Read Chiquitano EFESIOS 4 Bible Online

EFESIOS 4 - Chiquitano bible

EFESIOS 4

¹Axɨñɨ yaka auna amanañɨmpo tyopiki yaserebikia ɨmoti Yɨriabux, sukanañɨ aume apasamu nuxia apikoñoko nausɨboriki, takana axɨbama samamekanama uiti Tupax, sane tana axaño.

²Tapɨ amonkatɨapae aumeampatoe, tari taruku napakumananaunku. Tapɨ apapataikiatai aɨbu makiataka, aɨbu napakumananaunku amasasatɨ autakuapatoe.

³Apiña nuxia nauki chepe nabaka ta tyone axɨna noñemaxti Espíritu Santo, aɨbu axɨna uxia aboi aumeampatoe tyone axɨna uiche chepe nabaka namanaiña.

⁴Ane kunauntaña kɨtɨpɨx kunauntañantityo Espíritu Santo, sane takanati Tupax ityasuruti año ɨmo axɨmanu kunauntaña toxiobo ñana maximiakatax aume.

⁵Anati kunauntañati Yɨriabux oemo, kunauntaña makokonaunkux, kunauntaña maunimiakax.

⁶Anati kunauntañati Tupax naki Uyaɨ, anati onɨ namanaiña, nanaiña axɨna uxiante ui namanaiña tyone nisamukuxti anatityo aɨbu namanaiña.

⁷Taikiana ɨmoti taman toxio mapanaunkubu uiti Cristo axɨna nixhantɨmoti aityoximiati oemo.

⁸Sane naukiche nantɨ axɨmanu Nikorox sane: “Sɨrotitɨ au napes sɨromatɨ uiti axɨbama amonkoma amanamampo, toxio uiti ñapanaunkubu mañoñɨnka.”

⁹¿Isane axɨmanu sane “sɨroti au napes”? Nantɨ ta kusɨrɨbo ayetitɨ iku axɨna kɨx.

¹⁰Axti maniki kuatati iku axɨna kɨx tyonentiatoe maniki sɨrotitɨ kauta axɨna taruku napetaiki napes, nauki aiñatamakati au nanaiña napes ikunaintyo kɨx.

¹¹Tyonenti naki uiche aboma axɨbama toxio ɨmoma aɨromatɨ isiuti Jesús. Makiataka, anityama ui noñemaxti Tupax, makiataka uraboimia axɨba omixhia nuraxti Jesús, makiataka nauki asaramatɨ tyaku namanaiña makiataka nauki anunekama.

¹²Sane manunekanati ɨmo namanaiña axɨbama uikokokati Jesús, ɨmo axɨmanu niyachɨkoimia tyaku makiataka, ta tyone nikɨtɨpɨxti

¹³chepe axtɨ tɨnamanaiña axoñɨ ui axɨna numakokonaunku chepe nusaka chepeti ui axɨna usuputakati Aɨtoxti Tupax, sane aye osoi besɨro nosɨboriki takana nisɨborikixhti Cristo.

¹⁴Chɨtɨpɨ takanaiki masiomanka nusaka, axɨbama chɨsɨsiopɨma aɨbu tamantai nixhankaxɨma sɨromatɨatai tanu ui nimiakiɨtɨ kiatax manaunekatax, tapenekoma ui axɨbama sɨromtɨ yusiuki axɨba chɨbesɨropɨ kutubiuka.

¹⁵Axɨmanu makumananaunkux tari uixh taikiana ñemanauntu axɨna numanityaka, nauki au nanaiña axɨna uisamute isiu nosɨboriki takana nisɨborikixhti Cristo, naki Yɨriabux ɨmoma axɨbama ikokoromati.

¹⁶Axti Cristo tyonenti naki uiche chepe nakaxɨma axɨbama ikokoromati, isiu axɨna toxio ɨmoma aipiama aisamunema, uitiyo taikianati taman pukɨnuñanti aɨbu niyachɨkoiti, nauki axɨbama ikokoromati Jesús besɨro nisɨborikixhimia ui ñakumananaunkuxɨma ɨmomantoe.

¹⁷Tyone kaɨma axɨna sukanañɨ aume nixhakɨpuku au nɨrixhti Yɨriabux Jesús: tapɨ ausɨborikiaiki takana axɨbama chikokoromatipɨ Tupax, tyopiki axɨma sɨborikoma yupu axɨba chomixhampɨ ñapanaunkuxɨma

¹⁸champɨ isane ñapanaunkuxɨma, chiyebpopɨ uimia axɨmanu sɨborikixh kuatɨ esakiti Tupax, tyopiki champɨ nipiakaxɨma ui nityai nausasɨxɨma.

¹⁹Champɨ nikɨsoxɨma, isamutema aruki nanaiñantai axɨba chomixhampɨ au nisɨborikixhimia, isamutemaintyo aruki nanaiñantai nomɨnantɨ.

²⁰Tapɨ axaño chityonempɨ axɨna manunekatax aume kɨtɨpɨti Cristo nauki sane nausɨboriki,

²¹tyopiki axaño amonkoi axɨmanio omixhia manityakax kɨtɨpɨti, apipiaka apisamune nausɨboriki takana yakɨpukuxti, isiuki axɨmanu ñemanauntu ñanunekasaxti.

²²Sane naukiche, tapɨ ausɨborikiaiki takana nausɨboriki tɨkañe, naukiche axɨmanio chomixhampɨ nauxiantɨmo apiñata yusiuki nausɨboriki.

²³Apisamuse kiatax napakionko, axtɨ amastai nisɨborikixhti kiatax,

²⁴apiña tato aukɨtɨpɨ axɨna aɨbo nausɨboriki, uxiante takana nakaxti Tupax axɨna tusiankana ui axɨna besɨro nausɨboriki champɨ kausane, isiuki axɨna ñemanauntu.

²⁵Sane naukiche, tapɨ abasikia aɨbu napapantu, ta amukanaño axɨna ñemanauntu ɨmoti auposapa, tyopiki namanaiña axoñɨ tyone nenaxi taman kɨtɨpɨx.

²⁶Axtɨ autɨborikia, tapɨ chebo aboi apisamune nomɨnantɨ uixh, tapɨ nanaiña sapes nautɨbori,

²⁷tapɨ chebo aboi ɨmoti chobores autapene uiti.

²⁸Axti naki kusɨpɨx tɨkañe, kaɨma tari iñokonati nikusɨpɨkɨxti yapacherati yachɨkoboiboti axɨna uxia, oboi ne'estiatoe nauki ane toxiobo uiti ɨmo axɨbama taruku nityakisɨrɨkɨxɨma.

²⁹Tapɨ apanityaka axɨba chomixhampɨ, taikiana apanitya axɨba omixhia manityakax axɨba oboiche uxia nisɨboriki namanaiña nauki uxiaintyo ɨmoma axɨbama onsapetioma.

³⁰Tapɨ sucheboti aboi nesaxti Espíritu Tupax, naki uiche aiñanti aukɨtɨpɨ nɨrixhti axɨna uiche atusi ta axaño tyonema axɨbama aɨtoxti Tupax au axɨmanu nanenes ñana ñemanauntu ane maximiakatax aume.

³¹Apiñoko nausucheki chepe nautɨbori. Tapɨ aburatokikia ɨmo makiataka. Tapɨ abasikia apisamune axɨba chomixhampɨ.

³²Taikiana uxia aboi aupuapatoe, apixhimiaka axɨba chomixhampɨ aboi aumeampatoe, takanati Tupax xhimiakana tato uiti nomɨnantɨ aboi tyopikiti Cristo.