Read Chiquitano ROMANOS 13 Bible Online

ROMANOS 13 - Chiquitano bible

ROMANOS 13

¹Tari namanaiña akokonauma ɨmo mayɨriabuka, tyopiki namanaiña mayɨriabuka sɨroma ui noñemaxti Tupax, axɨbama aboma kaɨma sɨroma ui noñemaxti.

²Sane naukiche axti naki chɨmakokonauntipɨ ɨmoti yɨriabux, chɨmakokonauntipɨ ɨmo yakɨpukuxti Tupax. Axɨbama chixhanxɨpɨma aikokoma nɨriakax toxio ñana ityakisɨrɨkɨboma.

³Tyopiki axɨbama mayɨriabuka chabomapɨ nauki namanaiñantai aixhuma ñɨnanama axɨbama uxia nisɨborikixhimia, ta axɨbama chuxiampɨ nisɨborikixhimia. ¿Axianka uxia nasɨboriki aɨbuti yɨriabux? Aisamuse axɨna uxia, sane axti yɨriabux uxia uiti aemo.

⁴Tyopiki baserebioti ɨmoti Tupax atakukɨ nauki uxia nasɨboriki. Axtɨ aisamute axɨna chuxiampɨ, tari uixh kaɨma aixhuka ñɨnanati. Tyopiki chɨmunataipɨ ane mekuti nɨriakaxti tyopiki anati baserebioti ɨmoti Tupax, nauki acheti ityakisɨrɨkɨboti axti naki koñotɨ ɨmoti.

⁵Sane naukiche apakokonau ɨmo axɨbama mayɨriabuka, tapɨ apisamute ui axɨna naupixhuku apisamuse ui nauxianka ɨmo axɨna uxia.

⁶Tyopiki axɨna sane axaño toxio aboi monixh. Tyopiki axɨbama mayɨriabuka aboma baserebioma ɨmoti Tupax, tyone yachɨkoimia.

⁷Apityoximia taikiana ɨmoti taman nanaiña axɨna toxiobo ɨmoti. Axtɨ anati naki ɨmoche auxianka apayura apityoximia ɨmoti, axtɨ anati naki ɨmoche apityoximia monixh apityoximia ɨmoti. Ɨmoti naki aukuasɨrɨka tari akuasɨrɨti aume, axti naki pukɨrusuti autaku aupukɨru tyakuti.

⁸Tapɨ abebeka ɨmoti kiatax, tyopiki abebeka naukuasɨrɨkɨ aumeampatoe. Tyopiki axti naki kuasɨrɨti ɨmoti isɨborisapataxti chauki tɨkokono uiti nanaiña axɨmanu bakɨpukux uiti Moisés.

⁹Axɨna yakɨpukuxti Tupax nantɨ: “Tapɨ ane kiatax paɨx obi, tapɨ atabaikia, tapɨ akusɨpɨka, tapɨ ubatio nenaxixhti kiatax.” Axɨba yochepe pikiataka bakɨpukuka kunauntaña monantɨ sane: “Tari akuasɨrɨti aemo asɨborisapa takana nakuasɨrɨkɨ aemoantoe.”

¹⁰Axti naki kuasɨrɨti ɨmoti isɨborisapataxti chisamutentipɨ axɨna chuxiampɨ ɨmoti, sane naukiche axtɨ uisamute axɨna uxia uisamute nanaiña axɨna yakɨpukuxti Tupax.

¹¹Au nanaiña axɨna sane amasasatɨ nuxia ñome axɨba naskɨbeka kaɨma usukarɨ, atusityo aume tiñatai mapakɨmunkutux nauki ostopɨ. Tyopiki axɨna nukaɨbuku eanaki nomɨnantɨ tɨsaimia pɨnanaki aukutanu naukiche aɨbo oñonkoi axɨba omixha manityakax.

¹²Chauki tɨkoboi axɨna tobixh tɨsaimia anene. Sane naukiche uiñokona axɨba nomɨnantɨ uisamute nesaxatoe axɨna tobixh, uiñana okɨtɨpɨ axɨba omixhia ui nanentax takana axtɨ tamanti sortabox koborioti.

¹³Uikoñokona nosɨboriki takana axtɨ usaka au sapes. Uiñokoniona axɨmanio yarusɨrɨka basapakax nantax aɨbu norisɨbakax, tapɨ apityoximiata naukɨtɨpɨ ɨmo nomɨnantɨ, tapɨ autɨborikia aumeampatoe tapɨ abubatio nenaxi makiataka.

¹⁴Chɨsanempɨ, apikoñoko nausɨboriki apisamuse axɨba omixhia takanati Yɨriabux Jesucristo, tapɨ chebo aboi ɨmo naukɨtɨpɨ nauki apisamune axɨba nomɨnantɨ.