Read Chiquitano 1 CORINTIOS 7 Bible Online

1 CORINTIOS 7 - Chiquitano bible

1 CORINTIOS 7

¹Axɨmanio apankitio xhopɨnanakiñɨ sukanañɨ kaɨma aume. Kanapae uxia axtɨ chaupokapɨ.

²Nauki tapɨ sɨro tyopɨ nausɨboriki, uxia axtɨ taikianati taman ane nikɨpostoti, saneityo paɨx uxia axtɨ anati ikianatoe.

³Chepema axti ñoñɨnx takana paɨx tari uxia nisɨborikixhimia aɨbumantoe.

⁴Axɨna paɨx, axɨna nikɨtɨpɨx chɨtɨpɨ nesaxatoe, ta tyone ɨmoti ikiana, isiutityo naki ikiana, axɨna nikɨtɨpɨxti tyone ɨmo nikɨpostoti.

⁵Sane naukiche, tari apityoximiasaño aumeampatoe, tapɨ axtɨ chepe napakionko apiñanaño pese amopɨnanakiapatoe ñome mantukubatai naneneka nauki tyone napachɨkoi meankax. Iyau axɨmanio naneneka chepe tatityo nabaka. Tapɨ aboiyapatoe autapeneka uiti chobores au nomɨnantɨ.

⁶Axɨna sane sukanañɨ aume tyone nixhakionkoatoe chɨtɨpɨ nixhakɨpuku.

⁷Axɨna nixhanka ta nauki namanaiña mañoñɨnka aisamunema takana axɨñɨ. Tapɨti Tupax toxio uiti taikiana ɨmoti taman axɨna yachɨkoboiboti.

⁸Ɨmoma axɨbama chɨposopɨma axɨbaityo biuraka sukanañɨ ɨmoma uxia axtɨ chɨposopɨma tato, takana axɨñɨ.

⁹Tapɨ axtɨ chɨtɨpɨ aume axɨna sane, uxia axtɨ aupoka tapɨ abasikia apisamune axɨna nomɨnantɨ.

¹⁰Tapɨ axɨbama tɨposoma sukanañɨ aume axɨna yakɨpukuxti Tupax, tari axɨna paɨx tapɨ iñokonoti ikiana.

¹¹Axtɨ paɨx okonoti ikiana uixh, tapɨ poso tato aɨbuti kiatax, tari aixhimiaka tato aɨbuti ikiana. Saneityo axti ñoñɨnx tapɨ iñokotati nikɨpostoti.

¹²Tapɨ ɨmo makiataka sukanañɨ axɨna niñoñemantoe chɨtɨpɨ ui noñemaxti Tupax, axtɨ nikɨpostoti naki usaruki chikokorotipɨ Tupax, axtɨ uxia au ñakionkox sɨsio aɨbuti, tapɨ iñanatiyɨ pese pɨnanaki.

¹³Axtɨ taman paɨx axɨna ikokoroti Tupax poso aɨbuti naki chikokorotipɨ Tupax axtɨ xhanxti sɨsioti aɨbu, tapɨ iñanɨ pese pɨnanakiti.

¹⁴Tyopiki axti ñoñɨnx naki chikokorotipɨ Jesús sɨsioti samamekanati tyopiki nikɨpostoti axɨna ikokoroti Jesús. Tapɨ axɨna paɨx chikokorotipɨ Jesús sɨsio samamekana tyopiki axti ikiana ikokoroti Jesús. Axtɨ chɨsanempɨ axɨbama aubaɨtaiki sɨsioma aɨbu nomɨnantɨ kɨtɨpɨma. Ta sane tyonema yarukityoxɨma axɨbama ikokoromati Tupax.

¹⁵Axtɨ axti ñoñɨnx chepe paɨx axɨbama chikokoropɨmati Jesús xhanxɨma aiñokonomakɨ tari aisamunema. Tyopiki axɨna sanenti ñoñɨnx chepe paɨx sɨsioma pese nakaxɨma pɨnanakimiantoe, tyopiki axti Tupax ityasuruti año nauki uxia aboi aumeampatoe.

¹⁶¿Kausane atusi aemo paɨx, axtɨ taesɨburuti aikianɨ eanaki nomɨnantɨ obi? Axɨkɨtyo ñoñɨnx, ¿kausane atusi aemo axtɨ taesɨburu nakɨposɨ atopikikɨ eanaki nomɨnantɨ?

¹⁷Namanaiña axaño tari apiña nausɨboriki isiuki axɨna toxio aume uiti Yɨriabux, takana naukiche samamekana año uiti Tupax. Tyone axɨna nixhakɨpuku ɨmoma namanaiña axɨbama ikokoromati Jesús.

¹⁸Axtɨ axti Tupax tasuruti uiti naki circuncidaboti, tapɨ iñanekatati, tapɨ axtɨ batasuruti ɨmoti naki chɨcircuncidabotipɨ champɨ nɨmoche circuncidaboti.

¹⁹Axɨmanu circuncición champɨ yaserebikixh, axɨna nixhantɨmoti Tupax ta nauki uikokorio yakɨpukuxti.

²⁰Taikianati taman tari sɨsioti takana naukiche maɨbo tasuruti uiti Tupax.

²¹Naukiche aityasurutiyɨ Tupax tɨkañe anankɨ kiana nomɨnantɨ, tapɨ ane nɨmoche obi. Axtɨ ane maximiakatax aemo tapɨ aiñensonokota.

