Read Chiquitano 1 CORINTIOS 4 Bible Online

1 CORINTIOS 4 - Chiquitano bible

1 CORINTIOS 4

¹Axaño amukanaño suiñemo takanantai axɨbama supaserebikia ɨmoti Cristo, bakɨpukux suiñemo supanuneka noñemaxti Tupax axɨba umanekana uiti.

²Axɨna kaɨma, axtɨ anati naki ane toxio ɨmoti yachɨkoboiboti tari aityusiankati ta ipiakati aisamunenti.

³Tapɨ axɨñɨ, champɨ nɨmoche nuxia sobi axtɨ amastai axtɨtyo astaiti taman yɨriabux ikuki axɨna kɨx nanaiña axɨna isamute. Nipɨ axɨñɨ sukanañɨ axtɨ uxia o chuxiampɨ niyaserebiki.

⁴Au nixhakionko champɨ nomɨnantɨ sobi, chuixhipɨ ñemanauntu uxia nisɨboriki. Axti Yɨriabux auki napes tyonenti naki uiche asaraiti.

⁵Sane naukiche, tapɨ apasɨrɨka amasarai axɨna sane axtɨ chiñataikipɨ axɨmanu nanenes ñana. Axtɨ tɨkuatati Yɨriabux auki napes tari uiti aikiaɨbuti au nanentax nanaiña axɨba kaɨma abe au tomikianene, uiti atusi axɨna ane au nityusixhimia mañoñɨnka. Auki kaɨma axti Tupax uxia nuraxti ɨmoma axɨbama uxia nisɨborikixhimia.

⁶Masarukityaiki, xhanityaka ausukarɨ yokɨtɨpɨ axɨba sane nauki tapɨ autapeneka, iñakati ñachepekatabo aume axti Apolo takanaintyo axɨñɨ. Sukanañɨ aume nauki yusiuki axɨba sopisamute ausukarɨ apisamune takana axɨmanu bakɨpukux, nauki tapɨ anati naki au ñakionkoxti champɨti kiatax pɨrɨkɨti, taikiana uxia aboi ɨmo namanaiña.

⁷¿Ñakuti uiche yarusɨrɨxɨkɨ pɨnanaki makiataka? Nanaiña axɨba nenaxi uiti Tupax aityoximiati aemo. Axtɨ uiti aityoximiati aemo, ¿kausane onkatɨ aemoantoe, takana axtɨ obiatoe ane nenaxi?

⁸Kanapae, axaño taruku namenaxi, tiyebo aboi nanaiña nauxiantɨmo, au napakionko abaka takana axɨbama taruku nɨriakaxɨma iku axɨna kɨx champɨ isane napakiontobo kɨtɨpɨ makiataka. ¡Uxiampɨ axtɨ ñemanauntu taruku nabɨriaka, nauki axɨsomɨ anentyo sobɨriaka auchepe!

⁹Kanapae axɨsomɨ axɨbama subaka isiuti Jesús, axti Tupax iñanati somɨ au nityakɨrux, takana axɨbama toxiobo ñana ɨmo nityakisɨrɨkɨxɨma. Axɨsomɨ takana nikupiurataxɨma iku axɨna kɨx ɨmoma axɨbama ángeles ɨmomaintyo mañoñɨnka.

¹⁰Axɨsomɨ, tyopikiti Cristo, namatɨ suiñemo champɨ sopipiatɨmo. Tapɨ axaño chapie ɨmoti Cristo, amukanaño taruku napapanaunku. Axɨsomɨ chɨkusɨurupɨ suisɨtɨpɨ, tapɨ axaño taruku nikusɨu naukɨtɨpɨ. Iñanama pese somɨ, tapɨ aume taruku ñanaunkuxɨma.

¹¹Kaɨmainki suichakisɨrɨka ui suisɨrɨpɨ, ui suichosɨ champɨ sɨrobo suisɨtɨpɨ. Okɨsioma suiñemo, champɨ suipo.

¹²Supatacheka ui supachɨkoi iyo sumutuburibo. Axtɨ ipiauxamanama somɨ ityobo sopikunusɨankakama. Subaka aɨbu supatanekaka ñɨnanama, tɨborikoma suiñemo, champɨ nɨmoche soboi.

¹³Chuxiampɨ nuraxɨma suiñemo, sopiñumuta aɨbu uxia supanityaka ɨmoma. Takana semenux somɨ ɨmoma iku axɨna kɨx, takana axɨbama champɨ niyaserebikixhimia iku axɨna kɨx. Sane kaɨmainki isamutema.

¹⁴Xhakonomoka aume axɨna sane, chɨtɨpɨ nauki aukɨso uixh, ta nauki xhanuneka aume, takana ɨmoma axɨbama isaɨtaikiatoe, tyopiki taruku naukuasɨrɨkɨ iñemo.

¹⁵Axtɨ axaño axɨbama apikokokati Cristo, aboma diez mil axɨbama manunekanama aume, tamantiatai naki aubaɨ. Axti naki Aubaɨ ta axɨñɨ, tyopiki xhanunekaka aume axɨba omixhia manityakax uixh abaka chepeti Cristo Jesús.

¹⁶Ui axɨna sane, apasamu nuxia apisamune isiuki axɨna nixhanunekaka.

¹⁷Tyopiki axɨna sane ikɨpukati Timoteo tanu aubesa, axti naki taruku nikuaxti iñemo uxia nisɨborikixhti isaɨti au nɨrixhti Yɨriabux. Uiti uraboiti tatityo ausukarɨ axɨna nixhakokonaunku ɨmoti Cristo Jesús, takana axɨna nixhanunekaka tɨkañe ɨmoma axɨbama ikokoromati Tupax au nanaiña kauta axɨna yakatɨ.

¹⁸Aboma axɨbama abaxɨpekuki onkomatɨapae ɨmomantoe au ñakionkoxɨma chiyɨkapɨtɨ ñana yasarama.

¹⁹Axtɨ xhanxti Yɨriabux Jesús, konto ñana yɨkatɨ tanu yasaraño. Akamanu ixhanka yasarama axɨmanuma au ñakiokoxɨma champɨti kiatax pɨrɨkɨma, champɨityo axtɨ axɨmanuantai nuraxɨma.

²⁰Tyopiki axɨna nɨriakaxti Tupax chɨtɨpɨ piarakaxtai, ta ane nɨriakax.

²¹¿Isane uxia aume: nauki yɨrotɨ besɨro sobi yache autakisɨrɨkɨbo? ¿O nauki iñanai tanu aubesa aɨbu nipukɨnunku aukuata?