Read Chiquitano COLOSENSES 3 Bible Online

COLOSENSES 3 - Chiquitano bible

COLOSENSES 3

¹Ui axɨna sane, axaño ausɨborikia tato chepeti Cristo, sane naukiche apapachesio axɨba auki napes, kauta nakaxti Cristo tɨmonsoti au nepanaunkuxti Tupax.

²Apakionsaño yubapa axɨba auki napes, tapɨ amonxɨkapae yubapa axɨba ikuki axɨna kɨx.

³Axaño aukonka ɨmo axɨna kɨx, tapɨ kaɨma tyopikiti Cristo, uiti Tupax toxio aume axɨna ñemanauntu ausɨborikibo.

⁴Axti Cristo tyonenti axɨna nausɨboriki. Axtɨ kuatati tato ñana, axañointyo abaka ñana chepeti nauki aupukɨnuintyo ui nanentakaxti.

⁵Tyopiki axɨna sane, apiñokosio nanaiña axɨba chomixhampɨ nauxiantɨmo. Tapɨ auxianka aumeampatoe, tapɨ apisamute axɨba chuxiampɨ, tapɨ apicheta ɨmo naukɨtɨpɨ aisamune axɨna chuxiampɨ, tapɨ taruku nauxianka iyo monixh oboi axɨba sane ta takana axtɨ apanaunka ɨmo matupaka nisamuku mañoñɨnka.

⁶Yotopiki axɨba sane nomɨnantɨ kuatɨ nityɨborixhti Tupax ɨmo axɨbama chɨmakokonaumpɨma.

⁷Tɨkañe au nausɨboriki apisamute axɨna sane nomɨnantɨ.

⁸Ta kaɨma apiñokosio nanaiña axɨba nomɨnantɨ: tapɨ autɨborikia, tapɨ apisamute axɨna chuxiampɨ ɨmoti kiatax, tapɨ chuxiampɨ napanityaka kɨtɨpɨti Tupax, tapɨ ausɨratai napanityaka kɨtɨpɨti ausɨborisapa.

⁹Tapɨ apapanka aumeampatoe, tyopiki axaño tapiñokota axɨmanu chuxiampɨ nausɨboriki tɨkañe,

¹⁰tapɨ kaɨma kiatax tato nausɨboriki ñemanauntu axaño tyonema axɨbama aɨbo mañoñɨnka, axɨbama masamuña kiatax nausɨboriki takanati Tupax naki uiche aisamunenti naukɨtɨpɨ, masamuñaintyo apisuputakati nuxia.

¹¹Champɨ nɨmoche axtɨ griegokɨ o judioxɨkɨ, axtɨ circuncidabokɨ o champɨ, axtɨ osekatɨ auki kiatax narɨkɨkixh, axtɨ uipiaka o chuipiakapɨ, axtɨ kumanakax oñɨ o chɨtɨpɨ kumanakax, tyopiki axti Cristo tyonenti nanaiña anatityo au nanaiña.

¹²Taruku naukuasɨrɨkɨ ɨmoti Tupax, uiti samamekana año nauki sane kaɨma aɨtoxti año. Sane naukiche apiña nuxia nauki uxia nausɨboriki, tari akuasɨrɨma aume makiataka, apakumananau, aupukɨru tyaku makiataka, apasamunau aɨbu makiataka.

¹³Tapɨ apapataikiatai aupuapatoe, apixhimiaka axtɨ ane chɨrɨri uiti taman aɨbuti kiatax. Takanati Yɨriabux xhimiakana uiti nomɨnantɨ aboi, saneityo aboi aumeampatoe.

¹⁴Yopɨrɨkɨ nanaiña aukuasɨrɨ aumeampatoe, tyopiki axɨna napakumananaunku tyone axɨna uiche chepe nabaka.

¹⁵Tari axɨna nipukɨnunkuxti Cristo sɨsio au nabausasɨ, tyopiki ɨmo samamekana año uiti Tupax nauki apisamunaño kunauntaña kɨtɨpɨx, nauki apityusianka naupukɨnunku.

¹⁶Tari axɨna nuraxti Cristo sɨsio ñana aukɨtɨpɨ aɨbu nanaiña axɨba omixha. Axtɨ apanunekaka aumeampatoe, apisamuse aɨbu napapanaunku. Aɨbu nipukɨnunku nabausasɨ apasoni ɨmoti Tupax. Salmos, pikiataka sonikia aɨbu ñapanaunku nabausɨpɨ.

¹⁷Nanaiña axɨna napachɨkoi napanityaka, apisamuse au nɨrixhti Yɨriabux Jesucristo, apachampienka ɨmoti Tupax naki Uyaɨ yotopiki axɨba isamutenti Jesús autaku.

¹⁸Axaño paɨka, apakokonau ɨmoma axɨbama apikianaño. Tyopiki tyone axɨna bakɨpukux aume tyopiki axaño apikokokati Jesús.

¹⁹Mañoñɨnka, tari aukuasɨrɨ aume naukɨposɨ apasamunau ñome.

²⁰Masiomanka, apakokonau ɨmoma axɨbama aubaɨtaiki, tyopiki tyone uxia ɨmoti Tupax.

²¹Mañoñɨnka tapɨ apityɨmoniankakama axɨbama aubaɨtaiki, nauki aruku nuxia ɨmoma.

²²Axaño axɨbama makumanakaka, apakokonau ɨmo nanaiña yakɨpukuxɨma axɨbama ɨmoche apaserebikia auna iku axɨna kɨx. Tapɨ apisamute sane axtɨ asaramatɨ aume. Ta apisamuse nanaiña auki nabausasɨ tyopiki napanaunku ɨmoti Yɨriabux Jesús.

²³Nanaiña axɨna apisamute apisamuse aɨbu narukux aume, takana axtɨ apaserebikia ɨmoti Yɨriabux Jesucristo chɨtɨpɨ ɨmo mañoñɨnka.

²⁴Tyopiki tɨtusiu aume toxio ñana uiti Tupax aume ityobo axɨmanu ɨriotɨ tɨkañe uiti ɨmoma axɨbama aɨtoxti. Apakionsaño ta apaserebikia ɨmoti Cristo naki ñemanaunkuxatoe Yɨriabuxti aume.

²⁵Axti naki isamutenti axɨna chuxiampɨ ane ñana manityomokotox ɨmoti uiti Tupax ityopiki axɨmanu chuxiampɨ isamutenti, tyopiki ɨmoti Tupax chepatai nukuasɨrɨkɨ.