMANOS 11

¹Sane naukiche xhankiriora kaɨma: ¿Ensapɨ sɨroma pese uiti Tupax axɨbama auki Israel? ¡Chɨsanempɨ! Axɨñɨntyo isekatɨ auki Israel. Nityakɨbaɨtuxti Abraham nityakɨbaɨtuxtityo Benjamín.

²Aukiapae tɨkañe nanti Tupax ɨmoma axɨbama auki Israel, ta tyonema aɨtoxti.

³“Axɨkɨ Yɨriabux, koiñoma uimia axɨbama manityanama ui noñema omiñaxioityo uimia naesa altar. Axɨñantai isɨborikiaiki, abomaintyo isiuñɨ aɨbu nixhankaxɨma aityabairomañɨ.”

⁴Tapɨti Tupax aiñumuti: “Aboma sɨroma pese sobi ñemoantoe siete mil mañoñɨnka axɨbama chɨmanaunupɨma ɨmoti tupax Baal.”

⁵Saneityo kaɨma abomainki pariu mɨmanamantai axɨbama samamekanama uiti Tupax ui nipukɨruxti tyakuma.

⁶Axtɨ ui nipukɨruxti Tupax, chɨtɨpɨ axtɨ axɨna isamutema. Axtɨ sanempɨ, axɨna nipukɨruxti Tupax chauki chityonempɨ nipukɨruxti.

⁷¿Kausane kaɨma? Axɨbama auki Israel chiyebopɨ uimia axɨna yapachetioma, tapɨ axɨmanuma samamekanama uiti Tupax ta iyebo uimia. Tapɨ makiataka champɨ nixhantɨmoma,

⁸takana nantɨ iku Nikorox: “Ui noñemaxti Tupax chɨpukɨrusupɨ nausasɨxɨma tyaku makiataka, kaɨmainki sane nisɨborikixhimia. Abe nisɨtoxɨma uiti axɨba chumasarapɨtɨ numasuxɨma axɨba champɨ omonkoi.”

⁹Nantityo David tɨkañe: “Tari axɨmanu niyasapakaxɨma ɨmo nipukɨnunkuxɨma tari tyoneio makokotox ɨmoma, uiche atapenema ɨmo nityakisɨrɨkɨxɨma.

¹⁰Tari aumameso nisɨtoxɨma, tapɨ ane isane astaimia. Tari kumanakaxɨma ɨmo nanaiña nisɨborikixhimia.”

¹¹Kaɨma xhankiriora: ¿Ensapɨ axɨbama auki Israel, naukiche tapenekoma, chanantopɨ atɨraimia tato? ¡Chɨsanempɨ! Axtɨ sane, oboi axɨmanio nipɨnatema axɨbama judíos, axɨbama chɨtɨpɨ judíos ane maximiakatax ɨmoma, nauki axɨbama auki Israel ɨnantɨ ɨmoma.

¹²Sane, axtɨ ui axɨmanu nityapenekixhimia axɨbama judíos uixh koñokono nisɨborikixhimia iku axɨna kɨx, tapɨ axɨbama chɨtɨpɨ judíos, ¡chauki tɨtusiu oemo kausane ñana nikoñokoko nisɨborikixhimia!

¹³Ane surapoboibo ausukarɨ, axɨbama chɨtɨpɨ judíos. Tyopiki axti Tupax ikɨpurutiñɨ esama axɨbama chɨtɨpɨ judíos, axɨñɨ taruku niñonxɨkɨ ɨmo axɨna niyachɨkoi.

¹⁴Ixhanka nauki aboma axɨbama isarukityaiki ɨnantɨ ɨmoma autopiki, sane aikiaɨburuma año eanaki nomɨnantɨ.

¹⁵Axtɨ axɨmanu chiyasutiupɨma axɨbama judíos, uixh kuatɨ maximiakatax iku axɨna kɨx uiti Tupax, ¿isanempɨ axɨna chɨtoxiopɨ ñana axtɨ ane maximiakatax ɨmoma? ¡Toxio ɨmoma asɨborimia tato axɨbama tɨkoiñoma!

¹⁶Axtɨ axɨna kusɨrɨbo pan uxiane tyone toxiobo ɨmoti Tupax, isiuityo nanaiña axɨmanu uxiantamoebo. Axtɨ nixhanaka soes tyone toxiobo ɨmoti Tupax, isiuityo axɨba nipiax.

¹⁷Axɨmanu soes olivo, tyonema axɨbama judíos, botɨsɨro omeanaki nipiax, au niñokonosɨox sɨro tato kiatax eanaki nɨunx, axɨmanio tyone axɨkɨ. Sane naukiche iyebo obi chepe nixhanakax saneityo iyebo obi asɨborikibo aɨbu axɨmanu soes olivo.

