Read Chiquitano 2 CORINTIOS 7 Bible Online

2 CORINTIOS 7 - Chiquitano bible

2 CORINTIOS 7

¹Sanente, masarukityaiki, tyoneio axɨba ensɨmunu tɨkañe oemo. Sane naukiche uiñana oñɨ pese pɨnanaki nanaiña axɨba uiche aɨro nokɨtɨpɨ au nomɨnantɨ takanaintyo nuyausɨpɨ. Aɨbu numanaunku ɨmoti Tupax uisamunena nanaiña axɨna uxia nauki besɨro nosɨboriki.

²¡Apasusiu somɨ au nabausasɨ! Aɨbu namanaiña taikiana uxia soboi. Champɨti aɨbuche sopisamute axɨna chuxiampɨ ɨmoti. Champɨtityo naki ɨmoche supatachemakaka.

³Chɨsukanapɨñɨ aume axɨna sane nauki suraboi axɨna chuxiampɨ apisamute, sane takana tɨsukanañɨ aume, axaño abaka au niyausasɨ, nauki chepe nusaka nauki chepetyo okonka.

⁴Champɨ anekana sobi amopɨnanaki nanaiña surapoi ausukarɨ. Ipukɨnunka nuxia aboi. Ui axɨna suichakisɨrɨkɨ aruku nuxia iñemo tarukuityo nipukɨnunku.

⁵Naukiche tɨsopiñatai au Macedonia, chɨtochenkopɨ supachɨkoi, ta au nanaiñantai chichebopɨ suiñemo sopisamune supachɨkoi: chɨrɨri suiñemo ui namanaiñantai uixh suipixhuka.

⁶Tapɨti Tupax, axti naki uiche pukɨnuñama axɨbama sucheboma, suipukɨnunka tyopiki iñataiti Tito.

⁷Chɨtɨpɨ ui axɨna iñataiti, ta tyopiki taruku nipukɨnunkuxti autopiki. Uiti uraboiti suisukarɨ axɨna taruku nauxianka amasarasomɨ, urapoitityo suisukarɨ axɨna taruku nausucheki chakuñɨ. Ui nanaiña axɨna sane ipukɨnunka nuxia.

⁸Axtɨ ausucheka ui nixhakonomoso aume, champɨ nɨmoche sobi kaɨma. Axtɨ aukutanu oxonene iñemo tyopiki ui axɨmanu nixhakonomoso aume uixh ausucheka mɨmanantai naneneka.

⁹Kaɨma ipukɨnunka. Chɨtɨpɨ tyopiki axɨmanu nausucheki uixh, ta tyopiki ui axɨmanu nausucheki abekatato esati Tupax, sane naukiche axɨsomɨ champɨ kausane soboi aume.

¹⁰Tyopiki axɨna suchekixh ui noñemaxti Tupax kɨbɨso uixh nosɨboriki tyone ñana ane maximiakatax oemo, champɨ tyopikiche usucheka. Tapɨ axɨna suchekixh ikuki axɨna kɨx tyone konkox.

¹¹Axɨmanu nausucheki ui noñemaxti Tupax, ¡amasasatɨ kausane uixh! Uixh amontarabeka nuxia nauki amokɨma chakuñɨ. Uixh autɨborikia aupixhukaityo. Auki kaɨma auxianka amasarañɨ, autɨborikia chakuñɨ takisɨrɨti aboi maniki tyopikiche. Ui nanaiña axɨna sane apityusiankata ta champɨ kausane aboi.

¹²Sanente, naukiche xhakonomoka aume axɨmanu kichonimiakax, chɨtɨpɨ tyopikiti maniki chuxiampɨ uiti axtityo maniki takisɨrɨti uixh, ta nauki atusi sukarɨti Tupax axɨna nausucheki suichaku.

¹³Tyone uixh taruku suipukɨnunku. Taruku suipukɨnunku ui nipukɨnunkuxti Tito, tyopiki aruku tato nuxia ɨmoti aboi.

¹⁴Axɨñɨ tɨsukanañɨ ɨmoti Tito taruku nipukɨnunku aboi, chɨmunataipɨ nisura. Tyopiki nanaiña axɨna sukanasomɨ aume ta ñemanauntu, saneityo ñemanauntu axɨmanu sukanasomɨ ɨmoti Tito: axɨsomɨ taruku suipukɨnunku aboi.

¹⁵Axti kaɨma taruku naukuasɨrɨkɨ ɨmoti axtɨ akionotiyɨ ta namanaiña apikokota nuraxti apasukiukatiyo aɨbu taruku napanaunku ɨmoti.

¹⁶¡Ipukɨnunka tyopiki kaɨma ñonkatɨ nuxia aume!