Read Chiquitano 1 CORINTIOS 14 Bible Online

1 CORINTIOS 14 - Chiquitano bible

1 CORINTIOS 14

¹Apiña nuxia, nauki akuasɨrɨti kiatax aume, apankityo pɨnanakiti Tupax nauki acheti aume axɨna apachɨkoboibo ui noñemaxti Espíritu Santo, axɨnampae nauki apanuneka au noñemaxti Tupax.

²Axti naki manityanati auki pikiataka manityakaka, manityanati ɨmoti Tupax chɨmanityanatipɨ ɨmo mañoñɨnka, tyopiki champɨti iyebo uiti. Ui noñemaxti Espíritu Santo manityanati axɨba umanekanatai, ta champɨti iyebo uiti.

³Tapɨti naki manunekanati ui noñemaxti Tupax, manunekanati nauki namanaiña uxia nisɨborikixhimia, pukɨnuñama uxiaintyo ñakionkoxɨma uiti.

⁴Axti naki manityanati auki kiatax manityakax, manityanati tyakutiatoe. Tapɨti naki manunekanati au noñemaxti Tupax, manunekanati nauki namanaiña uxia nisɨborikixhimia axɨbama ikokoromati Jesús.

⁵Axɨñɨ ixhankatai namanaiña axaño apipiaka apanitya auki pikiataka manityakaka. Ta uxiampɨ nuxia iñemo axtɨ apanunekaka au noñemaxti Tupax. Tyopiki axti naki manunekanati ui noñemaxti Tupax yarusɨrɨx nakaxti pɨnanakiti naki manityanati pikiataka manityakaka, uxia axtɨ ipiakati anunekati auki axɨmanu manityakax nauki namanaiña axɨbama ikokoromati Jesús uxia nisɨborikixhimia.

⁶Supia, masarukityaiki, champɨ nanenekiche aume axtɨ yɨkatɨ tanu yasaraño nauki xhanitya aume auki kiatax manityakax, ¿isanempɨ iyebo aboi axtɨ chixhanityakapɨ aume axɨna nixhantɨmoti Tupax, takanaintyo axɨna ñemanauntu, nauki xhanunekaityo aume axɨna noñemaxti Tupax o pikiataka manunekatax?

⁷Axtɨ numanityaka tyone takana buxixh takanaintyo violín axtɨ champɨ kiatax nityañekixh, chɨtusiupɨ isane niñosonixh.

⁸Axtɨ ane baikixh yupu nikomesɨma, champɨti koborio axtɨ axɨmanu tosibixh chɨrabopɨtɨ nuxia isane nɨmoche.

⁹Saneityo axaño, axtɨ napanityaka chɨtusiupɨ nuxia isane axɨna aburapoi, ¿kausane atusi ɨmo makiataka axɨna auxianka aburaboi? ¡Apanityaka ɨmo makiɨtɨx!

¹⁰Sɨrɨmana manityakaka abe iku axɨna kɨx, nanaiña ane nuburapoi.

¹¹Axtɨ chɨtusiupɨ iñemo isane nurapoi axɨmanu manityakax, axɨñɨ takanati naki auki kiatax kɨx ɨmoti maniki manityanati iñemo isiuityo nakaxti iñemo.

¹²Sane naukiche, tyopiki axaño taruku nauxianka nauki atoxi aume noñemaxti Espíritu Santo, apiña nuxia nauki atoxi aume chama axɨba oboiche uxia nisɨborikixhimia axɨbama ikokoromati Jesús.

¹³Sane naukiche, axti naki manityanati auki kiatax manityakax, tari ñankirati pɨnanakiti Tupax nauki aipiati axɨmanu kiatax manityakax.

¹⁴Axtɨ xheanka auki kiatax manityakax, ñemanauntu axɨñɨ xheanka au niyausɨpɨ tapɨ axɨna nipiaka sɨsio champɨ nanenekiche.

¹⁵¿Kausane kaɨma sobi? Tari xheana ui niyausɨpɨ aɨbuityo nipiaka. Tari ñasonina aɨbu niyausɨpɨ takanaintyo aɨbu nipiaka,

¹⁶tyopiki axtɨ axɨkɨ uxia nura kɨtɨpɨti Tupax ui nausɨpɨatai, axti naki onsapetioti neanka, champɨ nikiubuti nauki aiñumuti achepekɨ axɨmanu neanka, tyopiki chiyebopɨ uiti axɨmanu ukanɨ.

¹⁷Axɨmanu neanka uxia nuxia, tapɨ ɨmoti kiatax champɨ nanenekiche.

¹⁸Ñachampienkaka ɨmoti Tupax tyopiki ipiaka xhanitya pikiataka manityakaka amopɨnanaki axaño.

¹⁹Axɨpekuma axɨbama ikokoromati Jesús axɨñɨ nantax xhanityaka cinco nisura axɨba onkoimia, nauki sane xhanuneka ɨmo makiataka, pɨnanaki taruku nububiki nisura auki kiatax manityakax.

²⁰Masarukityaiki, tapɨ apiñata au napakionko takana axɨbama masiomankaiki. Apiña takana masiomanka ñome axɨba chomixhampɨ. Ta apiña nauyarusɨrɨkɨ ñome napapanaunku.

