Read Chiquitano 2 CORINTIOS 11 Bible Online

2 CORINTIOS 11 - Chiquitano bible

2 CORINTIOS 11

¹¡Uxia iñemo axtɨ chebo aboi pariu isamune axɨna nichasuku! Sane axtɨ chuxiampɨ aume, apasusiusuñɨ.

²Tyopiki axɨna nixhantɨmo autaku, tyone axɨna nixhantɨmoti Tupax. Axaño aupoka sobi aɨbuti kunauntañantiatai apikianaño, axti Cristo, ixhankaityo ityusiankanaño sukarɨti champɨ isane kiatax aukɨtɨpɨ takana taman kupikixh.

³Axɨñɨ ixhuka, tapɨ takana Eva tapeneko tɨkañe ui ñatachemakaka noixhobox, saneityo axaño tapɨ autapeneka nauki napapanaunku tapɨ sɨro pese aboi pɨnanakiti Cristo.

⁴Axaño chebo aboi ɨmoti naki kiatax axtɨ iñataiti anunekati aume kɨtɨpɨti naki chityonentipɨ Jesús naki chityonentipɨ kɨtɨpɨche supanunekaka aume. Apasutiutyo aɨbu naupukɨnunku axti naki espíritu kiatax nakaxti pɨnanakiti naki Espíritu Santo kusɨrɨbo atoxi aume.

⁵Ui axɨna sane, axɨñɨ champɨ axtɨ chipiakapɨ kutakikiboma axɨmanuma makiataka taruku nipiakaxɨma anunekama axɨmanuma iñataimia abaxɨpeku naukiche tiyɨkatɨ.

⁶Champɨ nɨmoche axɨna chipiakapɨ nuxia xhanitya, ta axɨna nixhapanaunku uxia. Tyone sopityusiankata nantax ausukarɨ au nanaiña axɨna sopisamute.

⁷¿Taki chuxiampɨ axɨna isamute ui axɨna xhanunekaka aume axɨba omixhia nuraxti Tupax champɨ xhankikia omopɨnanaki ityobo, ichakisɨrɨka sobiatoe nantax nauki yarusɨrɨx año?

⁸Taki ikiaɨbuta nimonixhimia axɨbama ikokoroma makiataka tupaka, naukiche yasutiu nimonixhimia nauki yaserebi aume.

⁹Naukiche anankañɨ abaxɨpeku chixhankikiapɨ amopɨnanaki axtɨ champɨ iñemo axɨna nixhantɨmo. Tyopiki axɨbama usarukityaiki auki Macedonia naukiche iñataimia toxio uimia iñemo axɨna champɨ sobi.

¹⁰Ñemanauntu axɨñɨ isuputakati Cristo chixhapamkapɨ, champɨti uiche aikiaɨbuti xhopɨnanakiñɨ axɨna uiche taruku nipukɨnunku au nanaiña Acaya.

¹¹¿Kausane sane axɨna nisura? ¿Ensapɨ tyopiki chaukuasɨrɨkapɨ iñemo? ¡Axti Tupax tusiu ɨmoti ta aukuasɨrɨka iñemo!

¹²Axɨñɨ yasikia aɨbu axɨna niyachɨkoi, tapɨ chebo sobi ɨmoma axɨmanuma bapacheroma isiukiche taruku nipukɨnunkuxɨma takana axɨna soboi.

¹³Chityonempɨma axɨbama apóstoles tyonema axɨbama mañatachemakaka xhanxɨma aisamunema takana axɨbama nesaxti apóstoles Cristo.

¹⁴Axɨna sane champɨti kɨtobɨso uixh, tyopiki axtiatoe Chobores isamunutiyɨ takanati ángel naki taruku nanentakax uiti.

¹⁵Sane naukiche, champɨti kɨtobɨsoti uixh axtɨ axɨmanuma baserebioma ɨmo axɨna chuxiampɨ mapañama xhanxɨma okɨmama tyaku axɨna uxia. ¡Ta koiñoma ñana oboi axɨba isamutema!

¹⁶Sukanañɨ tatityo aume tapɨ anati naki nanti iñemo ta ichasuka. Axtɨ sane au napakionko, chebo aboi xhanitya aume takanati naki tasusu, nauki axɨñɨ ñonkatɨ pariu ñemoantoe,

¹⁷axɨna sukanañɨ, chixhanityakapɨ ui noñemaxti Yɨriabux Jesús, ta takana axtɨ ichasuka, au nixhakionko ane ñana tyopikiche taruku nipukɨnunku saɨbuñɨantoe.

