Read Chiquitano ROMANOS 15 Bible Online

ROMANOS 15 - Chiquitano bible

ROMANOS 15

¹Namanaiña axɨbama ñemanauntu makokonauma basuriura takana axtɨ axoñɨ axɨna chimakokonaumpɨma nuxia, tapɨ uɨkatɨ isiu axɨna nuxiantɨmoantoe.

²Namanaiña axoñɨ uisamunena axɨna uxia ɨmoti osɨborisapa ipukɨnunkubuti nauki chepe oñɨ uisamune axɨna uxia.

³Tyopiki axti Cristo tɨkañe champɨityo axtɨ yapachetioti nauki uxia nisɨborikixhti ɨmotiatoe. Aɨbuti omixhante axɨmanu nantɨ iku Nikorox: “Axɨmanio nipɨnatema axɨmanuma unumakɨ sobi yasuriu.”

⁴Nanaiña axɨmanio ane korobo tɨkañe, korobo nauki tyone manunekanabo oemo, nauki taikiana uixh uxia numakionko saneityo baxɨpera kɨmenu axɨmanu ɨriotɨ oemo.

⁵Uiti Tupax, taikiana uxia napakionko tari uiti taikiana uxia nausɨboriki abaxɨpekuapatoe, takana nisɨborikixhti Jesucristo tɨkañe,

⁶nauki chepeaño, taman napanityaka, nauki apiñanaunuti Tupax, naki Yaɨtoti Yɨriabux Jesucristo.

⁷Ui axɨna sane, apasusiusaño aumeampatoe, takanati Cristo yasuriuruti año, nauki namanaiña aiñanaunumati Tupax.

⁸Axɨñɨ sukanañɨ aume axti Cristo kuatati tɨkañe nauki asaratitɨ tyakuma axɨbama judíos nauki uxiane axɨmanu ɨriotɨ tɨkañe uiti ɨmoma axɨbama uyaɨtaiki tɨkañe nauki sane atusi ta axti Tupax isamutenti axɨna ɨriotɨ uiti.

⁹Kuatatityo nauki axɨbama chɨtɨpɨ judíos anaumaintyo ɨmoti Tupax tyopiki nipukɨruxti tyakuma, takana nantɨ iku Nikorox: “Axɨñɨ uxia nisura ñana akɨtɨpɨkɨ axɨpekuma axɨbama chɨtɨpɨ judíos ñasonite ñana niyarusɨrɨkɨ nɨri.”

¹⁰Ane kiatax nantɨ iku Nikorox: “¡Aupukɨnu axɨbama chɨtɨpɨ judíos aɨbuma axɨbama aɨtoxti Tupax!”

¹¹Au kiatax narɨkɨkixh nantityo iku Nikorox: “Namanaiña mañoñɨnka ikuki axɨna kɨx namanaiñaintyo axɨbama chɨtɨpɨ judíos ¡apachampienka ɨmoti Tupax!”

¹²Nantityo sane ñakonomosoxti naki profeta Isaías: “Ityusiankanɨ ñana nityakɨbaɨtuxti Jesé, atɨraiti ñana nauki yɨriabuxti ɨmo mañoñɨnka ikuki axɨna kɨx, axɨma ñana onkomatɨ ɨmoti.”

¹³Axti Tupax naki uiche uxia numakionko, tari yachebati aupukɨnunkubu, taikiana axiaintyo uiti aume axaño axɨbama apikokokati, tari yachebati aukusɨubu ui noñemaxti Espíritu Santo.

¹⁴Masarukityaiki, axɨñɨ tusiu nuxia iñemo axaño ane aukɨtɨpɨ axɨna uxia axɨnaintyo napapanaunku apipiaka apanuneka aumeampatoe.

¹⁵Axɨñɨ xhakonomoka nantax aume nauki tapɨ takɨrusu napakionko iyo axɨna chauki tɨtusiu aume, isamute ui yakɨpukuxti Tupax tyopiki pukɨrusuti autaku.

¹⁶Nauki yaserebi ɨmoti Cristo Jesús nauki uxia nisɨborikixhimia axɨbama chɨtɨpɨ judíos, axɨna niyaserebiki ta nauki xhanuneka axɨba omixhia nuraxti Tupax nauki yɨrotɨ aɨbuma esati axɨbama chɨtɨpɨ judíos takana axɨna makumanatax uxia au ñakionkoxti, kurusɨo uiti Espíritu Santo.

