Read Chiquitano ROMANOS 5 Bible Online

ROMANOS 5 - Chiquitano bible

ROMANOS 5

¹Axti Tupax, chauki tɨbesɨro uiti nosɨboriki, ui numakokonaunku, taikiana uxia osoi oemantoe aɨbuti Tupax, ityopikiti Yɨriabux Jesucristo.

²Ityopikiti Jesucristo uɨkatɨ tato saimia esati Tupax ui numakokonaunku, nauki upukɨnu ui nukuasɨrɨkɨ ɨmoti, sane chuɨkapɨtɨ isiu kiatax mapanaunkux, sane upukɨnunka tyopiki iyebo ñana osoi esati Tupax.

³Chityoneantaipɨ, upukɨnunkaityo oboi nutakisɨrɨkɨ. Tyopiki tusiu oemo ui axɨna nutakisɨrɨkɨ chuɨkapɨtɨ isiu kiatax mapanaunkux,

⁴ui axɨna chuɨkapɨtɨ isiu kiatax mapanaunkux, uixh uxia nosɨboriki au nastaxti Tupax ityopiki ñana iyebo osoi esati Tupax.

⁵Axɨmanu iyebo ñana osoi esati Tupax, chɨtɨpɨ mapankax, ityopiki axti Tupax auki noñemaxti Espíritu Santo axɨna nuyausasɨ isamute nanaiña axɨba omixhia.

⁶Naukiche tɨkañe chuipiakapɨ uisamune axɨna uxia utakuatoe, axti Cristo koiñoti tapɨ oñensoka yotopiki axɨba taruku nomɨnantɨ osoi.

⁷Champɨti naki ichɨbotiyɨ nauki aityabairomati ityopikiti kiatax. Champɨtityo naki ityoximianatiyɨ ɨmo nikonkoxti tyakuti naki champɨ nipɨnatenti. Buiche axtɨ anati naki ityoximianatiyɨ ɨmo nikonkoxti tyakuti naki masamunuti ɨmoti tɨkañe axɨna yarusɨrɨx uxia.

⁸Axti Tupax ityusiankatati axɨna taruku nukuasɨrɨkɨ ɨmoti, naukiche tɨkañe taruku nomɨnantɨ osoi axti Cristo koiñoti otopiki.

⁹Tapɨ kaɨma axɨna uxia nosɨboriki uiti Tupax auki nikonkoxti Jesucristo. Sane naukiche utaesɨbuka ñana pɨnanaki nutakisɨrɨkɨ tyopikiti.

¹⁰Tyopiki axti Tupax naukiche tɨkañe chiyaupɨ nomɨnantɨ osoi ɨmoti, ane maximiakatax uiti oemo ityopiki nikonkoxti Aɨtoxti, sane naukiche uxia uiti Tupax oemo ityopiki nisɨborikixhti.

¹¹Chɨtɨpɨ tyoneantai, ta upukɨnunkaityo aɨbuti Tupax ityopikiti Yɨriabux Jesucristo, uiti Jesucristo basutiu kaɨma axɨna uxia tato uiti Tupax oemo.

¹²Axɨna nomɨnantɨ iku axɨna kɨx kuatɨ aukiti tamanti ñoñɨnx tɨkañe, isiuki axɨmanu nomɨnantɨ kuatityo konkox, sane iñatai ɨmo namanaiña tyopiki namanaiña ane nomɨnantɨ uimia.

¹³Kɨmenu axɨmanu bakɨpukux uiti Moisés tɨkañe, tɨtane nomɨnantɨ iku axɨna kɨx. Axɨna nomɨnantɨ chɨtusiupɨ axtɨ champɨ axɨmanu bakɨpukux.

¹⁴Chɨsanempɨ, aukiapae tɨkañe naukiche anati Adán ichepe niyekixhti Moisés, axɨna konkox ane nɨriakax kɨtɨpɨma axɨbama isamutema nomɨnantɨ, axɨna nomɨnantɨ uimia chɨtɨpɨ ityopiki axɨna chɨmakokonaumpɨma ɨmo bakɨpukux, takana axɨmanu isamutenti Adán, tyonentiatoe takanati maniki kuabotɨ ñana.

¹⁵Axɨmanu nipɨnatenti Adán, chɨchepekanapɨ ichepe axɨna ñakumanataxti Tupax oemo. Ui nomɨnantɨ uiti tamanti ñoñɨnx sɨrɨmanama koiñoma. Tapɨ axɨmanu ñakumanataxti Tupax toxio uiti oemo axɨmanu champɨ ityoboche aukiti tamanti ñoñɨnx, axti Jesucristo taruku niyarusɨrɨkɨx tyaku namanaiña.

¹⁶Axɨna nomɨnantɨ uiti tamanti ñoñɨnx chichepekanapɨ aɨbu ñakumanataxti Tupax. Ityopiki ui tamanti ñoñɨnx kuatɨ konkox iku axɨna kɨx. Tapɨ ñakumanataxti Tupax, eanaki taruku nomɨnantɨ, uxia nastaxti Tupax ɨmo mañoñɨnka.

¹⁷Ui ñatompɨkakaxti tamanti ñoñɨnx ane okɨtɨpɨ nɨriaka konkox, saneityo ñana ane taruku nupukɨnunku axtɨ iyebo osoi au nanentax tyopikiti Jesucristo, namanaiña axɨbama yasutiuma ñana axɨna nipukɨruxti Tupax uitityo axɨna uxia nisɨborikixhimia.

¹⁸Sane takana axɨmanu nomɨnantɨ uiti Adán kuatɨ konkox uixh ɨmo namanaiña mañoñɨnka, saneityo axɨmanu uxia isamutenti Jesucristo uixh uxia nisɨboriki namanaiña mañoñɨnka nauki aye uimia isɨborikiboma.

¹⁹Sane takana ui axɨna niñatompɨkakaxti tamanti ñoñɨnx, sɨrɨmanama axɨbama tapenekoma au nomɨnantɨ. Saneityo takana ui ñakokonaunkuxti tamanti ñoñɨnx, sɨrɨmanama ñana axɨbama uxia nisɨborikixhimia.

²⁰Axɨmanu bakɨpukux uiti Moisés toxio nauki aisumainkianɨ axɨmanu nomɨnantɨ. Naukiche axɨmanu nomɨnantɨ tɨsɨrɨmanax, axti Tupax ityusiankatati axɨna taruku nipukɨruxti.

²¹Sane takana axɨmanu nomɨnantɨ ane nɨriakax kuatɨ uixh konkox, saneityo nipukɨruxti Tupax ane nɨriakax nauki uxia nosɨboriki ɨmo nanaiña naskɨbeka uiti Yɨriabux Jesucristo.