Read Chiquitano 1 CORINTIOS 9 Bible Online

1 CORINTIOS 9 - Chiquitano bible

1 CORINTIOS 9

¹Axaño chamukanañopɨ iñemo ta axɨñɨ chanankapɨñɨ isiuti Jesús, axɨñɨ yasakati Jesús naki yɨriabuxti oemo, ui axɨna niyachɨkoi axaño apikokokati Yɨriabux Jesús.

²Axtɨ ɨmo makiataka axɨñɨ chanankapɨñɨ isiuti Jesús. Tapɨ aume ñemanaunkuxatoe ta sane, axɨna uiche atusi ta tyopiki axaño kaɨma apikokokati Jesús.

³Tyone axɨna sukanañɨ ɨmoma axɨbama chɨsamianapɨ ɨmoma:

⁴Unka sopipiakaityo suba naukityo suicha.

⁵Nauki anentyo paɨx suisiu axɨna ikokoroti Jesús, sane takana makiataka axɨbama apóstoles, axɨbamaintyo yarukityoxti Yɨriabux Jesús, axtityo Cefas.

⁶¿Axɨñɨ chepeti Bernabé axɨsomɨantai champɨ tyopikiche nauki apasaparasomɨ?

⁷¿Ensapɨ anati sortabox sɨrotitɨ aserebiti aɨbu nimonixhtiatoe? ¿Ñakutipɨ naki ñoñɨnx mankɨturuti au niyoxti axtɨ tiyebo chɨbasotipɨ? ¿Ñakutipɨ ñoñɨnx naki asaratitɨ yutaku nobixhaka, chichabotipɨ nipiaɨx axtɨ mataichomenoti?

⁸Tapɨ amukanaño axɨna sukanañɨ sane ta saukiñɨantoe, axɨmanu bakɨpukux uiti Moisés nantityo sane.

⁹Iku axɨmanu bakɨpukux uiti Moisés korobo sane: “Tapɨ aityomoenta naru nobiox axtɨ iyubaɨta nakiyo.” Ui axɨna sane tapɨ ukanɨ axti Tupax onkotitɨapae yutaku nobioka,

¹⁰ta onkotitɨ utaku. Tyopiki axɨmanu bakɨpukux korobo tɨkañe utaku. Sane takanati naki masamunuti ñanaunx takanatityo naki iporeatati niyakiyoxti tari aisamunema tyopiki ane ñana toxiobo ɨmoti onɨki axɨmanu niyakiyoxti.

¹¹Sane axɨsomɨ axtɨ supankakɨtu nuraxti Tupax au nabausasɨ, ¿chɨtarukupɨpae axɨna supankikia amopɨnanaki sumutuburibo?

¹²Axtɨ makiataka mankioma amopɨnanaki namenaxi, axɨsomɨ aneampae tyopikiche pɨnanakimia. Axɨsomɨ chɨsanempɨ soboi, axɨsomɨ supapacheka soboiyapatoe nanaiña axɨna suixhantɨmo nauki tapɨ tochenko axɨna supanunekaka axɨba omixhia manityakax kɨtɨpɨti Jesucristo.

¹³Axaño tusiu aume axɨbama baserebioma au nipo meankax, sɨborikoma auki nipo meankax. Axɨbama astaimia axɨmanu kauta omeno makumanataka, basoma numañetu numukianka axɨba makumanataka akamanu.

¹⁴Saneityo yakɨpukuxti Yɨriabux Jesús, axɨbama manunekanama axɨba omixhia manityakax kɨtɨpɨti Jesús tari uixh asɨborimia.

¹⁵Tapɨ axɨñɨ chisamutempɨ sane, champɨityo axtɨ xhakonomoka aume nauki apisamune sane aboi iñemo. ¡Uxia iñemo axtɨ kusɨrɨbo ñana isonka tapɨ anati naki ikiaɨbutati xhopɨnanakiñɨ axɨna taruku nipukɨnunku!

¹⁶Axtɨ xhanunekaka axɨba omixhia manityakax, chityopikipɨ kaɨma champɨti kiatax xhopɨrɨkɨñɨ, tyopiki tyone axɨna kunauntaña yachɨkoboiboñɨ. ¡Taruku ñana nichakisɨrɨkɨ axtɨ chixhanunekakapɨ nuraxti Tupax!

¹⁷Sane naukiche, axtɨ isamutempɨ auki niñoñemantoe, anempɨ tyopikiche ane toxiobo ñana iñemo ityobo. Tapɨ axtɨ isamute ui bakɨpukux, ta tyopiki isamute ui yakɨpukuxti Tupax.

¹⁸Axtɨ sane axɨna toxiobo iñemo tyone axɨna taruku nipukɨnunku ui nixhanunekaka axɨba omixhia nuraxti Tupax axɨna champɨ isane xhankikia ityobo. Chɨsɨropɨ sobi nikuax axɨna nixhanunekaka nauki isɨbori ityobo.

¹⁹Axɨñɨ champɨti ɨmoche yaserebikia, tapɨ kaɨma yaserebikia ɨmo namanaiña, sane nauki sɨrɨmanama axɨbama ikokoromati Cristo.

²⁰Naukiche anankañɨ axɨpekuma axɨbama judíos iñata nisɨboriki takana nisɨborikixhimia, nauki aikokoromati Jesús isiukiñɨ. Nauki aikokoma axɨbama sɨborikoma isiuki yakɨpukuxti Moisés, axɨñɨntyo isamute axɨmanu bakɨpukux, ta chiñemanauntupɨ isamute sane.

²¹Saneityo sobi, aɨbu axɨbama chisamutempɨma bakɨpukux uiti Moisés, isamute takana nisɨborikixhimia, ta axɨñɨ ñemanauntu ikokota yakɨpukuxti Tupax, tyopiki axɨñɨ isamute yakɨpukuxti Jesucristo.

²²Naukiche anankañɨ axɨpekuma axɨbama apekiatai aikokoromati Jesús, axɨñɨntyo isamute takana axɨma, nauki aikokoma isiukiñɨ. Sane isamute takana nisɨboriki namanaiña, sane nauki aboma axɨbama ane maximiakatax ɨmoma axɨpekukimia.

²³Axɨna sane isamute tyopiki axɨba omixhia manityakax nauki, atoxityo iñemo.

²⁴Axaño tusiu aume axtɨ aboma axɨbama ipiakɨnomakɨ namanaiña ipiakɨnomakɨ, au nityakɨrux tamantiatai naki kusɨrɨboti aiñanainti tyakɨru. Sane naukiche apipiakɨsaño nuxia nauki ane toxiobo aume ityobo.

²⁵Axɨbama koborioma ɨmo kupiukux, chɨbasopɨma nanaiña axɨna chuxiampɨ ɨmo nikɨtɨpɨxɨma. Isamutema sane nauki aye uimia ityarusɨboma axɨna isiukai mameso, tapɨ axoñɨ uipiakɨkaoñɨ nauki aye osoi axɨna chɨmamesopɨ ñana.

²⁶Sane naukiche axɨñɨ chipiakɨkapɨñɨantai. Chixhaikiapityo takanati naki bachebotiatai ɨmo makiɨtɨx.

²⁷Tapɨ axɨñɨ takisɨrɨ sobi nisɨtɨpɨ iñununekata nauki aisamune isiu nixhanka, chuxiampɨ axtɨ xhanuneka ɨmo makiataka tapɨ axɨñɨ chisamutempɨ.