Read Chiquitano 2 CORINTIOS 1 Bible Online

2 CORINTIOS 1 - Chiquitano bible

2 CORINTIOS 1

¹Axɨñɨ Pablo, yaka isiuti Jesucristo ui noñemaxti Tupax, axtityo usaruki Timoteo, supakionko ɨmoma axɨbama ikokoromati Tupax au Corinto, ɨmomaintyo namanaiña axɨbama ikokoromati Tupax axɨbama aboma au Acaya.

²Tari axti Tupax naki Uyaɨ axtityo Yɨriabux Jesucristo aukurusɨka uimia taikiana aixhimiakama nomɨnantɨ aboi.

³Taikiana yarusɨrɨx nɨrixhti Tupax naki Yaɨtoti Yɨriabux Jesucristo, tyonenti Uyaɨ axti naki taruku nipukɨruxti utaku, axti naki Tupax uiche taruku nupukɨnunku.

⁴Uiti taruku nupukɨnunku axtɨ utakisɨrɨka, nauki osoi pukɨnuñamaintyo axɨbama takisɨrɨma, takana axɨna nupukɨnunku uiti.

⁵Sane takana taruku nutakisɨrɨkɨ chepeti Cristo, saneityo uiti Cristo taruku nupukɨnunku.

⁶Axtɨ axɨsomɨ suichakisɨrɨka, ta nauki ane aupukɨnunkubu nauki anentyo maximiakatax aume. Axtɨ axti Tupax suipukɨnunka uiti ta nauki axañointyo aupukɨnunka tyone aukusɨupubu ñome nautakisɨrɨkɨ takana axɨna suichakisɨrɨkɨ.

⁷Somonkatɨ nuxia aume, tyopiki tusiu suiñemo, sane takana axaño autakisɨrɨka saneityo toxio ñana aupukɨnunkubu.

⁸Masarukityaiki, suixhanka nauki atusi nuxia aume axɨna suichakisɨrɨkɨ naukiche amonkosomɨ au Asia. Tyone yarusɨrɨx makokotox suiñemo tisaipɨ supatache uixh, champɨ supakionko chityabairopɨma somɨ akamanu.

⁹Sukanasomɨ kaɨmampae ityabairoma oñɨ. Ui axɨna sane atusi suiñemo tapɨ ananto soboi somonkatɨ suiñemoantoe, ta ɨmoti Tupax naki uiche sɨborikoma tato axɨbama tɨkoiñoma.

¹⁰Uiti Tupax añekana somɨ uitityo uñañekaka axtɨ tixhanxapae okonka. Somonkatɨ nuxia ɨmoti tyopiki okɨmanatiki ñana suichaku,

¹¹axtɨ axaño ameanka suichaku. Axtɨ sɨrɨmanama axɨbama meaboma suichaku, sɨrɨmanamaintyo axɨbama machampienkanama ɨmoti Tupax yotopiki axɨba botoxio suiñemo uiti.

¹²Ane axɨna tyopikiche taruku suipukɨnunku, tyopiki axɨna suiyausɨpɨ uixh uraboi ta besɨro suisɨboriki iku axɨna kɨx, takanaintyo aupu. Tyopiki axɨsomɨ chisomekapɨtɨ isiuki ñapanaunkuxɨma mañoñɨnka, ta somonkatɨ ɨmo noñemaxti Tupax.

¹³Iku axɨna supakonomoso, champɨ korobo soboi kiatax axɨna tapɨ chiyebopɨ aboi. Sane ixhanka nauki aye nuxia aboi,

¹⁴tyopiki ane axɨna kauta chauki tɨtusiu aume axɨna suisɨboriki, axtɨ tɨkuatati tato Yɨriabux Jesús axaño aupukɨnunka suichopiki takanaintyo axɨsomɨ suipukɨnunka autopiki.

¹⁵Ui axɨna ñonkatɨ ɨmo axɨna sane, ixhankapɨ kusɨrɨbo yɨrotɨ tanu yasaraño, sane nauki tox niyɨkɨ yasaraño.

¹⁶Aukimanu yɨrotɨ au Macedonia, auki Macedonia isetɨ tato yasaraño nauki amenotɨ saɨbuñɨ au Judea.

¹⁷Naukiche ixhanka isamune axɨna sane, ¿ensapɨ isɨsabukañɨantai? Au napakionko nanaiña axɨna ixhanka isamune, isamute ui nixhapantu, axtɨ sukanañɨ “sane” axtɨ sukanañɨntyo “chɨsanempɨ.”

¹⁸Tusiu ɨmoti Tupax ta axɨsomɨ chɨsukanasomɨmpɨ aume “sane” sukanasomɨntyo “chɨsanempɨ.”

¹⁹Tyopiki axti Jesucristo, Aɨtoxti Tupax naki kɨtɨpɨche supanunekaka abaxɨpeku, axti Silas, axti Timoteo axɨñɨntyo chɨsukanasomɨmpɨ “sane” sukanasomɨntyo “chɨsanempɨ.” Toxio uiti Tupax aɨbuti Cristo ɨmo nanaiña naskɨbeka nesaxti “sane”,

²⁰nanaiña axɨmanio ensɨmunu tɨkañe uiti Tupax aɨbuti omixhante. Sane naukiche, axtɨ makionka oñɨ ɨmoti Tupax, usukanaoñɨ “Amén” aɨbuti Cristo Jesús.

²¹Axti Tupax tyonenti naki uiche usaka chepeti Cristo, uiti usamamekaka ɨmoti.

²²Sɨro uiti okɨtɨpɨ axɨna uiche atusi ta Yɨriabuxti oemo, sɨroityo uiti a nuyausasɨ noñemaxti Espíritu Santo ta ñemanauntu ñana axɨmanu toxiobo oemo.

²³Axɨñɨ chiyakapɨtɨki au Corinto, takana axɨna nixhakionko, sukanañɨ aume au nɨrixhti Tupax ui nipukɨru autaku.

²⁴Chɨsoboipɨ axɨna napakokonaunku. Axɨna suixhantɨmo aupu ta nauki ane aupukɨnunkubu, tyopiki tɨtusiu nuxia aume axɨna apikokota.