²¹Iku Nikorox nantɨ: “Xhanityaka ñana ɨmoma axɨbama mañoñɨnka auki pikiataka manityakaka aikimia axɨbama auki kiatax kɨx, ni sanempɨ axiama onkoimia nisura, nanti Yɨriabux.”

²²Sane naukiche, axtɨ manityaka kiatax manityakax tyone uiche atusi ɨmoma axɨbama chikokoropɨmati Jesús, chɨtɨpɨ ɨmoma axɨbama ikokoromati Jesús. Tapɨ axtɨ manunekaka ui noñemaxti Tupax tyone uiche atusi ɨmoma axɨbama ikokoromati Jesús, chɨtɨpɨ ɨmoma axɨbama chikokoropɨmati Jesús.

²³Tyopiki axtɨ axɨbama ikokoromati Jesús aboma oberabarama, axtɨ namanaiña manityanama pikiataka manityakaka, auki sɨrotitɨpo tamanti ñoñɨnx axɨpekuma axti naki chikokorotipɨ Jesús, au ñakionkoxti nanti ta axɨma mameso nityanuxɨma.

²⁴Tapɨ axtɨ apanityaka au noñemaxti Tupax, auki sɨrotitɨpo tamanti naki chikokorotipɨ Jesús, auki noñemaxtiatoe kaɨma kɨbɨso ñakiokoxti, ui nanaiña axɨna onkoiti nuraxɨma astaiti nisɨborikixhti.

²⁵Sane tusiu nanaiña axɨna ane au nausasɨxti, auki bachesoiyoti ñanaunkuxti ɨmoti Tupax, aukityo ikokotati ta ñemanauntu axti Tupax anati uyaxɨpeku.

²⁶Sane masarukityaiki, ¿isane usurapoboibo? Axtɨ apiyoberabakaño, aboma axɨbama masonioma ɨmoti Tupax, tapɨ makiataka manunekanama, makiataka urapoimia axɨna urapoiti Tupax ɨmomantai, makiataka manityanama kiatax manityakax, makiataka urapoimia axɨna nantɨ axɨmanu manityakax. Tyoneio nanaiña omixhia nauki uxia nisɨborikixhimia axɨbama ikokoromati Jesús.

²⁷Axtɨ anati naki manityanati auki kiatax manityakax, tari ñanityanama toxɨma axtɨ tarukapae nɨmoche tari trexɨma, taikianati taman manityanati. Tari tamanti naki uiche uraboiti axɨna nantɨ axɨmanu manityakax.

²⁸Axtɨ champɨti naki ipiakati uraboiti axɨmanu manityakax, tapɨ manityanama sukarɨ namanaiña auki pikiataka manityakaka, tari ñanityanama aɨbumantoe ɨmotityo Tupax.

²⁹Saneityo axɨbama profetas, tari ñanityanama toxɨma o trexɨma, tapɨ makiataka tari uimia asaraimia axɨmanu nuraxɨma.

³⁰Axtɨ axti Tupax ane urapoiti sukarɨti kiatax axti naki anati tɨmonsoti akamanu, tari etayoiti maniki anankati manityanati.

³¹Sane namanaiña, taikianati taman manunekanati au noñemaxti Tupax, nauki namanaiña aye uimia namanaiñaintyo ununekanama.

³²Axɨbama profetas, tari sɨsioma ɨmo yakɨpukuxti naki profeta,

³³tyopiki axti Tupax Tupaxti ɨmo axɨna uxia osoi oemantoe chɨtɨpɨ ɨmo axɨna chuxiampatai osoi oemantoe. Takana nisɨborikixhimia axɨbama ikokoromati Jesús,

³⁴axtɨ apiyoberabakaño au nɨrixhti Tupax, tapɨ panityana paɨka, tyopiki ui bakɨpukux uiti Moisés chichebopɨ ñome apanitya. Tari apakokonau ɨmo axɨbama ñopikianio.

³⁵Axtɨ ane isane muxianx atusi ñome, tari apankirio pɨnanakimia axɨbama ñopikianio au niyopox tato. Tyopiki chɨkoñopɨtɨ ɨmo paɨx anitya kauta oberabarama axɨbama ikokoromati Jesús.

³⁶Apakionsaño, axɨna nuraxti Tupax chɨkusɨrɨbopɨ atusi aume, chɨtɨpɨ aumeantai atoxi.

³⁷Axtɨ anati naki au ñakionkoxti manityanati au noñemaxti Tupax, axtɨ au ñakionkoxti manityanati ui noñemaxti Espíritu Santo, tusiu ɨmoti ta axɨna xhakonomoka aume tyone yakɨpukuxti Yɨriabux Jesús.

³⁸Axtɨ chɨtusiupɨ ɨmoti, axti Yɨriabux Jesús chisuputaratipɨ.

³⁹Sanente, masarukityaiki, apiña nuxia nauki apanitya ui noñemaxti Tupax, tapɨ chichebopɨ aboi anityama auki pikiataka manityakaka.

⁴⁰Tari apikoñoko nuxia axtɨ apisamute apiñaintyo taikiana taman kauta axɨna uxia nakax.