Read Chiquitano FILIPENSES 3 Bible Online

FILIPENSES 3 - Chiquitano bible

FILIPENSES 3

¹Sane naukiche, masarukityaiki, aupukɨnu tyopiki abaka chepeti Yɨriabux Jesús. Chubatapɨ iñemo ikonomo tatityo axɨna tikonomota aukutanu aume, tyopiki aume taruku nɨmoche.

²¡Amasasai nuxia ñɨnanama axɨmanuma mañoñɨnka chuxiampɨ nisɨborikixhimia, tyopiki xhanxɨma nauki circuncidabo año!

³Tyopiki axɨbama ñemanauntu circuncidaboma ta axoñɨ, axɨbama ui noñemaxti Espíritu Santo uiñanaunkati Tupax tarukuityo nupukɨnunku tyopiki usaka chepeti Jesucristo. Choñonkapɨtɨ ñome axɨba ausɨratai ikuki axɨna kɨx.

⁴Axɨñɨntyo ane tyopikiche ñonkatɨ ɨmo axɨmanu circuncisión. Champɨti kiatax xhopɨnanakiñɨ tyopikiche onkotitɨ ñome axɨmanio ausɨratai:

⁵circuncidaboñɨ tɨkañe naukiche tɨtabe ocho naneneka iñemo niyaka iku kɨx, axɨñɨ nityakɨbaɨtuxɨma axɨbama auki Israel, axɨbama iyaɨtaiki tyonema aɨtoxti Benjamín, axɨbama iyaɨtaiki tyonema hebreoxɨma. Ɨmo axɨmanu makokokox ɨmo axɨmanu bakɨpukux ɨmoma axɨbama judíox, anankañɨ chepema axɨbama fariseos.

⁶Taruku niñonxɨkɨ ikoko axɨmanu bakɨpukux uiti Moisés sane naukiche tɨkañe taruku nichɨbori kuatama axɨbama ikokoromati Jesús. ¡Champɨ urapoboiboma sɨtɨpɨñɨ axɨñɨ taruku niñonxɨkɨ isamune nanaiña axɨmanu bakɨpukux uiti Moisés!

⁷Nanaiña axɨna tɨkañe taruku nikuax iñemo, tapɨ kaɨma tyopikiti Cristo, au nixhakionko champɨki nanenekiche iñemo.

⁸Nanaiña axɨmanu onkono sobi, tyone takana semenux iñemo, axtɨ ichepekata axɨna yarusɨrɨx nuxiantux tyopiki isuputakati Cristo Jesús naki Yɨriabuxti iñemo. Tyopikiti Cristo ensoro sobi nanaiña, ityobo kaɨma yaka chepeti.

⁹Chɨtɨpɨ ui axɨna uxia isamute isiuki axɨmanu bakɨpukux, ta tyopiki axɨmanu ikokokati Cristo, axɨna toxio uiti Tupax uxia nosɨboriki isiuki nixhakokonaunku.

¹⁰Axɨna nixhantɨmo kaɨma ta nauki isuputarati Cristo, nauki ñonkisio sɨtɨpɨñɨ nɨriaka nisɨborikixhti tato nauki ichakisɨrɨtyo takana nityakisɨrɨkɨxti. Nauki saneityo nisonko ñana takana nikonkoxti,

¹¹ixhanka nauki axti Tupax aisɨmoniankanatiñɨ tato ñana axɨpekuki makoiñoka.

¹²Chɨsukanapɨñɨ tiyebo nanaiña sobi, champɨityo axtɨ besɨroapae nisɨboriki. Axɨna sukanañɨ ta yakaiki aɨbu niyapacheki, kausane iñanai au nityakɨrux ñana, tyopiki ɨmo aixhimiakati Jesucristo iñemo.

¹³Masarukityaiki, tusiu nuxia iñemo chiñataikipɨ au nityakɨrux. Axɨna isamute kaɨma ta nauki atakɨru nixhakionko yubapa axɨba tisamukio ta kaɨma ñasamuka nuxia nauki aye sobi axɨba champɨ tisamukio,

¹⁴sane naukiche yaka aɨbu, nauki iñanai au nityakɨrux, nauki aye sobi ñana axɨmanu toxiobo uiti Tupax ɨmoma namanaiña axɨbama samamekanama uiti aɨbuti Jesucristo.

¹⁵Namanaiña axɨbama tɨkoboi uikokoroti Cristo uisamunena sane. Axtɨ ane auche kiatax napakionko. Uiti Tupax uraboiti nuxia ausukarɨ.

¹⁶Sane naukiche, uisamunena nosɨboriki besɨro isiuki axɨna tiyebo osoi.

¹⁷Masarukityaiki, apiña nausɨboriki isiukiñɨ amasasatɨtyo ɨmo nisɨborikixhimia axɨbama isamutema sane isiuki axɨna supanunekaka aume.

¹⁸Chaɨbopɨ nisura ausukarɨ, kaɨma surapoi tatityo ausukarɨ aɨbu nisareo, sɨrɨmanama aboma sɨborikoma takana axtɨ nikonkoxti Cristo kɨtɨpɨ kurusɨx champɨ nanenekiche.

¹⁹Namanaiña axɨmanuma sane nisɨborikixhimia sɨromatɨ ñana au infierno. Sɨborikoma nauki a'amantai, taruku nipukɨnunkuxɨma oboi axɨba isamutema, abo oboipɨ taruku nikɨsoxɨma. Kunauntaña ñakionkoxɨma yubapa axɨba chomixhampɨ ikuki axɨna kɨx.

²⁰Tapɨ axoñɨ ta auki napes oñɨ, uixh naukiche uxianka nauki ayetitɨ auki napes naki uiche utaesɨbu eanaki nomɨnantɨ, axti Yɨriabux Jesucristo,

²¹uiti aikiaɨbuti axɨna champɨ nanenekiche nokɨtɨpɨ nauki aye uixh takana nanentaka nikɨtɨpɨxti. Isamutenti ñana ui axɨmanu yarusɨrɨx nɨriakaxti iku axɨna kɨx.