Read Chiquitano 1 TESALONICENSES 4 Bible Online

1 TESALONICENSES 4 - Chiquitano bible

1 TESALONICENSES 4

¹Sane, masarukityaiki, supakɨpuka aume apasamu nuxia axɨna sane au nɨrixhti Yɨriabux Jesús: apikoñoko naneneka nausɨboriki isiuki axɨmanu supanunekaka tyopiki tyone axɨna uxia ɨmoti Tupax, takana axɨna tapisamute.

²Axaño tɨtusiu aume axɨba supanunekaka aume aɨbu nɨriakaxti Yɨriabux Jesús.

³Axti Tupax xhanxti nauki tapɨ ane kausane nausɨboriki, tapɨ auxiankatai aumeampatoe

⁴tari taikianati taman akuasɨrɨ nuxia ɨmoti nikɨpostotiatoe,

⁵tapɨ chɨtamampatai axɨna chuxiampɨ apisamute ɨmo takana isamutema axɨbama chisuputarapɨmati Tupax.

⁶Tapɨ champɨ napanaunku tapɨ apatachemakaka ɨmoma axɨbama ikokoromati Cristo. Tyopiki tɨsuburapoi ausukarɨ uiti Yɨriabux taruku ñana nityakisɨrɨkɨxɨma axɨbama sane nisɨborikixhimia.

⁷Tyopiki axti Tupax chityasurutipɨ oñɨ nauki uisamune nosɨboriki yupu nomɨnantɨ, ta nauki besɨro nosɨboriki.

⁸Sane naukiche, axti naki chiyasutiutipɨ axɨna manunekatax, chisuiñemopɨ axɨna sane uiti ta ɨmoti Tupax, naki uiche aityoximiati Espíritu Santo aume.

⁹Kɨtɨpɨ axɨna naukuasɨrɨkɨ aumeampatoe axɨbama apikokokati Cristo, champɨ nɨmoche supakonomo aume, tyopiki axti Tupax uixhtiatoe aiñununekanati año kausane aukuasɨrɨ aumeampatoe.

¹⁰Sane apisamute aɨbu namanaiña axɨmanuma ikokoromati Cristo auki nanaiña Macedonia. Apasamu nuxia suiñemo masarukityaiki aukuasɨrɨ nuxia aumeampatoe.

¹¹Apiña nuxia nauki tapɨ ane kausane nausɨboriki, amonxɨka ɨmo napachɨkoi, apisamuse napachɨkoi takana axɨna supakɨpuku aume,

¹²sane namanaiña ane ñanaunkuxɨma aume axɨbama chikokoropɨmati Tupax, sane chapankikiapɨ axɨna nuxiantɨmo pɨnanaki makiataka.

¹³Masarukityaiki, suixhanka atusi nuxia aume kausane ñana aɨbuma axɨbama tɨkoiñoma, nauki tapɨ ausucheka isiuma, takana makiataka axɨbama champɨ kɨmenuche axɨperama.

¹⁴Sane takana axoñɨ uikokota ta koiñoti Jesús sɨborikotityo tato, saneityo uikokota ta axti Tupax sɨborikoma tato uiti ñana chepeti Jesús axɨbama koiñoma tɨkañe aɨbu ñakokonaunkuxɨma ɨmoti.

¹⁵Sane naukiche sukanasomɨ aume, takana ñanunekakaxti Yɨriabux, axoñɨ axɨbama osɨborikiaiki ñana chepe axtɨ tɨkuati tato Yɨriabux Jesús, tapɨ basɨrɨka pɨnanakimia axɨbama tɨkoiñoma.

¹⁶Tyopiki rabotɨ ñana taman tosibixh aɨbu bakɨpukux, nityosibixhti tamanti Arcángel rabotityo ñana nibuxixhti Tupax, auki axti Yɨriabux Jesús kuatati akɨ auki napes. Axɨbama tɨkañe koiñoma aɨbu ñakokonaunkuxɨma kusɨrɨboma ñana atɨraimia tato.

¹⁷Auki axoñɨ axɨbama osɨborikiaiki uɨkatɨ uiti chepema omeana kɨsaɨboka, akamanu uikuñukati ape. Auki sɨsio oñɨ chepeti Yɨriabux Jesús ɨmo champɨ nityakɨru nosɨboriki.

¹⁸Oboi axɨba manunekatax chepe año apiña nuxia.