Read Chiquitano FILIPENSES 1 Bible Online

FILIPENSES 1 - Chiquitano bible

FILIPENSES 1

¹Masarukityaiki axɨbama ikokoromati Jesús auki Filipos: Axɨñɨ, Pablo chepeti Timoteo, axɨbama supaserebikia ɨmoti Jesucristo, supakionko tanu aume, axɨbama ikokoromati Tupax tyopiki abaka chepeti Jesucristo. Supakionkoityo ɨmoma axɨbama mayɨriabuka aume, ɨmomaintyo axɨbama baserebioma aume au nɨrixhti Cristo.

²Tari axti Tupax naki Uyaɨ axtityo Yɨriabux Jesucristo aikunusɨankanama año taikianaintyo uxia uimia aume.

³Taikiana ñachampienka ɨmoti Tupax axtɨ xhakionkañɨ abapa.

⁴Axtɨ xheanka, xhankikia aɨbu nipukɨnunku tyaku namanaiña.

⁵Tyopiki amonkaño chepeñɨ aburaboi axɨba omixhia manityakax aukiapae axɨmanu nanenes naukiche amonkoi chepe axɨna nanenes kaɨma.

⁶Tusiu iñemo ta axti Tupax, isamutenti axɨba omixhia yachɨkoiti aupu chepe axtɨ kuatati tato Jesucristo iku axɨna kɨx.

⁷Uxia axɨna nixhakionko sane abapa namanaiña axaño, tyopiki taruku naukuasɨrɨkɨ iñemo, tyopiki axaño abaka chepeñɨ ɨmo niyachɨkoi ui ñakumananaunkuxti Tupax axɨna toxio uiti iñemo. Kauta anankañɨ amanañɨmpo sukarɨmaintyo axɨbama mayɨriabuka, axaño amonkatɨ nantax iñemo nauki sukanañɨ axɨna ñemanauntu oboi axɨba omixhia manityakax.

⁸Tusiu ɨmoti Tupax axɨna taruku nisucheki abapa, tarukuityo naukuasɨrɨkɨ iñemo ui axɨna nixhakumananaunku toxio iñemo uiti Cristo Jesús.

⁹Xhankikia au nixheanka tari axɨna ñakumananaunkuxti aume taikiana asunau abaxɨpeku, tari aityoximiati Tupax aume apapanaunkubu tari aye nuxia aboi,

¹⁰nauki apipia apapacherio axɨna uxia. Sane uxia ñana nausɨboriki, nauki tapɨ autapeneka chepe axtɨ kuati tato Cristo.

¹¹Tyopiki uiti Jesucristo axaño apisamute axɨna uxia, nauki namanaiña anauma ɨmoti Tupax sane yarusɨrɨxtyo nɨrixhti uimia.

¹²Masarukityaiki, ixhanka nauki atusi aume axɨna isamutema iñemo, ñemanauntu axɨmanio sane payurara iñemo suraboi axɨba omixhia manityakax.

¹³Namanaiña axɨmanuma asaramatɨ tyaku nipo mayɨriabuka, takanaintyo makiataka tusiu ɨmoma yaka auna amanañɨmpo ta tyopiki yaserebikia ɨmoti Cristo.

¹⁴Ui axɨna astaimia amanañɨmpo, sɨrɨmanama axɨbama ikokoromati Jesús iñatama nuxia uraboimia axɨba omixhia manityakax, champɨ nixhukuxɨma au nɨrixhti Yɨriabux Jesucristo.

¹⁵Ñemanauntu aboma axɨbama urapoimia axɨba omixhia manityakax tyopiki ubatioma axɨna niyachɨkoi o tyopiki tɨborikomantai suatañɨ, abomaintyo makiataka isamutema sane tyopiki ñemanauntu xhanxɨma anunekama.

¹⁶Aboma makiataka manunekanama kɨtɨpɨti Cristo tyopiki ñakumananaunkuxɨma tyopiki tusiu ɨmoma ta uiti Tupax aikɨpurutiñi nauki xhanuneka auna axɨba omixha manityakax.

¹⁷Tapɨ makiataka isamutema tyakumantoe, chiñemanauntupɨ nuraxɨma, ta tyopiki xhanxɨma aiñama uɨbo nichakisɨrɨkɨ axɨna yaka auna amanañɨmpo.

¹⁸Tapɨ ane nɨmoche osoi, axtɨ ñemanauntu nuraxɨma o chiñemanauntupɨ, aboma urapoimia omixhia nuraxti Cristo, ui axɨna sane taruku nipukɨnunku. Ipukɨnunkaiki nuxia,

¹⁹tusiu iñemo oboi nameanka, uityo noñema nesaxti Espíritu Jesucristo, kontoatai ñana ichaesɨbuka uimia.

²⁰Ñonkatɨ nuxia ta chisɨsokapɨ oboi nanaiña axɨba isamukio. Axtɨ isɨborikiaiki o axtɨ tisonka, taikiana ixhanka isamune nanaiña aɨbu narukux iñemo, nauki chopikiñɨ namanaiña anityama kɨtɨpɨ axɨna niyarusɨrɨkɨxti Cristo.

²¹Axtɨ isɨborikia, ixhanka nauki yaserebi ɨmoti Cristo, tapɨ axtɨ isonka tyone axɨna iyebo sobi.

²²Axtɨ isɨborikiaiki aɨbu axɨna nisɨtɨpɨ, axɨna niyachɨkoi taruku nɨmoche iku axɨna kɨx, sane naukiche chɨtusiupɨ iñemo ñakusane axɨna uxia.

²³Ñemanauntu chɨtusiupɨ nuxia iñemo isane axɨpekuki axɨmanio tox uxia iñemo: tyopiki axtɨ isɨborikiaiki, yaserebikia ɨmoti Tupax iku axɨna kɨx. Tapɨ axtɨ isonka yɨkatɨ chepeti Cristo au napes, tyone axɨna taruku nixhanka.

²⁴Tusiuityo iñemo taruku niyaserebiki aume axtɨ isɨborikiaiki iku axɨna kɨx.

²⁵Tusiu nuxia iñemo nanaiña axɨna sane, ta yasikiaiki auchepe nauki yasaratɨ autaku, sane taruku naupɨkɨnunku aɨbu napakokonaunku.

²⁶Sane axtɨ yaka tatityo auchepe, sobi iñata uɨbo napakokonaunku sane taruku naupukɨnunku aɨbuti Cristo Jesús.

²⁷Tyoneantai axɨna sukanañɨ aume: apiña nausɨboriki isiuki axɨba omixhia nuraxti Cristo. Apisamuse sane axtɨ yɨkatɨ tanu o chiyɨkapɨtɨ yasaraño, ixhanka atusi iñemo ta namanaiña axaño chepe naka nausɨboriki chepetyo napakionko au nanaiña, apiñata nuxia nauki aburaboi axɨmanio omixhia manityakax,

²⁸tapɨ aupixhuka ñɨnana axɨbama tɨborikomantai aume. Axtɨ apiñata nuxia, amastai ñana au nityakɨrux iñaxioma tatityo, tapɨ axaño ane maximiakatax aume, tyopiki sane nixhankaxti Tupax.

²⁹Ui noñemaxti Tupax toxio aume nauki apikokoroti Cristo, nauki autakisɨrɨkaityo tyopikiti.

³⁰Axaño autakisɨrɨka ñana takana axɨñɨ, tɨtusiu nuxia aume ta ichakisɨrɨka yakaiki auna aɨbu nichakisɨrɨkɨ.