Read Chiquitano ROMANOS 7 Bible Online

ROMANOS 7 - Chiquitano bible

ROMANOS 7

¹Masarukityaiki, axaño ausuputakai bakɨpukux uiti Moisés, axɨmanu bakɨpukux ane nɨriakax ɨmoti naki sɨborikotiki.

²Uichepekana, taman paɨx axtɨ poso ane isiuti ikiana ui taman bakɨpukux axtɨ sɨborikotiki. Tapɨ axtɨ koiñoti ikiana, axɨmanu paɨx champɨki uiche ane isiuti ikiana.

³Tapɨ axtɨ sɨborikotiki ikiana sɨrotɨ isiuti kiatax ñoñɨnx, ane nipɨnate aɨbuti ikiana, tapɨ axtɨ koiñoti ikiana, axɨmanu paɨx champɨki nɨriaka bakɨpukux ɨmo axtɨ sɨrotɨ isiuti kiatax ñoñɨnx, champɨ nipɨnate.

⁴Saneityo axaño, masarukityaiki, naukiche abaka chepeti Jesucristo aukonka chepeti ɨmo axɨmanu bakɨpukux uiti Moisés, nauki sɨsio año chepeti kiatax, axti maniki sɨborikoti tato. Sane uisamute axɨba omixhia ɨmoti Tupax.

⁵Naukiche osɨborikiaiki yupu axɨba nomɨnantɨ, axɨmanu bakɨpukux uiti Moisés uixh aistopɨna nokɨtɨpɨ nauki uisamunio axɨba chomixhampɨ, axɨna iyebo osoi ityobo tyone nokonko.

⁶Tapɨ kaɨma okonka ɨmo axɨmanu bakɨpukux uiti Moisés amonko oñɨ tɨkañe kiana nɨriakax, sane nauki baserebi ɨmoti Tupax aɨbu axɨna uxia nosɨboriki ui noñemaxti Espíritu Santo champɨki axtɨ isiuki axɨmanu nanankax bakɨpukux.

⁷¿Usukana oñɨ kaɨma axɨna bakɨpukux uiti Moisés tyone axɨna nomɨnantɨ? ¡Chɨsanempɨ! Axɨñɨ chisuputakaipɨ axɨmanu nomɨnantɨ ta ui axɨna bakɨpukux uiti Moisés. Champɨityo axtɨ tusiu iñemo axtɨ xhubatio nenaxixhti kiatax, axtɨ chɨnampɨtɨ axɨmanu bakɨpukux uiti Moisés: “Tapɨ ubatio nenaxixhti kiatax.”

⁸Tapɨ axɨmanu nomɨnantɨ ikuñekata axɨmanu bakɨpukux nauki isamune nanaiña axɨba chomixhampɨ. Tyopiki axtɨ champɨ bakɨpukux uiti Moisés, axɨmanu nomɨnantɨ ta takana axtɨ chuisamutempɨ.

⁹Tɨkañe isɨborikia chisuputakaipɨ bakɨpukux uiti Moisés. Naukiche iñatai axɨmanu bakɨpukux uiti Moisés. Axɨmanu nomɨnantɨ sɨboriko tato nuxia,

¹⁰uixh isonka. Sane axɨmanu bakɨpukux axɨna uichepɨ ane isiborikiboñɨ, ikianañɨ ɨmo nisonko,

¹¹ityopiki axɨmanu nomɨnantɨ ikuñekata axɨmanu bakɨpukux uiti Moisés uixh ichapeneka, uixhtyo isonka.

¹²Sane naukiche axɨmanu bakɨpukux uiti Moisés, champɨ nomɨnantɨ kɨtɨpɨ, uxia besɨro.

¹³Kausane kaɨma, ¿axɨna uxia ikianañɨ ɨmo nisonko? ¡Chɨsanempɨ! Axɨna nomɨnantɨ nauki aityusianka ta ñemanauntu chuxiampɨ, isonka uixh tyopiki ikuñekata axɨna uxia. Ui axɨmanu bakɨpukux manunekana axɨna tarukapae chuxiampɨ axɨmanu nomɨnantɨ.

¹⁴Tusiu oemo axɨna bakɨpukux ta ui noñemaxti Espíritu, tapɨ axɨñɨ champɨ narukux iñemo, sane naukiche yaserebikia ɨmo nomɨnantɨ.

¹⁵Axɨna isamute chɨtusiupɨ iñemo, chisamutempɨ axɨna nixhantɨmo isamune, tapɨ axɨna chuxiampɨ iñemo, tyone axɨna isamute.

¹⁶Axtɨ isamute axɨna chixhankapɨ isamune, uixh atusi iñemo axɨmanu bakɨpukux uiti Moisés ta besɨro.

¹⁷Sane naukiche, chaxɨpɨñɨ isamute axɨna chuxiampɨ, ta axɨmanu nomɨnantɨ ane sɨtɨpɨñɨ.

¹⁸Axɨñɨ tusiu iñemo champɨ sɨtɨpɨñɨ axɨna uxia. Ixhankapɨ isamune axɨna uxia, champɨ nisusɨu nauki isamune.

¹⁹Chisamutempɨ axɨna uxia ixhanka isamune, ta isamute axɨna chuxiampɨ, axɨna chixhankapɨ isamune.

²⁰Axtɨ isamute axɨna chixhankapɨ isamune, chɨsobipɨ isamune, ta ui axɨmanu nomɨnantɨ ane sɨtɨpɨñɨ.

²¹Kuatɨ au nixhakionko, ixhankapɨ isamune axɨna uxia, axɨmanuantai nomɨnantɨ ane sɨmenuñɨ.

²²Au niyausasɨ uxia iñemo bakɨpukux uiti Tupax,

²³tapɨ sɨtɨpɨñɨ yastai ane axɨna uiche tapɨ isamute axɨna uxia: tyone axɨmanu bakɨpukux ui nomɨnantɨ ane sɨtɨpɨñɨ, uixh champɨ noñemax isamune axɨna uxia.

²⁴¡Ichakisɨrɨkatai! ¿Ñakutipɨ uiche ichaesɨbu pɨnanaki nisonko axɨna ane sɨtɨpɨñɨ?

²⁵Ñachampienkaka ɨmoti Tupax ityopikiti Yɨriabux Jesucristo. Axɨñɨ tusiu iñemo uxia axtɨ ikokota yakɨpukuxti Tupax, tapɨ ui axɨna nisɨtɨpɨ yaserebikia ɨmo nomɨnantɨ.