Read Chiquitano HEBREOS 9 Bible Online

HEBREOS 9 - Chiquitano bible

HEBREOS 9

¹Axɨmanu kusɨrɨbo ɨriotɨ uiti Tupax ane isiukiche uisamune axɨmanu manaunkux ɨmoti, au nipo meankax iku axɨna kɨx.

²Axɨmanu nipo meankax uxiante tɨkañe sane: axɨmanu taman narɨkɨkixh samamekana ɨmo manaunkux, akamanu ananka axɨmanu kauta ameno basaruka ichepe axɨmanu mensax kauta ameno axɨmanio pan samamekana ɨmoti Tupax.

³Pɨrɨkɨ axɨmanu kiatax cortina ane akamanu axɨmanu taruku manaunkux ɨmo.

⁴Akamanu ane taman altar uxiante ui oro axɨna ikuche oomo incienso, chepe axɨmanu baurixh ane oro kɨtɨpɨ. Au ananka taman bausɨma uxiante ui oro aɨbu maná au anankaityo akamanu nompɨtaxti Aarón, axɨmanu takɨbaɨro tɨkañe, yochepe axɨmanio kanka korobo yuku axɨba diez bakɨpukuka.

⁵Onɨ axɨmanu baurixh amonkio nausɨpɨtuxɨma toxɨma ángeles, oboi nipiaxɨma tabuxio axɨmanu baurixh tyonema nausɨpɨtuxti Tupax. Kaɨma champɨapae nɨmoche axɨna sane.

⁶Sane amonkio omixhiante axɨmanio au nipo meankax, axɨmanuma sacerdotes sɨromatɨ naneneka au axɨmanu kusɨrɨbo narɨkɨkixh aisamunema manaunkux.

⁷Tapɨ au axɨmanu kiatax narɨkɨkixh kunauntañatiatai ɨriatuxɨma axɨbama sacerdotes sɨrotitɨpo akumanati noto numukianka nauki xhimiakana nomɨnantɨ uiti takanaintyo ui makiataka tamantai niyɨkɨxti au nasɨkɨbes.

⁸Ui axɨna sane, nanti Espíritu Santo, axtɨ aninki axɨmanu kusɨrɨbo narɨkɨkixh, chichebopɨ oemo uɨrotɨpo au axɨmanu kiatax narɨkɨkixh kauta taruku manaunkux.

⁹Nanaiña axɨna sane tyone takana machepekatax ɨmo axɨba naskɨbeka kaɨma. Tyopiki nanaiña axɨba makumanataka botoxio ɨmoti Tupax champɨ maximiakatax oboi ñome axɨba nomɨnantɨ osoi.

¹⁰Nanaiña axɨba bakɨpukuka sane tyoneiantai yokɨtɨpɨ axɨba uñutuburibo otɨpobo, takanaintyo ɨmo nokobori ɨmo noñeanka, axɨba bakɨpukuka uburapoi axɨba uisamutumuebo, paserebio chepe axtɨ isamutenti Tupax kiatax axɨna ñemanauntu uxia.

¹¹Axti Cristo tɨkuatati, tyonenti kaɨma ɨriatuxɨma axɨbama sacerdotes oyebeka ɨmoti yotopiki nanaiña axɨba omixha botoxio oemo. Tyopiki axɨmanu nipo meankax kauta sacerdoteti tyone champɨ takanache nanaiña uxia. Chityonempɨ nisamuku mañoñɨnka, chɨtɨpɨ ikuki axɨna kɨx.

¹²Sɨrotitɨpo Cristo au axɨmanu nipo meankax, chɨtɨpɨ nauki akumanatiki noboto numukianka, ta makumananti notoxtiatoe. Kunauntañantai niyɨkɨxtipo ñome nanaiña naskɨbeka, sane iyebo uiti maximiakatax oemo axɨna champɨ nityakɨrux.

¹³Ñemanauntu ui noboto numukianka, uityo nityɨbɨtɨ naɨmosimia axɨna oomo onɨ axɨmanu altar, axtɨ supiuru onɨma axɨbama ane nomɨnantɨ kɨtɨpɨma, uixh sɨrɨbu kɨtɨpɨki nikɨtɨpɨxɨma.

¹⁴Axtɨ sane, ¡notoxti Cristo taruku nɨriakax ñopɨnanaki noboto numukianka! Tyopiki ui noñemaxti Espíritu Santo, naki champɨ nityakɨru nisɨborikixhti, axti Cristo uixhtiatoe aityoximianatiyɨ ɨmoti Tupax takana makumanatax champɨ nomɨnantɨ kɨtɨpɨ, ui notoxti sɨrɨbu nomɨnantɨ okɨtɨpɨki axɨbaityo chomixhampɨ uisamukio axɨba oboiche uɨkatɨ ɨmo nokonko, nauki sane baserebi ɨmoti Tupax naki sɨborikoti.

