Read Chiquitano ROMANOS 4 Bible Online

ROMANOS 4 - Chiquitano bible

ROMANOS 4

¹Ui axɨna sane, ¿isane iyebo uiti Abraham naki uyaɨ?

²Ñemanauntu, axtɨ axti Abraham toxiopɨ ɨmoti niyukuax axɨmanio omixhia isamutenti, anempɨ ityopiche onkotitɨ ɨmotiatoe, champɨ nɨmoche axtɨ chɨsukarɨtipɨ Tupax.

³Tyopiki nantɨ iku Nikorox: “Axti Abraham ikokotati nuraxti Tupax, sane naukiche axti Tupax ixhimiakatati axɨmanio nomɨnantɨ uiti.”

⁴Axtɨ anati naki ane yachɨkoiti, axɨmanu nikuax chɨtoxiopɨ ɨmoti ityobo takana makumanatax ta takana axtɨ ityobo nebekixhti.

⁵Tapɨ axtɨ anati naki ikokoroti Tupax, naki uiche besɨro nisɨborikixhti naki taruku nomɨnantɨ uiti, champɨ nɨmoche axtɨ chisamutentipɨ axɨna uxia isiukiche apukɨruti tyakuti.

⁶Axtityo David urapoiti tɨkañe axɨna taruku nipukɨnunkuxti naki tyopiki axti Tupax champɨ nɨmoche uiti axɨba omixhante uiti.

⁷Nanti David: “¡Tari taruku nipukɨnunkuxɨma axɨbama ane maximiakatax ɨmoma uiti Tupax champɨityo nɨmoche uiti nomɨnantɨ uimia!

⁸¡Tari taruku nipukɨnunkuxti naki champɨ nɨmoche uiti Tupax nomɨnantɨ uiti!”

⁹¿Ensapɨ axɨmanu pukɨnunkux ɨmomantai axɨbama circuncidaboma, o ɨmoma axɨbamaintyo chɨcircuncidabopɨma? Tɨsukanañɨ axti Abraham uxia nastaxti Tupax ɨmoti ityopiki ñakokonaunkuxti besɨro nɨsɨborikixhti uiti.

¹⁰¿Auche tɨkañe champɨ nɨmoche uiti Tupax axɨna nomɨnantɨ uiti Abraham? ¿Naukiche tɨcircuncidaboti o kusɨrɨbo? Chɨsanempɨ, ta kusɨrɨbo.

¹¹Pɨrɨkɨ nanaiña axti Abraham circuncidaboti, uixh atusi ta uxia nisɨborikixhti au nastaxti Tupax ityopiki ñakokonaunkuxti. Sane naukiche axti Abraham, tyonenti yaɨtoxɨma namanaiñama axɨbama ikokoromati Tupax, champɨ nɨmoche axtɨ chɨcircuncidabopɨma. Sane axti Tupax champɨ nɨmoche uiti axɨmanu tɨkañe chuxiampɨ nisɨborikixhimia.

¹²Axti Abraham tyonentityo yaɨtoxɨma axɨbama tɨcircuncidaboma, sɨsioma aɨbu ñakokonaunkuxɨma axɨbama uyaɨtaiki tɨkañe, axɨna ñakokonaunkuxti aukiapae naukiche tɨkañe chɨcircuncidabotikipɨ.

¹³Axti Tupax ɨriotɨ tɨkañe uiti ɨmoti Abraham ɨmomaintyo axɨbama aɨtoxti ta toxio ñana ɨmoma nanaiña axɨna kɨx enaxiboma. Axɨmanu ɨriotɨ tɨkañe chɨtɨpɨ nauki aisamunema axɨmanu bakɨpukux uiti Moisés, ta ityobo axɨna uxia isamutema ui ñakokonaunkuxɨma.

¹⁴Axtɨ axɨbama ɨmoche atoxi ñana axɨna kɨx onkomatɨapae ɨmo axɨmanu bakɨpukux uiti Moisés, axɨmanu makokonaunkux champɨ nanenekiche tapɨ axɨmanu ɨriotɨ uiti Tupax champɨ nanenekiche.

¹⁵Axɨmanu bakɨpukux uiti Moisés kuatɨ uixh chɨrɨri, tapɨ axɨna kauta champɨ bakɨpukux uiti Moisés, chɨtusiupɨ axtɨ ane nuipɨnate.

¹⁶Sane naukiche, axɨmanu ɨriotɨ ɨmoti Abraham tɨkañe nauki kaɨmainki ane bakɨpukux uiti Moisés ɨmoma axɨbama aɨtoxti, tyone makumanatax ityobo axɨna makokonaunkux. Axɨmanu ɨriotɨ chɨtɨpɨ ɨmo axɨbamantai isamutema bakɨpukux uiti Moisés, ta ɨmoma axɨbamaintyo makokonauma, takanati Abraham. Tyopiki axɨna sane tyonenti uyaɨ namanaiña axoñɨ,

¹⁷takana nantɨ iku Nikorox: “Sobi kaɨma yaɨtoxɨmakɨ ñamanaiña axɨbama ikuki axɨna kɨx.” Tyonenti naki Tupax, naki ɨmoche akokonaunti Abraham, axti naki Tupax, uiche sɨborikoma tato axɨbama tɨkoiñoma, axtityo naki masamunuti nanaiña axɨna champɨ iku axɨna kɨx.

¹⁸Naukiche champɨki nɨmoche onkotitɨ, axti Abraham ityopiki ñakokonaunkuxti auki ane tatityo ɨmoche onkotitɨ, sane naukiche tyonenti “yaɨtoxɨma namanaiña axɨbama iku axɨna kɨx”, takana nanti Tupax ɨmoti: “Sane nububikixhimia ñana axɨbama aɨtaiki.”

¹⁹Axti Abraham aruku nuxia ñakokonaunkuxti, champɨ nɨmoche niyarusɨrɨkɨxti tɨniyɨkɨx ñome cien naskɨbeka tusiu ɨmoti takanaintyo nikɨpostoti Sara tɨsaimia atakɨru nisɨborikixhimia tɨtarukapae niyarusɨrɨkɨxɨma nauki anati aɨtoxɨma.

²⁰Chɨkiataxɨpɨ ñakionkoxti ui axɨmanu ɨriotɨ uiti Tupax ɨmoti, ta uixh isumainkianɨ axɨmanu ñakokonaunkuxti. Auki machampienkanati ɨmoti Tupax,

²¹tusiu nuxia ɨmoti ta axti Tupax ane nɨriakaxti nauki aisamunenti axɨna ɨriotɨ uiti.

²²Sane naukiche axti Tupax takɨrusu ñakionkoxti iyo axɨna nomɨnantɨ uiti uixh uxia tato nisɨborikixhti.

²³Axɨmanu nantɨ sane iku Nikorox chɨtɨpɨ ɨmotiatai Abraham, axɨmanu moximiakana nomɨnantɨ.

²⁴Saneityo korobo oemo iku Nikorox. Axti Tupax yasutiuti axɨna numakokonaunku axtɨ uikokokati naki uiche asɨboriti tato Yɨriabux Jesucristo,

²⁵axti naki koiñoti ityopiki nomɨnantɨ osoi sɨborikoti tato nauki ane maximiakatax ñome axɨba nomɨnantɨ osoi.