¹⁸Tapɨ onkatɨ aemoantoe, ñopɨnanaki axɨmanio yupakatoe. Axtɨ sane obi akionsɨ ta axɨkɨ chobipɨ aiñe axɨmanu nixhanakax, ta ui axɨmanu nixhanakax aiñenɨ.

¹⁹Axtɨ axɨkɨ ukanɨ: “Botɨsɨro omeanaki nipiax nauki axɨñɨ yɨro yobityobo.”

²⁰Ñemanauntu, botɨsɨro tyopiki chupakokonaumpɨ, tapɨ axɨkɨ aka akamanu tyopiki nakokonaunku. Sane naukiche tapɨ onkatɨ aemoantoe, akionsɨ tyone iyoti Tupax.

²¹Tyopiki axtɨ axti Tupax chumañekanapɨ uiti axɨmanio yupakatoe, axɨkɨtyo chañekakapɨ uiti.

²²Unka astai taruku nipukɨruxti Tupax, chuxiampityo ɨmoti chuisamutempɨ yakɨpukuxti. Besɨro ñapanaunkuxti aɨbuma axɨbama tapenekoma, tapɨ aɨbukɨ taruku nipukɨruxti. Aisamuse au nanaiña nasɨboriki takana axɨna nipukɨruxti. Tyopiki axtɨ chɨsanempɨ obi atɨsɨkaityo uiti.

²³Tapɨ axtɨ axɨbama judíos makokonauma tato, sɨroma tatityo kauta naukiche atɨsɨma. Tyopiki axti Tupax ane noñemaxti uiche aɨroma tatityo aukiche atɨsɨma.

²⁴Axtɨ olivokɨ eanaki nɨunx atɨsɨka nauki aɨro kɨtɨpɨ axɨna uxia olivo, ¡saneityo axɨbama judíos ta tyonema axɨbama nipiaxatoe axɨmanu olivo uxia, sɨroma tatityo kɨtɨpɨ axɨna nipiache!

²⁵Masarukityaiki, ixhanka atusi aume nixhantɨmoti Tupax axɨna anekana uiti, nauki tapɨ apiñata takana axtɨ apipiaka ɨmo nanaiña: aboma axɨbama auki Israel chiyasutiupɨma axɨna manunekatax chepe axtɨ namanaiña kuamatɨ tato axɨbama chɨtɨpɨ auki Israel.

²⁶Auki ñamanaiña axɨbama auki Israel taesɨburuma pɨnanaki nomɨnantɨ, tyopiki axɨna Nikorox nantɨ sane: “Axti naki mataesɨmununubu kuatati ñana auki Sión sɨro pese uiti pɨnanakiti Jacob axɨba nomɨnantɨ.

²⁷Tyone axɨna niyesa tratox aɨbuma axtɨ tɨtaesɨburuma sobi pɨnanaki nomɨnantɨ uimia.”

²⁸Axɨbama judíos chuxiampɨ uiti Tupax ɨmoma auki naka axɨba omixhia manityakax, autopiki axɨbama chɨtɨpɨ judíos. Ta kuasɨrɨmainki ɨmoti tyopiki takɨmanaunkunuma uiti tɨkañe axɨbama yaɨtoxɨma.

²⁹Tyopiki axɨna toxio tɨkañe uiti Tupax chanantopɨ aikiaɨbuti tato, champɨityo nityakɨru yatasukuxti.

³⁰Axañointyo tɨkañe chapakokonaunkapɨ ɨmoti Tupax, tapɨ kaɨma ui axɨna chɨmakokonaumpɨma axɨbama judíos, axti Tupax pukɨrusuti autaku.

³¹Saneityo kaɨma, axɨma chɨmakokonaumpɨma, ta nauki apukɨruti Tupax autaku, nauki kaɨma aupukɨruka tyakuma.

³²Tyopiki axti Tupax namanaiña chɨmakokonaumpɨma uiti, nauki sane apukɨruti tyaku namanaiña.

³³¡Champɨ takanache axɨna nenaxixhti Tupax, chepe nipiakaxti chepetyo ñapanaunkuxti! Champɨti ɨmoche atusi nixhantɨmoti, champɨtityo iyebo uiti ñana asuputanenti nikutubiuxti.

³⁴“¿Ñakuti naki isuputakaiti ñakionkoxti Yɨriabux? ¿Ñakuti naki uiche aiñununekanati?

³⁵¿Ñakuti naki makumananati tɨkañe ɨmoti, nauki kaɨma akumanati tato ɨmoti?”

³⁶Tyopiki nisamukuxti, ɨmoti nanaiña axɨba abe iku axɨna kɨx. ¡Taikiana yarusɨrɨxti Tupax au napes! Amén.