²²Axti naki anankati kiana nomɨnantɨ naukiche tasuruti nauki aikokoroti Jesús, axti maniki ñoñɨnx tyone yachɨkoboiboti aserebiti ɨmoti Yɨriabux Jesús. Sanentityo axti naki ñoñɨnx tɨtaesɨburuti eanaki nomɨnantɨ naukiche tasuruti, kaɨma tyone yachɨkoboiboti aserebiti ɨmoti Cristo.

²³Uiti Tupax aikiaɨburuti año pɨnanaki nomɨnantɨ. Tapɨ chebo aboi ɨmoma makiataka mañoñɨnka nauki autapeneka uimia au nomɨnantɨ.

²⁴Sane masarukityaiki, tari taikianati taman sɨsioti aɨbu axɨna ipiakati aisamunenti naukiche tasuruti uiti Tupax.

²⁵Tapɨ ñome axɨba paɨka chɨboposopɨ, champɨ bakɨpukux ñome sobi uiti Yɨriabux Jesús. Ta ane axɨna nixhakionkoatoe, takanati naki taruku namonxɨkɨ ɨmoti ui nipukɨruxti Yɨriabux Jesús.

²⁶Au nixhakionko uxia axtɨ namanaiña sɨsio año sane takana axɨna nabaka kaɨma au axɨba naskɨbeka, tyopiki axɨba naskɨbeka kaɨma taruku nutakisɨrɨkɨ.

²⁷Axtɨ ane nakɨposɨ, tapɨ aiñokota. Axtɨ champɨ, tapɨ apachetio.

²⁸Axtɨ apoka, chaisamutempɨ nomɨnantɨ. Axtɨ taman kupikixh poso, champɨityo axtɨ isamute nomɨnantɨ. Tapɨ axɨbama posoma takisɨrɨma ñana iku axɨna kɨx, tyone axɨna chixhankapɨ nauki asuriuma.

²⁹Masarukityaiki, ane axɨna ixhanka suraboi ausukarɨ: Abe mɨmanantaiki naskɨbeka oemo nauki osɨbori iku axɨna kɨx. Tyopiki axɨna sane, axɨbama posoma tari aisamunema nisɨborikixhimia takana axtɨ chɨposopɨma.

³⁰Axɨbama oxonx ɨmoma tari aisamunema takana axtɨ taruku nipukɨnunkuxɨma, tapɨ axɨbama taruku nipukɨnunkuxɨma tari aisamunema takana axtɨ taruku nisuchekixhimia. Tapɨ axɨbama abe nenaxixhimia tari aisamunema takana axtɨ champɨ nenaxixhimia.

³¹Tapɨ axɨbama champɨ ñemakiyauma iku axɨna kɨx, tari aiñama takana axtɨ champɨ isane ɨmoma, tyopiki axɨna kɨx aɨbu nanaiña axɨba nenaxixh takɨrusu ñana.

³²Axɨñɨ ixhankapɨ nauki tapɨ autakisɨrɨka. Nauki axti naki chɨposotipɨ tari yapacherati nikiubuti kausane aserebiti ɨmoti Yɨriabux nauki uxia ɨmoti nisɨborikixhti.

³³Tyopiki axti naki posoti taruku nonxɨkɨxti yubapa axɨba ausɨratai ikuki axɨna kɨx ui nixhankaxti aisamunenti axɨna uxia ɨmo nikɨpostoti,

³⁴sane chepesɨro nubakax. Isiuityo axɨna paɨx champɨtiki ikiana saneityo axɨba chɨboposopɨ papachero niyukiubu kausane nauki apaserebi ɨmoti Yɨriabux, tyopiki champɨ nomɨnantɨ yokɨtɨpɨ takanaintyo nubausɨpɨx. Tapɨ axɨna poso taruku nonxɨkɨx yubapa axɨba ausɨratai ikuki axɨna kɨx, nauki apisamune axɨna uxia ɨmoti ikiana.

³⁵Sukanañɨ aume axɨna sane, chɨsukanapɨñɨ nauki tapɨ apisamute, ta nauki amasarai nuxia uixh uxia nausɨboriki, nauki tyoneantai napachɨkoi apaserebi ɨmoti Yɨriabux.

³⁶Axtɨ anati naki au ñakionkoxti uxia axtɨ posoti aɨbu axɨna kupikixh uxia ɨmoti, tyopiki chauki tiñatai nisɨborikixh nauki apo, axtɨ au ñakionkoxti tyone axɨna uxia, tari posoti chisamutentipɨ nomɨnantɨ.

³⁷Tapɨ axtɨ anati kiatax, chɨsanempɨ au ñakionkoxti, champɨti bakɨpuruti ɨmoti nauki apoti, uxiaintyo axɨna isamutenti.

³⁸Sane naukiche, axtɨ posoti aɨbu axɨmanu kupikixh uxia ɨmoti, uxia axɨna isamutenti. Tapɨ axtɨ chɨposotipɨ, tyone axɨna uxiampae.

³⁹Axɨna paɨx poso ane nɨriakaxti ikiana ɨmo axtɨ sɨborikotiki. Tapɨ axtɨ koiñoti, tyone axtɨ xhanx poso tatityo aɨbuti naki uxianti au ñakionkox, axti naki ikokoroti Yɨriabux Jesús.

⁴⁰Au nixhakionko kanapae uxia nakax axtɨ chɨposopɨ tato. Tyone axɨna nixhakionko, kanapae anentyo noñemaxti Tupax sɨtɨpɨñɨ