Read Chiquitano 1 TESALONICENSES 5 Bible Online

1 TESALONICENSES 5 - Chiquitano bible

1 TESALONICENSES 5

¹Masarukityaiki, champɨ nɨmoche xhakonomo aume aucheapae ñana axɨmanu tyakɨrux nanenes.

²Axaño tɨtusiu nuxia aume axɨmanu nanenes ñana auche kuatati tato Yɨriabux Jesús iñataiti tato ñana axtɨ champɨti añe ñakionkoxti, au tobixh takanati kusɨpɨx.

³Axtɨ namanaiña namatɨ: “Nanaiña uxia, champɨ kausane”, auki kaɨma takana taman basakuakax iñatai ɨmoma nityakisɨrɨkɨxɨma, champɨti añekana ñana, uxiante ñana axɨna sane axtɨ champɨti ane au ñakionkoxti, takana axtɨ taman paɨx xhanx ane meku. ¡Champɨti ñana añekana!

⁴Tapɨ axaño masarukityaiki chabakapɨ au tomikianene, ɨmo axtɨ kuatati tato ñana Yɨriabux Jesús tapɨ autabɨkatai takana uiti kusɨpɨx.

⁵Namanaiña axaño apikokokati Yɨriabux Jesús, tyone axɨmanu takana axtɨ usaka au nanentax takana au sapes.

⁶Sane naukiche, amasankatɨ nuxia, besɨro nausɨboriki tapɨ apisamute takana nisɨboriki makiataka.

⁷Axɨbama champɨ nɨmoche uimia niyekixhti tato Yɨriabux Jesús isamutema au nisɨborikixhimia aruki nanaiñantai nomɨnantɨ taikiana orisɨbama, tyonema axɨbama aboma au tomikianene.

⁸Tapɨ axoñɨ chusakapɨ au tomikianene, ta usaka au nanentax. Sane naukiche amasankatɨ nuxia, tari oñonkatɨ ɨmoti Tupax akuasɨrɨmaintyo oemo axɨbama osɨborisapa. ¡Axɨna axtɨ oñonkatɨ ɨmoti Tupax axɨna numakumananaunku tyoneio axɨba omokɨmanabo utaku ñomɨnana nomɨnantɨ takana axɨna uiche utabuxikia! Axtɨ uikokota nuxia axɨna maximiakatax oemo tyone ñana axɨna okɨmanabo utaku takana nityabuxi nutanu.

⁹Tyopiki axti Tupax chityasurutipɨ oñɨ nauki basuriu nutakisɨrɨkɨ uiti, ta nauki ane maximiakatax oemo tyopikiti Yɨriabux Jesucristo.

¹⁰Axti Jesucristo koiñoti utaku nauki osɨborikia chepeti, sane axtɨ osɨborikiaiki, takanaintyo axtɨ tokonka axtɨ tɨkuatati tato ñana.

¹¹Sane naukiche, apiña nuxia, apayura aumeampatoe, takana axɨna nantaxtai apisamute.

¹²Masarukityaiki, apasamu nuxia suiñemo apiñanaunsuma axɨbama ane nɨriakaxɨma abaxɨpeku. Axɨma iñatama nuxia ñanunekakaxɨma aume nauki apisamune nausɨboriki takana axɨbama ikokoromati Jesús.

¹³Apakumananau akuasɨrɨmaintyo aume, taikiana uxia aboi aumeampatoe.

¹⁴Apasamuintyo nuxia suiñemo masarukityaiki, apikuansomokosoma axɨbama chixhanxɨpɨma ane yachɨkoimia. Tapɨ axɨbama apekiatai ñakokonaunkuxɨma amukanaño ɨmoma tari aruku ɨmoma, apiñununekasama axɨbama chikokoropɨmati nuxia Yɨriabux Jesús, apasamunau aɨbu namanaiña.

¹⁵Tapɨ chebo aboi anati naki matokonoti tato ityobo axɨna chuxiampɨ isamutema ɨmoti. Apache nikiubu año nauki taikiana apisamune axɨna uxia abaxɨpeku takanaintyo aɨbu namanaiña.

¹⁶Taikiana chiyaupɨ naupukɨnunku.

¹⁷Taikiana apakionsaño ɨmoti Tupax.

¹⁸Apachampienka ɨmoti Tupax ityobo nanaiña axɨna apasutiu, tyone axɨna nixhantɨmoti nauki apisamute tyopiki apikokokati Cristo.

¹⁹Tapɨ apiñotochemata axɨmanu pes ane aukɨtɨpɨ uiti Espíritu Santo.

²⁰Tapɨ chapasutiupɨ axtɨ toxio uiti aume noñemaxti nauki apanitya au nɨrixhti Tupax.

²¹Apiña nanaiña ɨmo makokotox ta sɨsio año yupu axɨba omixhia.

²²Apiñokosio nanaiña axɨba chomixhampɨ.

²³Tari uiti Tupax naki uiche taikiana uxia nosɨboriki, sɨsio año uiti aɨbu napaserebiki ɨmoti. Tari sɨsio año uiti champɨ nomɨnantɨ aboi, chepe axtɨ tɨkuati tato Yɨriabux Jesucristo, nauki nabausɨpɨ, naukɨtɨpɨ tapɨ butabɨko aɨbu nomɨnantɨ yokɨtɨpɨ.

²⁴Axti naki ityasuruti año ta chɨmapañantipɨ, nanaiña axɨna sane uxiante ñana uiti.

²⁵Masarukityaiki, apankityo pɨnanakiti Tupax suichaku.

²⁶Apanki nuxia ɨmo namanaiña axɨbama usarukityaiki aɨbu napatañumeki aumeampatoe.

²⁷Ui nɨriakaxti Yɨriabux Jesús, xhakɨpuka aume nauki amasarai axɨna nixhakonomoso sukarɨ namanaiña axɨbama ikokoromati Jesús.

²⁸Tari aukurusɨka uiti Yɨriabux Jesucristo.