¹⁵Sane naukiche tyonenti Jesucristo naki manityanabo utaku ɨmo axɨmanu aɨbo ɨriotɨ oemo tatityo uiti Tupax. Tyopiki axti Cristo koiñoti nauki axti Tupax aixhimiakati nomɨnantɨ osoi axɨba uisamute tɨkañe naukiche usakaiki aɨbu axɨmanu kusɨrɨbo ɨriotɨ oemo, tyopiki ui nikonkoxti ane maximiakatax ɨmo mañoñɨnka, uityo nikonkoxti, namanaiña axɨbama samamekanama yasutiuma ñana axɨmanu toxiobo ɨmoma axɨna champɨ nityakɨrux ɨriotɨtɨ uiti tɨkañe ɨmoma.

¹⁶Nauki ñemanauntu akoko axɨmanu kichonimiakax korobo, tari kusɨrɨbo atusianka axɨna uiche atusi ta tɨkoiñoti maniki uiche aisamunenti.

¹⁷Tyopiki taman kichonimiakax chɨkokonopɨ axtɨ sɨborikotiki naki uiche aisamunenti, ta axtɨ tɨkoiñoti.

¹⁸Sane naukiche axɨmanu kusɨrɨbo ensɨmunu tɨkañe toxioityo aɨbu notox.

¹⁹Axti Moisés kusɨrɨbo uraboiti sukarɨ namanaiña axɨbama auki Israel axɨmanio bakɨpukuka uiti Tupax. Auki ikiatati mekuti taman purubixh kɨturiki ichepe taman soema, auki pankana uiti ui noboto numukianka korauru uiti aɨbu tux, auki kurusɨo uiti axɨmanu kichonimiakax korobo bakɨpukux iku takanaintyo axɨmanuma po'oso.

²⁰Auki nanti ɨmoma: “Axɨna notox uixh atusi ta axaño apisamute axɨna bakɨpukux toxio aume uiti Tupax.”

²¹Ikunusɨankatatityo Moisés axɨmanu nipo meankax yochepe nanaiña axɨba paserebio ɨmo manaunkux.

²²Axɨmanu bakɨpukux nantɨ ta ui noto numukianka sɨrɨbu nomɨnantɨ yokɨtɨpɨki nanaiña. Ta champɨityo axtɨ moximiakana nomɨnantɨ axtɨ charaparapɨ notox.

²³Sane naukiche taruku nɨmoche aunko axɨmanio numukianka, nauki akaɨbu nomɨnantɨ yokɨtɨpɨki nanaiña axɨmanio abe au nipo meankax, ta tyoneio nausɨpɨ axɨba abe au napes, axɨmanio abe ta'a muxianx kiatax uxia nuxia pɨnanaki numukianka.

²⁴Tyopiki axti Cristo chɨsɨrotitɨpɨpo au axɨmanu nipo meankax nisamuku mañoñɨnka, tyopiki tyone ta nausɨpɨtuatai axɨmanu ñemanauntu ane au napes. Axti Cristo sɨrotitɨ ta'a, akamanu axti Cristo manityanati ɨmoti Tupax utaku nauki aixhimiakati nomɨnantɨ osoi.

²⁵Chɨchaiyataipɨ niyɨkɨxti aityoximianatiyɨ takana makumanatax, takana isamutenti Yɨriabux sacerdote iku axɨna kɨx, sɨrotitɨpo akumanati axɨna chɨtɨpɨ notoxti.

²⁶Axtɨ sanempɨ, axti Cristo chaiyataipɨ nikonkoxti aukiapae maɨbo uxiane kɨx. Tapɨ kaɨma axɨna tɨsaimia nityakɨru axɨba naskɨbeka, axti Cristo tamantai niyɨkɨx ityusiankanatiyɨ ɨmo nanaiña naskɨbeka, ityoximianatiyɨ takana makumanatax ityopiki axɨba nomɨnantɨ osoi.

²⁷Sane takana namanaiña tamantai ñana nikonkoxɨma, auki kuatɨ ñana axɨmanu tyakɨrux ɨmoma namanaiña,

²⁸sanentityo Cristo tamantai nikonkoxti, nauki ane maximiakatax tato oemo yotopiki axɨba nomɨnantɨ osoi. Auki kuatati tatityo, chɨtɨpɨ nauki akontiki yotopiki axɨba nomɨnantɨ osoi, ta nauki aye uimia nisɨborikixhimia axɨbama ikokoromati.