Read Chiquitano 2 CORINTIOS 5 Bible Online

2 CORINTIOS 5 - Chiquitano bible

2 CORINTIOS 5

¹Axoñɨ usaka takana taman pox ikuki axɨna kɨx, takana kɨpaux axɨna chɨbaserebiopɨ ñome sɨrɨmana naskɨbeka. Tɨtusiu oemo axtɨ axɨna kɨpaux iñaxio, ane uxiante uiti Tupax opobo au napes axɨna chɨmamesopɨ ñana, axɨna chɨtɨpɨ nisamuku mañoñɨnka.

²Sane naukiche oxonene suiñemo axɨna subakaiki kiana axɨna pox, takana tɨsuixhanka somenotɨ kiana axɨmanu suipo au napes.

³Sane, axtɨ kaɨburu okɨtɨpɨki axɨna nusaibi, chubasikiapɨ okɨsuasaka.

⁴Axɨna subakaiki kiana axɨna kɨpaux oxonene suiñemo ui suisucheki, ta chɨsuixhankapɨ akaɨbu suisɨtɨpɨki axɨna subaibi, ta suixhanka aɨro suisɨtɨpɨ kiatax nauki axɨmanu suisɨtɨpɨ axɨna koiño ñana sɨsio aɨbu axɨmanu iyebo sɨborikixh.

⁵Axti Tupax tyonenti naki uiche sopisamune axɨna sane, tyopiki toxio uiti suiñemo axti Espíritu Santo tyone uixh atusi ta ñemanauntu ñana axɨmanu toxiobo oemo.

⁶Sane naukiche taikiana somonkatɨ ɨmoti. Tusiu suiñemo axɨna suisɨborikiaiki au axɨna suisɨtɨpɨ subaka takana axtɨ ipenenoma somɨ iche pɨnanakiti Yɨriabux Jesús.

⁷Kaɨma champɨ nikiubu somɨ sumasarati, ta suisɨborikia tyopiki subaka aɨbu axɨna supakokonaunku.

⁸Tusiu suiñemo ta ñemanauntu ñana, sane naukiche suixhankapɨ somenotɨ iche pɨnanaki axɨna suisɨtɨpɨ kaɨma nauki somenotɨ po'oso somɨ chepeti Yɨriabux Jesús.

⁹Sane naukiche supapacheka nikiubu somɨ nauki uxia subaka au nastaxti Yɨriabux Jesús, sane axtɨ subakaiki auna o axtɨ tɨsomekatityo.

¹⁰Tyopiki namanaiña ñana uɨkatɨ uityusiankana oñɨ kauta nityɨmoxti Yɨriabux Jesucristo, nauki taikianati taman atoxi ɨmoti axɨna toxiobo, isiu axɨna isamutenti axtɨ axɨna uxia axtɨ axɨnaintyo chuxiampɨ naukiche anankaiki kɨtɨpɨti nisɨborikixhti.

¹¹Sane naukiche, axɨna tɨtusiu suiñemo ta nauki supanau ɨmoti Yɨriabux Jesús, supapacheka nikiubusomɨ nauki aikɨmɨnakama ñakiokoxɨma mañoñɨnka. Axti Tupax isuputarati nuxia somɨ, ixhankaityo nauki axaño ausuputakasomɨ.

¹²Chɨsupanityakapɨ axɨna uxia suisɨtɨpɨatoe tatityo, ta suixhanka nauki axaño aupukɨnunka suichopiki, nauki ane uiche tarruku naupukɨnunku suichopiki nauki apiñumu nuraxɨma axɨbama onkomatɨ ɨmomantoe axɨna chiñemanauntupɨ ane au nausasɨxɨma.

¹³Tyopiki axtɨ chuxiampɨ suichanu, ta ɨmoti Tupax, tapɨ axtɨ chɨsanempɨ, ta aume.

¹⁴Axɨna nukuasɨrɨkɨ ɨmoti Cristo sɨsio suisɨtɨpɨ naukiche tɨtusiu suiñemo koiñoti taman tyaku namanaiña, sane naukiche namanaiña koiñoma.

¹⁵Axti Cristo koiñoti tyaku namanaiña, nauki axɨbama sɨborikomainki tapɨ sɨborikoma ɨmomantoe, ta ɨmoti naki koiñoti auki sɨborikoti tato tyakuma.

¹⁶Sane naukiche, axɨsomɨ champɨti naki sopisuputakati takana ikuki axɨnantai kɨx, tɨkañe sane supakionko ɨmoti Cristo.

¹⁷Saneityo axtɨ anati naki anati aɨbuti Cristo tyonenti naki aɨbo nisunaunxti. Axɨba tɨnanankax chauki tomenotɨ. Nanaiña opisamunaño iyebo tato.

¹⁸Nanaiña axɨna sane tyone nisamukuxti Tupax, tyonenti naki auki nakaxti Cristo ane maximiakatax oemo aɨbutiatoe, yakɨpukuxti suiñemo suburaboi axɨna maximiakatax.

¹⁹Axti Tupax anankati aɨbuti Cristo ixhimiakatati aɨbutiatoe axɨba nomɨnantɨ ui namanaiña. Auki ikɨpuruti somɨ suburaboi axɨba omixhia nuraxti.

²⁰Sane naukiche, axɨsomɨ subaka auna au yakɨpukuxti Cristo, ta isiu takana axtɨ axti Tupax mankioti amopɨnanaki apasamu nuxia suichopiki. Ta sane au nɨrixhti Cristo, apasamu nuxia suiñemo apiñoxonkosaño sukarɨti Tupax.

²¹Axti Cristo champɨ nomɨnantɨ isamutenti. Ta otopiki, axti Tupax iñanati au nomɨnantɨ osoi, nauki uxia nusaka au nastaxti Tupax tyopikiti Cristo.