Read Chiquitano 1 CORINTIOS 2 Bible Online

1 CORINTIOS 2 - Chiquitano bible

1 CORINTIOS 2

¹Sane masarukityaiki, naukiche yakatɨ tanu xhanuneka aume axɨba nixhantɨmoti Tupax usaɨbu, axɨba umanekana uiti, chiyakapɨtɨ aɨbu taruku nipiaka xhanitya.

²Naukiche anankañɨ abaxɨpeku, chixhankapɨ atusi iñemo kiatax, axɨna nixhantɨmo ta nauki atusi iñemo nanaiña kɨtɨpɨti Jesucristo, axti Jesucristo naki takubaxioti kɨtɨpɨ kurusɨx.

³Anankañɨ abaxɨpeku chɨkusɨurupɨ nisɨtɨpɨ, aɨbu nipiaichokonoko ui nixhuku,

⁴naukiche xhanityaka aupu naukichetyo xhanunekaka aume axɨba omixhia manityakax, chixhanityakapɨ aume takana axɨbama taruku nipiakaxɨma anityama nauki sane apikoko nixhanityaka. Ta axaño apikokota ui noñemaxti Espíritu Santo uityo noñemaxti Tupax,

⁵nauki axɨna napakokonaunku tapɨ kuatɨ auki nipiakaxɨma mañoñɨnka, ta ui noñemaxti Tupax.

⁶Axtɨ sane, manityaka nuipiaka aɨbuma axɨbama tɨñemanaunkuxatoe isuputaramati Tupax. Ta chɨtɨpɨ nipiakaxɨma axɨbama ikuki axɨna kɨx, champɨityo axtɨ nipiakaxɨma axɨbama ɨriatuxɨma.

⁷Tyone axɨna mapanaunkux anekana uiti Tupax, axɨna noñemaxti anekana uiti, aukiapae tɨkañe nauki uɨrotɨ esati au napes.

⁸Tyone kaɨma axɨna chiyebopɨ ui mayɨriabuka ikuki axɨna kɨx, tyopiki axtɨ iyebopɨ uimia chityakubaxiromatipɨ kɨtɨpɨ kurusɨx naki yarusɨrɨx Yɨriabux ɨmo nanentax.

⁹Sane takana nantɨ iku Nikorox: “Ane koñokono uiti Tupax ɨmoma axɨbama kuasɨrɨti ɨmoma axɨba champɨti astaiti, champɨtityo onkoiti, champɨtityo ane au ñakionkoxti.”

¹⁰Tyoneio axɨba uiti Tupax atusi oemo ui noñemaxti Espíritu Santo, tyopiki axti Espíritu Santo nanaiña tusiu ɨmoti, nanaiña axɨba umanekana pɨnanaki mañoñɨnka uiti Tupax tusiu ɨmoti.

¹¹Champɨti ñoñɨnx tusiu ɨmoti axɨna ane au nausasɨxti kiatax ñoñɨnx, kunauntañatiatai nausɨpɨxti axɨna ane kɨtɨpɨti ñoñɨnx. Saneityo, kunauntañatiatai Espíritu Santo tusiu ɨmoti isane ane kɨtɨpɨti Tupax.

¹²Axoñɨ chɨtoxiopɨ oemo nuyausɨpɨ ikuki axɨna kɨx, ta axti Espíritu Santo naki toxioti oemo uiti Tupax, nauki atusi oemo nanaiña axɨba ui nipukɨruxti Tupax ityoximiatati oemo.

¹³Tyone axɨba supanunekaka ui noñemaxti Espíritu Santo, chɨtɨpɨ ui nipiakaxɨma mañoñɨnka. Sane supanunekaka kɨtɨpɨti Espíritu Santo ui noñemaxti Espíritu Santo.

¹⁴Tapɨti naki ñoñɨnx ikuki axɨnantai kɨx, chiyasutiutipɨ axɨba noñemaxti Espíritu Santo uiti Tupax, tyopiki chɨsamianapɨ ɨmoti. Tyone chiyebopɨ uiti, tyopiki nanaiña axɨba sane tari uiti Espíritu Santo asaraiti.

¹⁵Tapɨti naki ane noñemaxti Espíritu Santo kɨtɨpɨti uiti asaraiti nanaiña axɨba sane, champɨti naki ane nɨriakaxti asaraiti ñapanaunkuxti.

¹⁶Sane nantɨ iku Nikorox: “Champɨti ñoñɨnx isuputakaiti ñapanaunkuxti Tupax. ¿Ensapɨ anati naki uiche aiñununekanati?” Tapɨ axoñɨ, ane osoi ñapanaunkuxti Cristo.