Read Chiquitano ROMANOS 16 Bible Online

ROMANOS 16 - Chiquitano bible

ROMANOS 16

¹Au nisɨri amasasatɨ tyaku nokiasi Febe, tyone baserebio ɨmoma axɨbama ikokoromati Tupax auki Cencrea.

²Apasusiu au nɨrixhti Yɨriabux, takana axtɨ uisamute uyaxɨpeku axɨbama uikokokati Jesús, apityoximia ɨmo nanaiña axɨna champɨ uixh, tyopiki tyone sane uixh ɨmo makiataka, takanaintyo iñemo.

³Aburasoi nixhakionko tanu ɨmoti Priscila ɨmotityo Áquila, tyonema axɨbama amonkoma chepeñɨ ɨmo niyaserebiki ɨmoti Jesucristo.

⁴Chɨkuasɨrɨpɨ ɨmoma nisɨborikixhimia tyaku nisɨboriki, chɨtɨpɨ axɨñantai ñachampienkaka ɨmoma, ta namanaiña axɨbama usarukityaiki ikokoromati Jesús, axɨbama chɨtɨpɨ judíos.

⁵Aburasoityo nixhakionko ɨmoma axɨmanuma ikokoromati Jesús iyoberabaramakɨ nantax au nipoxti Prisca autyo nipoxti Áquila. Aburasoityo nixhakionko ɨmoti ichurapa Epéneto ta tyonenti naki kusɨrɨboti aikokoroti Cristo au axɨmanu kɨx Asia.

⁶Aburasoi nixhakionko ɨmo Mariax, tyone taruku nonxɨkɨx tɨkañe autaku.

⁷Aburasoi nixhakionko ɨmoti Andrónico ɨmotityo Junias, tyonema axɨbama isarukiboñɨ tyonemaintyo amonkoma amanamampo chepeñɨ. Axɨma taruku nikuasɨrɨkɨxɨma axɨpekuma axɨbama apóstoles, kusɨrɨbomaintyo aikokoromati Cristo xhopɨnanakiñɨ.

⁸Aburasoi nixhakionko ɨmoti Amplias, axti naki ichurapa au nɨrixhti Yɨriabux.

⁹Aburasoi nixhakionko ɨmoti Urbano naki anankati ochepe ɨmo axɨna nubachɨkoi ɨmoti Cristo, ɨmotityo ichurapa Estaquis.

¹⁰Aburasoi nixhakionko ɨmoti Apeles, axti naki sɨroti au sɨrɨmana makokotoka ityopiki axɨna ikokoroti Cristo. Ɨmointyo axɨbama aɨtoxti nikɨpostoti Aristóbulo.

¹¹Aburasoityo nixhakionko ɨmoti Herodión, axti naki isarukibo. Ɨmointyo axɨbama masarukityaiki au nipoxti Narciso axɨbama ikokoromati Yɨriabux.

¹²Nixhakionkoityo tanu ɨmoti Trifena ɨmotityo Trifosa, axɨma baserebioma ɨmoti Yɨriabux. Ɨmo Pérside, taruku niyaserebikixh ɨmoti Yɨriabux.

¹³Aburasoityo nixhakionko ɨmoti Rufo axtityo ikokoroti nuxia Yɨriabux, ɨmo nipiakɨtoti, tyone tɨkañe takana nipiakɨatoe.

¹⁴Nixhakionkoityo ɨmoti Asíncrito, ɨmoti Flegonte, ɨmoti Hermes, ɨmoti Patrobas, ɨmoti Hermas, ɨmointyo axɨbama makiataka isarukityaiki, aboma akamanu chepema.

¹⁵Aburasoityo nixhakionko ɨmoti Filólogo ɨmo Julia, ɨmoti Nereo ɨmointyo nikiastyoti, ɨmoti Olimpas ɨmoma namanaiña axɨbama masarukityaiki ui axɨna numakokonaunku axɨbama aboma chepema.

¹⁶Apanki aumeampatoe aɨbu napatañumeki. Namanaiña axɨbama ikokoromati Cristo aukina ñakionkoxɨma tanu aume.

¹⁷Masarukityaiki, amasasai nuxia ñɨnana axɨbama kiatax ñapanaunkuxɨma iñatama ñakokotoxɨma axɨna uiche apiñanaño pese pɨnanaki axɨna manunekatax apasutiu. Apikiaɨbusaño axɨpekukimia,

¹⁸tyopiki chɨbaserebiopɨma ɨmoti Yɨriabux Jesucristo, ta ɨmoantai axɨna nixhantɨmoma, oboi axɨba kɨsumañantai nuraxɨma ikoñokotama nuxia ñanityakaxɨma matachemakanama ɨmoma axɨbama chɨtusiupɨ ɨmoma.

¹⁹Ɨmo namanaiña tusiu axɨna napakokonaunku. Ipukɨnunka ui axɨna apisamute, ixhanka nauki apityusianka napapanaunku nauki apisamune axɨba omixhia.

²⁰Sane axti Tupax naki uiche uxia nabaka konto ñana sɨroti chobores uiti ñokiana naupope. Tari uiti ikunusɨankanati año axti Yɨriabux Jesucristo.

²¹Ñakionkoxti Timoteo tanu aume, axti naki yachɨkoisapa. Ñakionkoxtityo tanu aume axti Lucio axti Jasón axti Sosípater, axɨbama isarukibo.

²²Axɨñɨ Tercio, tyonenti naki makonomono, nixhakionko tanu aume au nɨrixhti Yɨriabux.

²³Ñakionkoxtityo Gayo tanu aume. Axɨñɨ yaka auna nipoxti, axɨna ityoximiatati kauta aiyoberabaramakɨ nantax axɨbama ikokoromati Jesús. Ñakionkoxtityo tanu aume axti Erasto, axti naki mekuche naka nimonixhimia axɨbama po'oso axtityo usaruki Cuarto ñakionkoxti tanu aume.

²⁴Tari aukurusɨka uiti Yɨriabux Jesucristo namanaiña año. Amén.

²⁵Omixhia numanityaka kɨtɨpɨti Tupax, axti naki uiche ane naukusɨu takana axɨba omixhia nixhanunekaka axɨnaintyo manunekakax kɨtɨpɨti Jesucristo. Tyone sɨro isiuki axɨna tusiankana uiti Tupax axɨna ananka anekana uiti, tyone ananka anekana aukiapae tɨkañe naukiche chuxiantenkipɨ axɨna kɨx,

²⁶tapɨ kaɨma tusiankana oboi ñakonomosoxɨma axɨbama profetas, takana yakɨpukuxti Tupax naki champɨ nityakɨru nisɨborikixhti. Axɨna ananka anekana nixhantɨmoti Tupax tusiankana sukarɨ namanaiña iku axɨna kɨx nauki aikokoma naukityo aisamunema.

²⁷¡Ɨmoti Tupax naki kunauntañati taruku ñapanaunkuxti, tari ɨmoti manaunkux ñome nanaiña naskɨbeka, tyopikiti Jesucristo! Amén.