¹⁸Tyopiki sɨrɨmanama axɨbama onkomatɨ ɨmomantoe tyopiki axɨba nisamukuxɨmantoe. Axɨñɨntyo ñonkatɨ ñemoantoe.

¹⁹Axaño taruku napapanaunku, sane uxia aboi ɨmoma axɨbama matyasuka,

²⁰uxiaintyo aboi ɨmoma axɨbama kumanakax año uimia, axɨbama ikiaɨbutama amopɨnanaki namenaxi, axɨbama matachemakanama aume, axɨbama chaukuasɨrɨkapɨ ɨmoma axɨbamaintyo okɨsioma aume.

²¹Axɨñɨ isɨsoka sukanañɨ sane, ¡axoñɨ champɨ nubasɨu sane naukiche uisamute sane! Tapɨ axtɨ makiataka champɨ ñanaunkuxɨma, saneityo sobi, axtɨ axɨna sane tyone tasukux.

²²¿Tyonema axɨbama hebreo? Axɨñɨntyo. ¿Tyonema auki Israel? Axɨñɨntyo. ¿Tyonema aɨtoxti Abraham? Axɨñɨntyo.

²³¿Tyonema axɨbama baserebioma ɨmoti Cristo? Axɨñɨ taruku nisɨriaka pɨnanakimia, ui axɨna sukanañɨ sane xhanityaka takanati naki tasusu. Axɨñɨ xhanunekaka nuxia pɨnanakimia, taikiana aiñamanamañɨmpo, tapɨ axɨma champɨ, taikiana aikɨbairomañɨ, tapɨ axɨma champɨ, taikianaintyo iñañekaka aityabairomañɨ.

²⁴Cinco yakɨbaikixhimia iñemo axɨbama judíos taikiana treinta y nueve chɨkotikia.

²⁵Trex niyɨkɨ nipoboriki uimia, tamaintyo niyɨkɨx yarurumañɨ oboi kanka. Trex nubakaka canoa saɨbuñɨ au narubaityu tux axɨna auche niyɨkɨ, tisaipɨ icha tux, anankañɨ taman tobixh tamaintyo sapes kɨmuintya narubaityu tux.

²⁶Sɨrɨmanatai anankañɨ yusiu kutubiuka, añekanañɨ oboi nusɨruka, añekanañɨ ui makusɨpɨka, añekanañɨntyo ui axɨbama auki nisɨ'ɨ axɨpekumaintyo axɨbama auki kiatax kɨx. Añekanaintyo nisɨboriki kauta sɨrɨmana poka, kautaityo champɨti po'oso, au narubaityu tux, añekanaintyo nisɨboriki axɨpekuma axɨbama chiñemanauntupɨ ikokoromati Jesús.

²⁷Taruku nichakisɨrɨkɨ kuata niyachɨkoi. Ane auche chixhanukapɨ. Ichakisɨrɨka ui nisɨrɨpɨ uityo nichosɨ. Ane auche chixhakapɨ. Ichakisɨrɨka ui xhimianene tyopiki champɨ sɨrobo sɨtɨpɨñɨ.

²⁸Abikityo pikiataka yopɨrɨkɨ axɨba sane, naneneka kuantio ñonɨñɨ ñonxɨkapae tyakuma namanaiña axɨbama ikokoromati Jesús.

²⁹Axtɨ anati naki maunxokonoti, axɨñɨntyo ñaunxokoka. Axtɨ anati naki tapenekoti uimia, axɨñɨ ichɨborikia.

³⁰Axtɨ ane tyopikiche oñonkatɨ oemoantoe, axɨñɨ ipukɨnunka oboi axɨba uiche atusi ta chisusɨukapɨ.

³¹Axti Tupax Yaɨtoti Yɨriabux Jesús, axti naki koñotɨ manau ɨmoti ñome nanaiña naskɨbeka, tusiu ɨmoti ta ñemanauntu nisura.

³²Naukiche anankañɨ au Damasco, axti maniki yɨriabux baserebioti ɨmoti yarusɨrɨx yɨriabux Aretas sɨroma uiti masortaboka abeu tyurux naxipox axɨmanio poka, nauki aiñenomañɨ.

³³Ta amonkoma axɨmanuma uiche aikiaɨburumañɨ tyɨrɨpo onɨki naxipox axɨmanio poka, sane añekanañɨ mekukimia.