Read Chiquitano TITO 3 Bible Online

TITO 3 - Chiquitano bible

TITO 3

¹Ukanɨ tatityo ɨmo makiataka tari akokonauma ɨmo mayɨriabuka, tari taikiana aisamunema axɨna uxia.

²Tapɨ manityanama axɨba chomixhampɨ kɨtɨpɨti kiatax, taikiana uxia uimia ɨmo makiataka tarukuityo nipukɨruxɨma tyaku makiataka, taikiana uxia au nausasɨxɨma aɨbu makiataka.

³Tyopiki tɨkañe saneityo nosɨboriki chuxiampatai osoi ɨmo makiataka champɨatai uxia oemo. Uñamenkatai chɨmastakaxɨpɨ oemo uisamute nanaiñantai axɨba chomixhampɨ. Osɨborikia aɨbu chɨrɨri uyubatio nenaxi makiataka, tɨborikomantai oemo axoñɨntyo otɨborikiatai aɨbu makiataka.

⁴Tapɨti Tupax naki uiche ane maximiakatax oemo ityusiankatati axɨna nipukɨruxti tyaku namanaiña mañoñɨnka,

⁵axoñɨ champɨ uisamute axɨba omixha, ui taruku nipukɨruxti xhimiakana uiti axɨna nomɨnantɨ osoi iyaxɨbiroti oñɨ kiatax nosɨboriki uiti ui noñemaxti Espíritu Santo.

⁶Tyopikiti Jesucristo naki uiche ane maximiakatax oemo toxioti oemo uiti Tupax axti Espíritu Santo,

⁷chɨkoñopɨtɨ oemo, tapɨti yasuriuruti oñɨ uiti atusi oemo ta ñemanauntu ñana toxio oemo axɨmanu osɨborikibo champɨ nityakɨrux ensɨmunu tɨkañe.

⁸Axɨna ta ñemanauntu, ixhanka sane nanunekaka nauki axɨbama ikokoromati Tupax tari aisamunema axɨna uxia. Axɨba sane omixhia chiyaupɨ nɨmoche ɨmo namanaiña.

⁹Tapɨ asikia aiñumu axɨba chomixhampɨ mapanaunkux, tapɨ ane nɨmoche obi nurax kɨtɨpɨ axɨbama kusɨnɨtaña tɨkañe, tapɨ ɨnantɨ aemo tyopiki axɨmanu bakɨpukux uiti Moisés. Axɨmanio sane champɨ isane nanenekiche.

¹⁰Axtɨ anati naki masamunuti chɨrɨri abaxɨpeku axɨbama ikokoromati Jesús, tari tox nikuasokoxti obi. Tapɨ axtɨ chonkoitipɨ nikuasokoxti obi, aipenesoti abaxɨpekuki,

¹¹sane tusiu aemo axti maniki ñoñɨnx chauki chuxiankipɨ nisɨborikixhti ui axɨmanu nomɨnantɨ uiti tusiu ta ane nipɨnatenti.

¹²Axtɨ ikɨpukati tanu Artemas o axti Tíquico, apache nikiubukɨ nauki aɨrotɨ au Nicópolis asarañɨ, tyopiki ixhanka yasikia akamanu ñome axɨmanio naneneka ximianene.

¹³Ayura au nanaiña ɨmoti maniki yɨriabux Zenas, ɨmotityo Apolo. Aityoximia ɨmoma nanaiña nixhantɨmoma ɨmo niyɨkɨxɨma tapɨ ane ñemakiyauma.

¹⁴Axɨbama aboma usiu tari aipiama aisamunema axɨba omixhia nauki ayurama axtɨ ane nɨmoche, nauki uxia nisɨborikixhimia.

¹⁵Namanaiña axɨbama aboma auna chepeñɨ ñakionkoxɨma tanu aemo. Urasoi supakionko tanu ɨmo axɨbama suichurapa axɨbama ikokoromati Jesús. Tari axti Tupax aukurusɨka uiti namanaiña.