Read Chiquitano 2 CORINTIOS 10 Bible Online

2 CORINTIOS 10 - Chiquitano bible

2 CORINTIOS 10

¹Axɨñɨ, Pablo, apasamu nuxia iñemo, ui nipukɨruxti Cristo, champɨ nɨmoche sobi axɨna amukanaño axɨñɨ axtɨ yaka auchepe chixhanityakapɨ nuxia tapɨ axtɨ yaka iche chɨtamampatai nisura aukɨtɨpɨ.

²Ui axɨna sane, apasamu nuxia iñemo, axtɨ yɨkatɨ tanu yasaraño, tapɨ ityɨmoniankanamañɨ axɨmanuma namatɨ axɨñɨ isamute takana axɨna isamutema mañoñɨnka, tyopiki axɨñɨ ixhanka yasarama.

³Ñemanauntu axoñɨ chepatai nusaka, ta chɨsupapachetiopɨ takana yapachetioma axɨbama mañoñɨnka ikuki axɨna kɨx.

⁴Tyopiki axɨna suisome chisiupɨ takana ikuki axɨna kɨx, ta nikusɨuxti Tupax uixh omiñaxio ñanaiña axɨba taruku niyukusɨux saneityo sopiñaximiakata nanaiña axɨba chomixhampɨ nuraxɨma.

⁵Nanaiñaintyo axɨba taruku nobɨriakax axɨba muxian apityochenaka tapɨ isuputaramati Tupax makiataka. Nanaiña axɨna niñapanaunkuxɨma mañoñɨnka soboi sɨromatɨ esati Cristo nauki aikokoromati,

⁶axɨsomɨ axtɨ anati naki chɨmakokonaunxtipɨ soboi sumasarai nipɨnatenti, axtɨ tɨnamanaiña makokonauma nuxia.

⁷Amasasai axɨna ñemanauntu. Axtɨ anati naki nanti ñemanauntu ta ikokoroti Cristo, axɨsomɨntyo sopikokokati Cristo.

⁸Aninki kiatax axɨna ixhanka suraboi kɨtɨpɨ axɨna suisɨriaka, champɨ tyopikiche isɨso. Tyopiki axti Yɨriabux ityoximiatati sobɨriakabo nauki uxia nisɨborikixhimia namanaiña axɨbama ikokoromati Jesús chɨtɨpɨ nauki sopiñamesoko.

⁹Chixhankapɨ ipixhumunaño ui axɨna nixhakonomoso aume.

¹⁰Aboma axɨbama namatɨ axɨba nixhakonomoso champɨti naki isamutenti axɨna sukanañɨ, axɨñɨ axtɨ xhanityaka champɨti naki chiyebopɨ uiti, champɨityo axtɨ xhanityaka aɨbu nisɨriaka.

¹¹Axti naki nanti sane tari atusityo ɨmoti, sane subura iku kichonimiakax saneityo supanityaka auki iche amopɨnanaki, saneityo supanityaka axtɨ subaka auchepe.

¹²Ñemanauntu tapɨ uichepekaka oñɨ aɨbu axɨmanuma onkomatɨ ɨmomantoe. Axɨma ane nipɨnatema ui axɨna ichepekatama ñapanaunkuxɨma aɨbu makiataka.

¹³Axoñɨ tapɨ oñonkatɨ oemoantoe ta'aiki pɨrɨkɨ axɨna bakɨpukux oemo iusamune. Axti Tupax tyonenti naki uiche aityusiankati usukarɨ kauta ñana uiñanai aɨbu nubachɨkoi, uiti chebo nauki sopiñanai aubesa au Corinto.

¹⁴Sane naukiche, axɨsomɨ sopisamute nanaiña isiuki axɨna bakɨpukux suiñemo, takana axtɨ chɨsubakapɨtɨ tɨkañe sumasaraño. Axɨsomɨ supasɨrɨka sopiñanai abaxɨpeku yupu axɨba omixhia nuraxti Cristo.

¹⁵Chɨsomonkapɨtɨ ɨmo niyachɨkoimia makiataka, ta suixhanka supanuneka tanu abaxɨpeku, axɨna suixhanka ta nauki isiu napakokonaunku axɨsomɨ yarusɨrɨx suipukɨnunku auchepe, takana axɨna bakɨpukux suiñemo.

¹⁶Sane suixhankaityo supanuneka axɨba omixhia manityakax axɨna kauta chɨsubakapɨtɨ ta'aiki amopɨrɨkɨ, chisuixhankapɨ sopikuñeka niyachɨkoimia makiataka, nauki tapɨ taruku suipukɨnunku tyopiki axɨna anankatai koñokono ui makiataka.

¹⁷Axtɨ anati naki xhanxti onkotitɨ ɨmotiatoe, tari onkotitɨ ɨmoti Yɨriabux Jesús.

¹⁸Tyopiki axti naki ñoñɨnx uxia nisɨborikixhti au nastaxti Tupax, chityonentipɨ naki onkotitɨ ɨmotiatoe, ta axti naki uxia nisɨborikixhti au nastaxti Tupax.