Read Chiquitano ROMANOS 6 Bible Online

ROMANOS 6 - Chiquitano bible

ROMANOS 6

¹¿Isane kaɨma usurapoboibo? ¿Sɨsio oñɨ uisamune axɨba nomɨnantɨ, nauki axti Tupax aityusiankati taruku nipukɨruxti utaku?

²¡Chɨsanempɨ! Axoñɨ chauki tokonka ɨmo nomɨnantɨ. ¿Kausane sɨsio oñɨ uisamune nomɨnantɨ?

³¿Chɨtusiupɨ aume naukiche osɨrikia chauki tiyebo osoi esati Cristo Jesús, sane okonka chepe nikonkoxti?

⁴Ui axɨna osɨrikia uɨkatityo kɨtu ichepeti Cristo, okonka nauki osɨbori tato sane kiatax tato nosɨboriki. Sane takanati Jesucristo sɨborikoti tato ui noñema niyarusɨrɨkɨxti Yaɨtoti.

⁵Axtɨ usaka chepeti Jesús ɨmo nikonkoxti, saneityo usaka chepeti axtɨ sɨborikoti tato.

⁶Tusiu oemo axɨna nosɨboriki tɨkañe takubaxio kɨtɨpɨ kurusɨx chepeti Jesucristo, nauki ako axɨmanu nomɨnantɨ okɨtɨpɨki nauki tapɨ uisamutenki nomɨnantɨ.

⁷Tyopiki axtɨ okonka axɨmanu nomɨnantɨ osoi chɨsɨsiopɨ okɨtɨpɨ.

⁸Axtɨ okonka chepeti Jesús, ñemanauntu osɨborikia chepeti.

⁹Tusiu oemo axti Jesús, naukiche sɨborikoti tato, chanantopɨ akonti tatityo. Axɨmanu konkox champɨki nɨriakax kɨtɨpɨti.

¹⁰Axti Cristo naukiche koiñoti aɨbu axɨmanu nomɨnantɨ osoi chanantopɨ akonti tatityo. Axtɨ sɨborikoti tato, sɨborikoti ɨmoti Tupax.

¹¹Saneityo axaño apisamuse takana axtɨ aukonka aɨbu nomɨnantɨ aboi, tapɨ ɨmoti Tupax ausɨborikia chepeti Cristo Jesús.

¹²Tapɨ chebo aboi ɨmo nomɨnantɨ nauki sɨsio aukɨtɨpɨ sane uixh apisamukio axɨba chomixhampɨ nixhantɨmo naukɨtɨpɨ.

¹³Tapɨ apityoximiata naukɨtɨpɨ ɨmo nomɨnantɨ, nauki uixh aisamune axɨna chuxiampɨ. Apityoximia tyone ɨmoti Tupax, takanati naki tɨkoiñoti ta sɨborikoti tato, apityoximiaintyo naukɨtɨpɨ axɨna uiche aisamune axɨna uxia au ñakionkoxti.

¹⁴Sane axɨmanu nomɨnantɨ champɨki nɨriakax aume, ityopiki chɨtɨpɨ ui napakokonaunku ɨmo bakɨpukux uiti Moisés, ta ui nipukɨruxti Tupax.

¹⁵¿Kausane niyɨkɨx? ¿Uisamukio axɨba chomixhampɨ tyopiki chuisamutempɨ bakɨpukux uiti Moisés, ta uisamute noñemaxti Tupax? ¡Chɨsanempɨ!

¹⁶Axaño tusiu nuxia aume axtɨ apityoximiakaño nauki apaserebi ɨmoti taman ñoñɨnx, kumanakax año ɨmoti maniki ɨmoche apaserebikia. Axɨna sane, ta axtɨ apakokonaunka ɨmo nomɨnantɨ, axɨna uiche amekatɨ ɨmo naukonko, tapɨ axtɨ apakokonaunka ɨmoti Tupax uxia nausɨboriki.

¹⁷Chapie ɨmoti Tupax, tɨkañe axaño kumanakax año ɨmo nomɨnantɨ, kaɨma chauki tapikokota axɨmanu uxia manunekatax aume.

¹⁸Axtɨ tautaesɨbuka pɨnanaki nomɨnantɨ, axaño apaserebikia ɨmo axɨna uxia.

¹⁹(Xhanityaka takana nuraxtiatai ñoñɨnx, tyopiki axaño chiyebopɨ aboi axɨna sane.) Sane takana tɨkañe apityoximiata naukɨtɨpɨ ɨmo axɨna chuxiampɨ nauki apisamune axɨna nomɨnantɨ, apityoximiaintyo kaɨma naukɨtɨpɨ ɨmo axɨna uxia, nauki apisamune nausɨboriki isiuki axɨna besɨro.

²⁰Naukiche tɨkañe kumanakaxɨki año oboi nomɨnantɨ, champɨ nɨmoche aboi axɨna uxia.

²¹¿Isane axɨna iyebo aboi? Kaɨma aukɨsoka tyaku axɨna sane, tyopiki oboi apikianaño ɨmo konkox.

²²Tapɨ kaɨma, tautaesɨbuka pɨnanaki nomɨnantɨ, apaserebikia kaɨma ɨmoti Tupax. Apisamute axɨna uxia ɨmoti. Au nityakɨrux iyebo aboi au napes, kauta champɨ nityakɨru nausɨboriki.

²³Axɨna bapakatax toxio ui nomɨnantɨ, tyone axɨna konkox, tapɨ axɨna ñakumanataxti Tupax tyone axɨna nosɨboriki ɨmo nanaiña naskɨbeka chepeti Jesucristo axti Yɨriabux.