Read Chiquitano GÁLATAS 1 Bible Online

GÁLATAS 1 - Chiquitano bible

GÁLATAS 1

¹Axɨñɨ Pablo yaka isiuti Jesucristo, chɨtɨpɨ ui niyakɨpuku mañoñɨnka champɨityo axtɨ ui mañoñɨnka aiñanamañɨ, ta uiti Jesucristo uitityo Tupax naki Uyaɨ naki uiche asɨboriti tato Jesús,

²chepema namanaiña axɨbama usarukityaiki supakionko tanu aume axɨbama ikokoromati Jesús au Galacia.

³Tari uiti Tupax naki Uyaɨ axtityo Yɨriabux Jesucristo tari uimia aukurusɨka taikianaintyo aixhimiakama nomɨnantɨ aboi.

⁴Ityoximianatiyɨ Jesús ɨmo nikonkoxti yotopiki nomɨnantɨ osoi, nauki aixhimiakati oemo nomɨnantɨ iku axɨna kɨx au axɨba naskɨbeka kaɨma, takana noñemaxti Tupax naki Uyaɨ.

⁵¡Yarusɨrɨxti Tupax ɨmo nanaiña naskɨbeka! Amén.

⁶Taruku nisɨtobɨkɨ aboi tyopiki axaño kontoapae amekatɨ iche pɨnanakiti Tupax, naki uiche aityasuruti año axɨna ityusiankatati uiti Cristo nipukɨruxti, auki amekatɨ isiu kiatax manunekatax.

⁷Ñemanauntu champɨ kiatax manunekatax. Ta aboma axɨbama uiche aiñamesokoma amopɨnanaki, xhanxɨmaintyo aikɨmɨnakama axɨmanu nuraxti Cristo.

⁸Axtɨ anati naki kiatax ñanunekakaxti aume axɨba omixhia manityakax ñopɨnanaki axɨba tɨsupanunekaka aume, tari uiti Tupax aipiauxamanati, sane axtɨ axɨñɨ saneityo axtɨ tamanti ángel naki kuatati auki napes.

⁹Chauki tɨsuburapoi tɨkañe ausukarɨ axɨna sane kaɨma surapoi tatityo: Axti naki urapoiti ausukarɨ kiatax manityakax kɨtɨpɨti Jesucristo, axɨna chisiukipɨ takana axɨna surapoi ausukarɨ tɨkañe, tari pauxamanati uiti Tupax.

¹⁰Axɨñɨ chiyapachekapɨ nauki uxia nastaxɨma mañoñɨnka iñemo, ta yapachetio nauki uxia nisɨboriki au nastaxti Tupax. Chiyapachetiopɨ uxia nisɨboriki aɨbu mañoñɨnka. ¡Axtɨ sane sobi, chɨtɨpɨ ɨmoti Cristo niyaserebiki!

¹¹Tari atusi aume axɨna sane, masarukityaiki: axɨba omixhia manityakax surapoi chɨtɨpɨ niñapanaunku mañoñɨnka.

¹²Chiyebopɨ sobi ui ñanunekaka mañoñɨnka, ta uiti Jesucristo aityusiankati sukarɨñɨ.

¹³Axaño apipiate kausane tɨkañe nisɨboriki naukiche ikokota axɨna ikokotama axɨbama judíos, kausaneityo naukiche anankañɨ isiuma aɨbu nichɨbori axɨbama ikokoromati Tupax ixhankaityo iñamesoko axɨna ñakokonaunkuxɨma.

¹⁴Auki axɨmanu ikokota chepema axɨbama judíos, champɨti iyebo uiti takana axɨñɨ axɨbama isunaunsapa, tyopiki axɨñɨ isamukio nanaiña axɨba yacheataxɨma aisamunema axɨbama iyaɨtaiki.

¹⁵Naukiche anankañɨnki kɨtɨpɨ nipiakɨ, tɨtusiu ɨmoti Tupax isane yachɨkoboiboñɨ uiti, ityasurutiñɨ ui noñemaxti,

¹⁶ui nipukɨruxti ityusiankatati Aɨtoxti sukarɨñɨ, nauki suraboi axɨba omixhia nuraxti axɨpekuma axɨbama chɨtɨpɨ judíos. Tapɨ axɨñɨ chiyakapɨtɨ xhankiyo pɨnanaki mañoñɨnka.

¹⁷Champɨityo axtɨ yakatɨ au Jerusalén yasarama axɨmanuma kusɨrɨboma amonkoma isiuti Jesús xhopɨnanakiñɨ. Isiukai yakatɨ au Arabia, auki ta'a yasɨkɨbɨka tato au Damasco.

¹⁸Yopɨrɨkɨ trex naskɨbeka yakatɨ au Jerusalén nauki isuputarati Peru, akamanu chepeti anankañɨ quince naneneka.

¹⁹Chiyasakapɨma axɨmanuma makiataka apóstoles, kunauntañantiatai Santiago yasakati yarukityoxti Yɨriabux Jesús.

²⁰Au nɨrixhti Tupax nanaiña axɨna sukanañɨ iku axɨna nixhakonomoso aume ta ñemanauntu.

²¹Auki yɨrotɨ au Siria yɨrotityo au Cilicia.

²²Tapɨ axɨmanuma usarukityaiki axɨbama ikokoromati Cristo axɨmanuma po'osoma au Judea chisuputarapɨmañɨ.

²³Onkoimiantai axɨba manityakaka sane: “Axti naki tɨkañe anankati usiu aɨbu nityɨborixhti oemo, tapɨ kaɨma manunekanati axɨba omixhia manityakax axɨba tɨkañe xhanxtipɨ aiñamesokoti.”

²⁴Auki machampienkanama ɨmoti Tupax ichopikiñɨ.