Read Chiquitano HEBREOS 8 Bible Online

HEBREOS 8 - Chiquitano bible

HEBREOS 8

¹Axɨpekuki nanaiña axɨna suburapoi ta anati yɨriabux sacerdote oemo naki anati au napes, tɨmonsoti au nepanaunku nityɨmoxti Tupax.

²Axti maniki sacerdote tyonenti Jesucristo, naki baserebioti au nipoxti Tupax, axɨna kauta ñemanauntu ane manaunkux ɨmoti Tupax, axɨna nisamukuxtiatoe chityonempɨ nisamuku mañoñɨnka.

³Auna iku axɨna kɨx, sɨroti yɨriabux ɨmoma axɨbama sacerdotes naki uiche aityoximiati ɨmoti Tupax ñakumanataxɨma axɨbama ikokoromati. Sane naukiche axti Jesucristo anentyo ñakumanataboti ɨmoti Tupax.

⁴Axtɨ anatipɨ iku axɨna kɨx, champɨpɨ nɨmoche sacerdotexti, tyopiki iku axɨna kɨx tɨtaboma sacerdotes axɨbama uiche aityoximiama makumanataka ɨmoti Tupax yakɨpukux axɨmanu bakɨpukux uiti Moisés.

⁵Axɨna isamutema axɨmanuma sacerdotes tyoneio nausɨpɨtuxtai axɨba omixhante au napes. Tyopiki naukiche axti Moisés isamutenti nipo meankax, nanti Tupax ɨmoti: “Asasai nuxia aisamuse takana axɨmanu ityusiankata asukarɨkɨ onɨ yirityux.”

⁶Tapɨ axɨmanu yachɨkoboiboti Cristo uiti Tupax, naki yɨriabuxti ɨmoma axɨbama sacerdotes takanaintyo oemo, okɨmanati tyaku axɨmanu tratox uxia, axɨna champɨ takanache axɨba ɨriotɨ uixh oemo.

⁷Axtɨ axɨmanupɨ kusɨrɨbo tratox tɨkañe nanaiñampɨ ane ɨmo, champɨ nɨmochepɨ axɨmanu kiatax.

⁸Ta tyopiki axti Tupax astaiti chikokotapɨma nuraxti takana nixhantɨmoti, auki nanti: “Nanti Yɨriabux: Kuantionki naneneka auche ñasamuka tatityo tratox aɨbuma axɨbama auki Israel chepe axɨbama auki Judá.

⁹Axɨna tratox chisiupɨ takana axɨmanu isamute tɨkañe aɨbuma yaɨtoxɨma, naukiche ipiasukama nauki ikiaɨburuma auki Egipto. Axɨma chikokotapɨma nisura, sane naukiche iñokokama, nanti Yɨriabux.

¹⁰Axɨna ɨriotɨ sobi isamune aɨbuma axɨbama auki Israel yopɨrɨkɨ axɨmanio naneneka, tyone axɨna sane, nanti Yɨriabux: Iñakio nixhakɨpuku au nityanuxɨma ikonomokio au nausasɨxɨma. Axɨñɨ Tupaxɨñɨ ɨmoma tapɨ axɨma tyonema isaɨtaikimia.

¹¹Champɨki nɨmocheti naki manunekanabo aume abaxɨpekukiatoe, nauki apisuputarati yɨriabux, tyopiki namanaiña ñana isuputaramañɨ, auki masiomanka chepe mayɨriabuka.

¹²Ixhimiakata ñana nomɨnantɨ aboi chanantopɨ xhakionoñɨ tato yubapa.”

¹³Axtɨ manityanati Tupax ɨmo axɨmanu kiatax ɨriotɨ uiti ta tyopiki tɨnanankax axɨmanu kusɨrɨbo tɨkañe. Axɨna tɨnanankax champɨki nanenekiche, tɨniyɨkɨx aenso.