Read Chiquitano 2 TIMOTEO 1 Bible Online

2 TIMOTEO 1 - Chiquitano bible

2 TIMOTEO 1

¹Axɨñɨ Pablo, anankañɨ isiuti Cristo Jesús, bakɨpukux iñemo uiti Tupax, naki uiche utaesɨbuka eanaki nomɨnantɨ uitityo Cristo Jesús, naki kɨmenuche baxɨperaka,

²nixhakionko ɨmoti isaɨ Timoteo, tari axti Tupax naki Uyaɨ axtityo Jesucristo, tari aikunusɨankanamakɨ taikianaintyo aixhimiakama nomɨnantɨ obi.

³Ñachampienkaka ɨmoti Tupax, naki ɨmoche yaserebikia aɨbu axɨna kicheseña niyausasɨ, takana axɨbama iyaɨtaiki tɨkañe, taikiana xhakionoñɨ akɨ axtɨ ñeanka au sapes autyo tobixh.

⁴Axtɨ xhakionkañɨ ñome nasukɨ, takana ixhankatai yasarɨ, nauki taruku nipukɨnunku.

⁵Tyopiki xhakionkañɨ ɨmo axɨna ñemanaunkuxatoe nakokonaunku. Kusɨrɨbo tɨkañe apakokonau napoxityo Loida chepe napakɨma Eunice, tusiuityo nuxia iñemo ta axɨkɨ akokonaunkaityo.

⁶Sane naukiche sukanañɨ aemo aiñonximia axɨmanu pes ñakumanataxti Tupax aemo naukiche iñata niñee onɨ natanu.

⁷Axti Tupax chɨtoxiotipɨ Espíritu Santo oemo uiti nauki taruku nuixhuku, ta nauki aruku nuxia oemo, nauki makumananau naukityo mapanau.

⁸Sane naukiche, tapɨ akɨsoka uraboi nɨrixhti naki Yɨriabux oemo. Tapɨ akɨsokaityo chopikiñɨ, axɨna yaka auna amanañɨmpo tyopikiti. Ta asusiu natakisɨrɨkɨ yotopiki axɨba omixhia manityakax ui noñemaxti Tupax.

⁹Uiti Tupax utaesɨbuka eanaki nomɨnantɨ auki ityasuruti oñɨ nauki kaɨma aɨtoxti oñɨ, chɨtyopikipɨ axɨna uisamute, ta tyopiki tyone axɨna nixhantɨmoti aisamunenti ui nipukɨruxti utaku aukiapae tɨkañe, tyopikiti Cristo Jesús.

¹⁰Axɨmanu nipukɨruxti utaku tusiankana axɨna niyarusɨrɨkɨx kaɨma uiti Cristo Jesús naki uiche utaesɨbuka eanaki nomɨnantɨ, naki uiche aikiaɨbuti konkox oboityo axɨba omixhia manityakax, sɨro uiti au nanentax axɨna sɨborikixh chɨtakɨnunaumpɨ.

¹¹Axti Tupax ikɨpurutiñɨ nauki suraboi axɨba omixhia manityakax ikɨpurutiñɨntyo yɨrotɨ isiuti nauki xhanuneka ɨmoma axɨbama chɨtɨpɨ judíos,

¹²sane naukiche taruku nichakisɨrɨkɨ oboi axɨba sane. Ta axɨñɨ chisɨsokapɨ oboi, tyopiki axɨñɨ tusiu iñemo ñakuti ɨmoche ñonkatɨ. Tusiuityo iñemo chepe axɨmanu nanenes ñana asaratitɨ tyaku axɨmanu toxio uiti iñemo.

¹³Aisamuse isiuki axɨmanio omixhia manunekatax onkoi sobi, makokokox makumananaunkux ɨmoti Cristo Jesús.

¹⁴Ui noñemaxti Espíritu Santo naki anati okɨtɨpɨ, asasatɨ tyaku manunekatax botoxio aemo.

¹⁵Tɨtusiu aemo, axɨbama auki Asia iñokonomañɨ, axti Figelo axtityo Hermógenes.

¹⁶Tari axti Tupax apukɨruti tyakuma axɨbama aɨtoxti Onesíforo, tyopiki taikiana ayetitɨ asaratiñɨ chikɨsobotipɨ ui axɨna yaka auna amanañɨmpo.

¹⁷Ta naukiche iñataiti auna au Roma, yapacheriorotiñɨ au nanaiña auki ichabɨka uiti.

¹⁸Tari axti Yɨriabux Jesús apukɨruti tyakuti au axɨmanu nanenes ñana. Axɨkɨ tɨtusiu nuxia aemo asaratitɨ utaku naukiche ananka oñɨ au Éfeso.