¹⁷Ane tyopikiche taruku nipukɨnunku aɨbuti Jesucristo ta tyopiki axɨna yaserebikia ɨmoti Tupax,

¹⁸tyopiki axɨñɨ chɨtɨpɨ kiatax nisura, xhanityaka axɨna isamutenti Cristo saɨbuñɨ nauki axɨbama chɨtɨpɨ judíos aikokoma yakɨpukuxti Tupax. Tyone uxiante sobi oboi nixhanunekaka takanaintyo ui nisɨboriki,

¹⁹oboi axɨba champɨ tastaimia omixhante, uityo nikusɨu nesaxti Espíritu axti Tupax. Sane naukiche aukiapae Jerusalén xhanunekaka axɨba nuraxti Cristo au nanaiña axɨba poka tyupeku iñatai au Ilírico au nanaiña xhanunekaka axɨba omixhia nuraxti Cristo.

²⁰Taikiana ixhanka yɨrotɨ xhanuneka axɨba omixhia manityakax axɨna kauta champɨ tonkoimia nɨrixhti Cristo, tapɨ ikuñekata yachɨkoiti kiatax.

²¹Takana axɨna ane korobo iku Nikorox: “Astaimia ñana axɨbama champɨ tɨtusiu ɨmoma nɨrixhti. Ipiakama ñana axɨbama champɨ tonkoimia nɨrixhti.”

²²Tyopiki nanaiña axɨna sane chichebopɨ iñemo yɨrotɨ tanu yasaraño, ane auche ixhanka yɨrotɨ tanu.

²³Tapɨ kaɨma axɨna tɨchauki sobi niyachɨkoi au axɨna kɨx, tɨsɨrɨmana naskɨbeka nixhanka yɨrotɨ tanu yasaraño,

²⁴axtɨ niyɨkɨ au España ixhanka yɨrotɨ tanu. Axtɨ tiyasakaño, champɨ nɨmoche axtɨ ñome mantukubatai naneneka, ixhanka amekatɨ saɨbuñɨ axɨna kauta niyɨkɨ.

²⁵Tapɨ kaɨma yɨkatɨ au Jerusalén, nauki yasarama axɨbama ikokoromati Jesús ta'a.

²⁶Tyopiki axɨbama auki Macedonia aukityo Acaya auki noñemaxɨmantoe makiamanama ñakumanataboma ɨmoma axɨbama usarukityaiki taruku nityakisɨrɨkɨxɨma auki Jerusalén.

²⁷Isamutema sane auki noñemaxɨmantoe, tyopiki ñemanauntu axɨma tyone yachɨkoboiboma aisamunema, tyopiki sane takana axɨbama judíos ikokoromati Tupax chepesɨro uimia nenaxixhimia auki napes aɨbuma axɨbama chɨtɨpɨ judíos, anentyo uimia aɨbu nenaxixhimia ikuki axɨna kɨx aɨbuma axɨbama judíos ikokoromati Tupax.

²⁸Sane, axtɨ tɨtakɨrusu sobi axɨna niyachɨkoi, axtɨ tɨtoxio sobi ɨmoma axɨmanu makumanatax, auki kaɨma yɨkatɨ au España, auki niyɨkɨ yɨkatɨ tanu yasaraño.

²⁹Tusiu iñemo axtɨ yɨkatɨ tanu aubesa, uxia ñana nusaka namanaiña tyopiki ukurusɨka uiti Cristo.

³⁰Masarukityaiki, tyopikiti Yɨriabux Jesucristo tyopikityo axɨna nukuasɨrɨkɨ ɨmoti Espíritu Santo, apasamu nuxia iñemo amea chakuñɨ ɨmoti Tupax.

³¹Apanki pɨnanakiti Tupax tapɨ ane kausane uimia iñemo axɨbama chikokoromatipɨ auki Judea, nauki axɨna makumanatax sɨrotɨ sobi ɨmoma axɨbama usarukityaiki auki Jerusalén asuriuma aɨbu nipukɨnunkuxɨma,

³²nauki axtɨ ui noñemaxti Tupax, iñanai tanu aubesa yasaraño sane ñakansa aɨbu nipukɨnunku.

³³Tari axti naki Tupax taikiana uxia uiti sɨsioti abaxɨpeku. Amén.