Read Chiquitano 1 TIMOTEO 3 Bible Online

1 TIMOTEO 3 - Chiquitano bible

1 TIMOTEO 3

¹Ñemanauntu axɨna sane. Axtɨ anati naki xhanxti asaratitɨ tyakuma axɨbama ikokoromati Jesús, tyonenti xhanxti ɨmo axɨna uxia yachɨkoboiboti.

²Sane naukiche, axti naki ane nɨriakaxti tari uxia nisɨborikixhti tapɨ ane urapoboiboma makiataka kɨtɨpɨti. Tari kunauntañantai nikɨpostoti tapɨ chebo uiti aisamunenti chɨtamampatai nixhantɨmoti, tari uxia nisɨborikixhti besɨro ñapanaunkuxti. Tari makumananaunxti ɨmoma axɨbama iñataimia au nipoxti. Tari aipiati anunekati.

³Tapɨ yorisɨbaboxti tapɨ yaiyoxti, tari axti naki taruku nipukɨruxti tyaku makiataka, tapɨ taruku nixhankaxti ɨmo monixh.

⁴Tari aipiati asaratitɨ tyaku nipoxti tari aipiatityo anunekati ɨmoma axɨbama aɨtoxti nauki ane ñanaunkuxɨma ɨmo makiataka.

⁵Tyopiki axtɨ chipiakatipɨ anunekati au nopoxti, ¿kausanempɨ aipiati asaratitɨ tyakuma axɨbama ikokoromati Tupax?

⁶Sane naukiche, axti naki yɨriabux tapɨti tyonenti naki aɨbuatai aikokoroti Jesús, tapɨ au ñakionkoxti ñana champɨti kiatax pɨrɨkti sane kaɨma tapenekoti ɨmo nityakisɨrɨkɨxti takanati chobores tɨkañe.

⁷Tari uxiaintyo nisɨborikixhti au nastaxɨma axɨbama chikokoromatipɨ Cristo, tapɨ ane isiukiche akɨsoti sukarɨma tapɨ tapenekotityo au ñakokotoxti chobores.

⁸Saneityo axɨbama Diáconos, tari uxia nisɨborikixhimia au nastaxɨma namanaiña, tapɨ mapañama ɨmo makiataka tapɨ taru norisɨbaxti, tapɨ taruku nixhankaxɨma ɨmo monixh.

⁹Tari taikiana aikokoma nanaiña axɨba omixhia manityakax botoxio oemo uiti Tupax axɨba uikokokio, tari taikiana uxia ñapanaunkuxɨma.

¹⁰Axɨbama xhanxɨma asuriuma yachɨkoboiboma takanati Diácono, kusɨrɨbo ane ɨmoma makokotox. Axtɨ champɨ isane tyopikiche chuxiampɨ nuraxɨma ɨmoma, auki kaɨma tari yaserebirama takana axɨbama Diácono.

¹¹Saneityo axɨba paɨka tari uxia niyosɨborikixh nauki makiataka ane ñanaunkuxɨma ñome, tapɨ ausɨrtai nuburax ñome pikiataka, tari opisamunena axɨba omixhia yupachɨkoi, tari apakokonau au nanaiña.

¹²Axti naki Diácono tari tamantai nikɨpostoti, tari aipiati anunekati nuxia ɨmo axɨbama aɨtoxti takanaintyo au nipoxti.

¹³Tyopiki axɨbama Diácono axtɨ isamutema nuxia axɨna niyachɨkoimia, uxia nastaxɨma makiataka ɨmoma, auki namanaiña axɨbama ikokoromati Jesús ane ñanaunkuxɨma ɨmoma.

¹⁴Ixhanka konto yɨrotɨ tanu yasarɨ. Ta xhakonomoka aemo axɨna sane

¹⁵ɨmo axtɨ chɨkontopɨ iñanai tanu, ta tɨtusiu aemo kausane uisamune nosɨboriki axɨbama uikokokati Tupax, axɨbama uikokokati Tupax naki sɨborikoti, tyonema axɨbama okɨmanama tyaku axɨna ñemanauntu.

¹⁶Ñemanauntu nanaiña axɨna tusiankana tyone axɨna uikokota taruku niyarusɨrɨkɨx: Axti Cristo kuatati iku axɨna kɨx takanati ñoñɨnx. Uiti Espíritu Santo uraboiti ta champɨ nipɨnatenti. Axɨbama ángeles asaramati. Axɨba omixhia nuraxti tusiu ɨmo namanaiña, namanaiña ikuki axɨna kɨx ikokoromati. Yasuriurumati au napes.