Read Chiquitano EFESIOS 1 Bible Online

EFESIOS 1 - Chiquitano bible

EFESIOS 1

¹Axɨñɨ Pablo, yaka isiuti Jesús ui noñemaxti Tupax, nixhakionko ɨmo namanaiña axɨbama auki Éfeso axɨbama ikokoromati Jesús aboma chepeti.

²Tari uiti Tupax naki Uyaɨ axtityo Yɨriabux Jesucristo aukurusɨka uimia taikianaintyo aixhimiakama nomɨnantɨ aboi.

³Taikiana yarusɨrɨx nɨrixhti Tupax Yaɨtoti Yɨriabux Jesucristo, tyopiki aɨbuti Cristo ukurusɨka uiti aɨbu nanaiñantai pukɨnunkux auki napes.

⁴Samamekana oñɨ uiti Tupax aɨbuti Cristo aukiapae tɨkañe maɨbo uxiane axɨna kɨx, nauki tapɨ ane nomɨnantɨ osoi tapɨ anentyo kausane nosɨboriki au nastaxti.

⁵Samamekana oñɨ tɨkañe nauki aɨtoxti oñɨ, auki nakaxti Jesucristo, naki esache bakɨpukux oemo, takana noñemaxti ui nipukɨruxti.

⁶Isamutenti axɨna sane nauki taikiana machampienka ɨmoti Tupax tyopiki niyarusɨrɨkɨ nipukɨruxti, axɨna uiche aikunusɨankanati oñɨ uiti Aɨtoxti naki taruku nikuaxti ɨmoti.

⁷Aɨbuti Cristo ane maximiakatax oemo ui notoxti, axɨna maximiakatax ñome nomɨnantɨ oboi niyarusɨrɨkɨ nipukɨruxti.

⁸Tyopiki nikonkoxti Cristo kɨtɨpɨ kurusɨx, axti Tupax xhimiakana uiti oemo axɨba nomɨnantɨ osoi añekanaintyo oñɨ uiti ñopɨnanaki nanaiña axɨba chomixhampɨ uisamukio. Axɨna sane isamutenti ui taruku ñakumananaunkuxti. Uityo taruku ñapanaunkuxti,

⁹tusiankana uiti Tupax usukarɨ axɨmanio nixhantɨmoti aisamunenti axɨba amonkio umanekana uiti axɨna kaɨma xhanxti aisamunenti aɨbuti Cristo,

¹⁰axtɨ iñatai ñana axɨmanu mapakɨmunkutux. Axɨna nixhantɨmoti Tupax ta nauki aiyoberabatati nanaiña axɨba nisamukuxti ikuki axɨna kɨx auki napes nauki aityoximiati mekuti Cristo.

¹¹Aɨbuti Cristo, uiti Tupax samamekana oñɨ aukiapae tɨkañe nauki basuriu aruki axɨmanu toxiobo uiti oemo, sane takana nixhankaxti Tupax aisamunenti, tyopiki nanaiña isamunenti auki noñemaxti.

¹²Axti Tupax xhanxti nauki axoñɨ axɨbama judíos ukusɨrɨka uikokoroti Cristo, nauki namanaiña machampienka tyopiki niyarusɨrɨkɨ nɨriakaxti.

¹³Chapie ɨmoti Cristo, axaño amonkoi axɨmanio ñemanauntu omixhia manityakax, axɨmanu uxia manityakax ɨmo maximiakatax aume, sane apasutiu napakokonaunku, sɨro aukɨtɨpɨ axɨmanu uiche atusi ta aɨtoxti Tupax año aɨbuti Espíritu Santo axti maniki ɨriotɨ tɨkañe uiti.

¹⁴Axti Espíritu Santo tyonenti kusɨrɨboti uiche atusi ta ñemanauntu toxio ñana axɨmanu ɨriotɨ uiti Tupax, axtɨ tɨtane maximiakatax ɨmo namanaiña oemo axɨbama aɨtoxti, nauki namanaiña machampienka tyopki yarusɨrɨx nɨriakaxti.

¹⁵Axɨñɨ ipiate ta apikokokati Yɨriabux Jesús kuasɨrɨmaintyo aume namanaiña axɨbama ikokoromati Jesús,

¹⁶chɨtochenkopɨ niñachampienkaka ɨmoti Tupax autaku, taikiana xhakionoñɨ abapa axtɨ xheanka.

¹⁷Xhankikia pɨnanakiti Tupax ɨmoti naki Yɨriabux oemo Jesucristo, pɨnanakiti yarusɨrɨx Uyaɨ, nauki uiti atoxi aume axti espíritu ɨmo mapanaunkux, nauki atusi aukɨtɨpɨ, sane ausuputarati nuxia.

¹⁸Xhankikiaityo pɨnanakiti Tupax nauki aye nuxia aboi kausane niyarusɨrɨkɨx axɨmanu maximiakatax ɨmoma axɨbama ikokoromati Tupax.

¹⁹Tarukapae niyarusɨrɨkɨx champɨityo nityakɨrux axɨna nɨriakaxti, tyone axɨna ane okɨtɨpɨ axɨbama uikokokati Cristo. Axɨna noñemaxti Tupax tyone axɨmanu ityusiankatati aɨbu taruku nikusɨuxti

²⁰naukiche sɨborikoti tato Cristo uiti auki tɨmonsoti uiti au nepanaunkuxti au napes,

²¹ui axɨmanu yarusɨrɨx nɨriakaxti, toxio uiti Tupax ɨmoti Cristo ɨriakaboti pɨrɨkɨ namanaiña axɨbama machoboreka axɨbamaintyo ane nɨriakaxɨma iku axɨna kɨx takanaintyo au axɨmanu iyebo kɨx kuabotɨki.

²²Nanaiña omeno uiti ñokiana nipopesti Cristo, Yɨriabuxti uiti ɨmoma nanaiña axɨbama ikokoromati Cristo.

²³Axɨbama ikokoromati Cristo tyonema nikɨtɨpɨxti Cristo, axɨbama yasutiuma nanaiña axɨna ane uiti. Tyopiki uiti Cristo nanaiña omenotɨ au nityakɨrux.