Read Chiquitano FILIPENSES 2 Bible Online

FILIPENSES 2 - Chiquitano bible

FILIPENSES 2

¹Axɨñɨ tusiu iñemo toxio uiti Cristo aume noñemaxti nauki aruku ɨmo makiataka aboi. Axɨna napakumananaunku uixh pukɨnuñama makiataka, tusiu iñemo ta namanaiña anati Espíritu Santo aukɨtɨpɨ tarukuityo naupukɨru tyaku makiataka.

²Sane naukiche xhankikia amopɨnanaki apasamu nuxia iñemo, tari taruku nipukɨnunku aboi, tari taikiana uxia aboi aumeampatoe, taikianaintyo taruku naukuasɨrɨkɨ aumeampatoe. Tari chepe napakionko, axtɨ ane nauxiantɨmo tari tyone nixhantɨmoma namanaiña.

³Tapɨ ane isane apisamute tyopiki chuxiampɨ aboi ɨmo makiataka o tyopiki au napakionko champɨti kiatax amopɨrɨkɨ. Tapɨ sane aboi, amasasatɨ ɨmo makiataka takana axtɨ taruku nipiakaxɨma amopɨnanaki.

⁴Tapɨ anati naki asaratitɨ tyakutiatoe, tari asaratitityo tyaku namanaiña.

⁵Apiña napakionko takana ñakionkoxti Cristo tɨkañe:

⁶Axti Cristo tyonentiatoe Tupax, chubatiotipɨ niyarusɨrɨkɨxti.

⁷Ta chixhanxtipɨ isiu nakaxti, isamutenti takana axoñɨ, kumanakaxti ɨmo namanaiña.

⁸Takanati ñoñɨnx, champɨ nɨriakaxti makokonaunxti ɨmoti Tupax chepe nikonkoxti kɨtɨpɨ kurusɨx.

⁹Sane naukiche axti Tupax toxio uiti ɨmoti yarusɨrɨx nɨriakaxti tarukuityo nɨriaka nɨrixhti uiti,

¹⁰nauki kutakikibo axɨmanu nɨrixhti toxio ɨmoti Jesús, namanaiña achesoimia axɨbama aboma au napes, ikuki axɨna kɨx axɨbamaintyo aboma kiana kɨx,

¹¹nauki namanaiña asuputaramati ta tyonenti Cristo Yɨriabuxti, nauki achampienkama ɨmoti Tupax naki Uyaɨ.

¹²Masarukityaiki, naukiche anankañɨ abaxɨpeku, taikiana apikokota nisura. Axɨna kaɨma yaka iche amopɨnanaki apikokosoñɨ nuxia. Sane naukiche ui napanaunku ui nameanka ɨmoti Tupax, apiña nuxia nauki aye aboi axɨmanu maximikatax uiti Tupax aume.

¹³Tyopiki ui noñemaxti Tupax apisamute axɨna besɨro nausɨboriki, isamutenti sane tyopiki sane nixhankaxti.

¹⁴Apisamuse nanaiña tapɨ apanityaka axɨna chuxiampɨ kɨtɨpɨti kiatax tapɨ aburatokikia,

¹⁵nauki tapɨ apisamute nomɨnantɨ tapɨ anatityo naki iñensɨmunuti año yotopiki chɨtamampatai. Iku axɨna kɨx kauta sɨrɨmanama axɨbama chuxiampɨ nisɨborikixhimia tarukuityo nomɨnantɨ uimia. Axaño tyopiki aɨtoxti Tupax año, tapɨ apisamukio axɨmanio nomɨnantɨ apisamuse besɨro nausɨboriki sukarɨ makiataka.

¹⁶Tapɨ apiñokota napakokonaunku ɨmo axɨba omixhia manityakax uiche osɨborikia. Sane, axtɨ kuatati tato Cristo taruku nipukɨnunku autopiki, auki atusi iñemo axɨna niyachɨkoi chɨmunataipɨ.

¹⁷Axaño apaserebikia amonkatɨtyo ɨmoti Tupax, tyone takana axtɨ napakumanata. Axtɨ ityabairomañɨ, tyoneintyo aruki axɨmanu makumanatax ɨmoti Tupax. Axtɨ sane ñana, taruku nipukɨnunku, ixhanka aupukɨnunka chepeñɨ.

¹⁸Aupukɨnute nuxia chepeñɨ.

¹⁹Ñonkatɨ ɨmoti Yɨriabux Jesús, nauki ikɨpuruti Timoteo tanu aubesa, nauki sane ipukɨnu axtɨ ipiate kausane nausɨboriki.

²⁰Kunauntañati Timoteo naki taruku nonxɨkɨxti autaku, tarukuityo naukuasɨrɨkɨ ɨmoti takana axɨñɨ.

²¹Makiataka onxɨxɨma tyakumantoe, champɨ nɨmoche uimia axɨna uxia ɨmoti Jesucristo.

²²Axaño tusiu aume axɨna besɨro nisɨborikixhti Timoteo tusiuityo aume ta anankati chepeñɨ ɨmo axɨna niyachɨkoi takana axtɨ isaɨti.

²³Sane ixhanka ikɨpuruti tanu aubesa, axtɨ tɨtusiu iñemo axtɨ ichaesɨbuka ñana o champɨ,

²⁴axɨñɨ ñonkatɨ ɨmoti Tupax ta konto chebo uiti yɨrotɨ tanu yasaraño.

²⁵Isiuityo uxia au nixhakionko ikɨpuruti tanu naki usaruki Epafrodito, naki anankati chepeñɨ ɨmo niyachɨkoi, naki aboi apikɨpuruti tauna yesañɨ nauki asaratitɨ chakuñɨ.

²⁶Tarukapae nisuchekixhti abapa, onxɨxɨtiapae tyopiki apipiate ta maunxokonoti.

²⁷Ñemanauntu, anankati taruku ɨmoti tisaipɨ akonti. Ta axti Tupax taruku nipukɨruxti tyakuti, takanaintyo chakuñɨ, tapɨ tarukapae nisucheki pɨrɨkɨ axɨna anankañɨantai aɨbu nisucheki.

²⁸Sane naukiche isiukai ikɨpukati tanu abaxɨpeku, nauki axaño aupukɨnunka axtɨ amasakati tatityo nauki axɨñɨ tapɨ tarukapae nisucheki.

²⁹Apasusiusuti aɨbu naupukɨnunku au nɨrixhti Cristo. Akuasɨrɨma aume axɨbama takana axɨna nakaxti,

³⁰tyopiki niyachɨkoiti ɨmoti Cristo tisaipɨ akonti. Añekana nisɨborikixhti, tɨsaimiampɨ akonti, ui axɨna anankati asaratitɨ chakuñɨ tyopiki axaño chamonkañopɨ amasarañɨ.