Read Chiquitano COLOSENSES 4 Bible Online

COLOSENSES 4 - Chiquitano bible

COLOSENSES 4

¹Tapɨ axaño axɨbama aboma makumanakaka amemeku, tapɨ amemeonkama taikianaintyo uxia aboi ɨmoma. Apakionsaño, anatityo taman Yɨriabux aume au napes.

²Tapɨ tochenko nameanka, taikiana amasankatɨ apachampienkaityo ɨmoti Tupax.

³Apankityo suichaku, pɨnanakiti Tupax nauki axɨsomɨ taikiana uxia supanunekaka axɨba omixha manityakax kɨtɨpɨti Cristo sane suburaboi axɨna nixhantɨmoti Cristo aisamunenti tyakuapae yaka auna amanañɨmpo.

⁴Apanki pɨnanakiti Tupax nauki ipiaka nuxia suraboi axɨmanio omixha manityakax.

⁵Apisamuse nausɨboriki isiuki uxia napapanaunku sukarɨma axɨbama chikokoromatipɨ Cristo, tapɨ apiñensonokota axtɨ toxio aume apanuneka.

⁶Taikiana uxia napanityaka axtɨ apaparikia sukarɨ namanaiña, apipiaityo apiñumu nuraxɨma.

⁷Axti usaruki Tíquico naki anankati baserebioti chepeñɨ ɨmoti Yɨriabux Jesús, uiti atusi tanu aume kausane nisɨboriki auna.

⁸Sane ikɨpukati tanu aubesa, nauki uraboiti ausukarɨ kausane suisɨboriki auna, nauki aupukɨnunka uiti.

⁹Chepeti sɨrotitityo Onésimo, naki usaruki auki tanu abaxɨpekuki. Tari uimia uraboimia nanaiña ausukarɨ kausane suiñemo auna.

¹⁰Axti Aristarco anati auna amanatipo chepeñɨ, ñakionkoxti tanu aume. Axtityo Marcos, naki yarukityoboti Bernabé. Axaño tɨtusiu aume axtɨ sɨrotitɨ tanu asarati año apasusiusuti nuxia.

¹¹Ñakionkoxtityo tanu aume axti Jesús namatɨ ɨmoti Justo. Tyonemantai axɨbama ikokoromati Jesús axɨpekukimia axɨbama judíos amonkoma chepeñɨ ɨmo niyachɨkoi xhanuneka nuraxti Tupax, uimia taruku nipukɨnunku.

¹²Ñakionkoxti tanu aume Epafras, naki baserebioti ɨmoti Jesucristo. Tyonenti aukitanu abaxɨpekuki, taikiana meaboti autaku, mankioti pɨnanakiti Tupax nauki aruku nuxia aume apityoximia naukɨtɨpɨ ɨmo noñemaxti Tupax.

¹³Axɨñɨ yastai nuxia kausane axti Epafras taruku nonxɨkɨxti autaku tyakumaintyo axɨbama ikokoromati Tupax auki Laodicea aukityo Hierápolis.

¹⁴Ñakionkoxtityo Lucas tanu aume naki merkux, axtityo Demas axɨbama taruku nikuaxɨma suiñemo.

¹⁵Aburasio nixhakionko tanu ɨmo axɨbama ikokoromati Tupax aboma au Laodicea. Aburasoityo nixhakionko ɨmo Ninfas ɨmointyo namanaiña axɨbama ikokoromati Jesús axɨbama oberabarama nantax au nipox.

¹⁶Axtɨ tamastai nanaiña axɨna korobo iku axɨna kichonimiakax, apakɨpu aɨbu ɨmo axɨbama ikokoromati Jesús auki Laodicea, nauki ta'aityo asaraimia axɨmanu korobo, saneityo axaño amasasai axɨmanu nixhakonomoso ɨmoma axtɨ iñatai auki Laodicea.

¹⁷Aburasoi sukarɨti Arquipo tari aisamunenti nuxia axɨmanu niyachɨkoiti bakɨpukux ɨmoti uiti Yɨriabux Jesucristo aisamunenti.

¹⁸Axɨñɨ Pablo, nixhakonomosoatoe axɨna xhakɨpuka aume. Apakionsaño axɨñɨ yaka auna amanañumpo. Tari aikurusɨka uiti Tupax.