Read Chiquitano HEBREOS 4 Bible Online

HEBREOS 4 - Chiquitano bible

HEBREOS 4

¹Sane naukiche, axɨna ɨriotɨki atoxi oemo uiti Tupax axɨmanu nikɨxti, tari basarira nuxia tapɨ anati naki uyaxɨpekuki chiyebopɨ ñana uiti.

²Tyopiki oemointyo urapoimia axɨmanio omixhia manityakax, sane takana axɨma. Tapɨ axɨma champɨ nanenekiche ɨmoma axɨmanu onkoimia, tyopiki choberabarapɨma chepema axɨmanuma ikokotama axɨmanio omixhia manityakax.

³Tapɨ axoñɨ axɨbama uikokota, iyebo ñana osoi kauta axɨmanu nikɨxti, axɨmanu kauta nanti Tupax: “Sane naukiche sukanañɨ ɨmoma auki nichɨbori ta chiyebopɨ ñana uimia au axɨmanu kɨx toxiobo ɨmoma.” Tapɨti Tupax ta tɨtakɨrusu uiti niyachɨkoiti naukiche isamutenti axɨna kɨx auki ñemonkox.

⁴Ane axɨna kauta nantɨ iku Nikorox kɨtɨpɨ axɨmanu séptimo nanenes: “Axti Tupax tochenko niyachɨkoiti au axɨmanu séptimo nanenes.”

⁵Nantɨ tatityo iku Nikorox sane: “Chiyebopɨ ñana uimia kauta niyaka.”

⁶Ta sɨrɨmanamainki axɨbama chiyeboikipɨ uimia kauta niyaka, tyopiki chikokotapɨma axɨmanuma kusɨrɨboma atusi ɨmoma axɨmanio omixhia manityakax.

⁷Sane naukiche, axti Tupax urapoiti tatityo kiatax nanenes, takana axɨmanu nuraxti David ui noñemaxti Tupax iku Nikorox: “Axtɨ amonsapetio kaɨma nuraxti Tupax, tapɨ chiyasutiupɨ nabausasɨ.”

⁸Tyopiki axtɨ axɨmanuma auki Israel, uitipɨ Josué ñemanaunkuxatoe uxia nakaxɨma, axti Tupax champɨ nɨmochepɨ uraboiti tatityo kiatax nanenes.

⁹Sane naukiche aninki taman axɨna samamekana kauta aɨromatɨ axɨbama ikokoromati Tupax.

¹⁰Tyopiki axti naki iyebo uiti kauta axɨmanu nikɨxti Tupax, tochenko niyachɨkoiti, sane takanati Tupax tochenko niyachɨkoiti.

¹¹Uiñana nuxia, nauki aye osoi au axɨmanu nikɨxti, nauki tapɨ anati naki isamutenti isiukimia axɨmanuma chɨmakokonaumpɨma.

¹²Tyopiki nuraxti Tupax sɨboriko ta anentyo nɨriakax. Otoro nuxia takana taman kɨses obotoro tox nabeux, sɨrotɨ au nanaiña nokɨtɨpɨ au nuyausɨpɨ sɨrotityo au nanaiña axɨna nixhantɨmo aisamune nuyausasɨ.

¹³Champɨ axɨna nisamukuxti Tupax iñanekanɨ pɨnanakiti. Nanaiña ane au nanentax sukarɨti naki uiche ñana asaraiti axɨna nosɨboriki.

¹⁴Axti Jesús tyonenti Aɨtoxti Tupax, tyonentityo naki sacerdote Yɨriabuxti oemo, naki iyebo uiti au napes. Sane naukiche uiñana nuxia numakokonaunku ɨmoti Tupax.

¹⁵Tyopiki axti maniki Yɨriabux sacerdote oemo pukɨrusuti utaku tyopiki charukupɨ oemo, tyopiki omenointyo ɨmoti axɨmanio makokotoka omeno oemo. Ta axti Jesús chisamutentipɨ axɨba nomɨnantɨ.

¹⁶Sane naukiche axtɨ ane nuxiantɨmo, kuri esati Tupax naki taruku ñakumananaunkuxti, nauki apukɨruti utaku, axtɨ ane nuxiantɨmo ui nipukɨruxti aityoximiati oemo axɨmanu nuxiantɨmo.