Read Chiquitano SANTIAGO 1 Bible Online

SANTIAGO 1 - Chiquitano bible

SANTIAGO 1

¹Axɨñɨ Santiago yaserebikia ɨmoti Tupax ɨmotityo Yɨriabux Jesucristo, nixhakionko tanu ɨmoma axɨbama aɨtoxti Israel axɨbama aboma au nanaiña iku axɨna kɨx.

²Masarukityaiki, tari taruku naupukɨnunku axtɨ abe ausɨratai makokotoka aume.

³Tɨtusiu aume, axtɨ axɨna napakokonaunku ane makokotox ɨmo, axaño apipiaka ñana autakisɨrɨ aɨbu narukux aume.

⁴Sane naukiche apiña nuxia kɨmenu axɨmanu makokotox chepe nityakɨrux, nauki besɨro nausɨboriki sane apisamune axɨmanu bakɨpukux aume.

⁵Axtɨ anati naki abaxɨpekuki champɨ nipiatɨmoti, tari ankirioti pɨnanakiti Tupax, toxio uiti ɨmoti. Tyopiki axti Tupax toxio uiti ɨmo namanaiña champɨ nɨmoche uiti ñakuti naki ɨmoche aityoximiati kausaneityo nakaxti.

⁶Axti naki mankioti, tari ñankirati axtɨ onkotitɨ nuxia ɨmoti Tupax, tyopiki axɨbama chonkopɨmatɨ nuxia ɨmoti tyonema axɨbama takana nosɨtu narubaityu tux, peoro ui makiɨtɨx au nanaiñantai.

⁷Axti naki sane nisɨborikixhti, champɨ ñana toxiobo ɨmoti uiti Tupax,

⁸tyopiki kaɨma taman ñakionkoxti tapɨ tyubaka kiatax, chɨtamampatai nixhantɨmoti.

⁹Axtɨ anati naki usaruki taruku nityakisɨrɨkɨxti, tari pukɨnuñati tyopiki kuasɨrɨti ɨmoti Tupax.

¹⁰Tapɨti naki taruku nenaxixhti, tari pukɨnuñantityo axtɨ takisɨrɨti uiti Tupax, tyopiki axɨba noñenaxi tyoneio takana pɨsioka auki xhoens axɨba chabaityuxɨpɨ nubakax.

¹¹Axtɨ ane ape sux aɨbu nipekixh, axɨba naxchopɨro bosɨbo, axɨba nipɨsixh bupakio auki ensoro axɨna nikoñokokox. Sanentityo naki taruku nenaxixhti koiñoti ñana aɨbu nenaxixhti.

¹²Taruku ñana nipukɨnunkuxti naki ñoñɨnx axtɨ aruku nuxia ɨmoti ñome makokotoka, tyopiki axtɨ uxia nisɨborikixhti au nastaxti Tupax, toxio ñana isɨborikiboti axɨna champɨ nityakɨrux axɨna ɨriotɨ uiti ɨmoma axɨbama manaunuma ɨmoti.

¹³Axtɨ ane makokotox aume apisamune nomɨnantɨ, tapɨ amukanaño ta uiti Tupax, tyopiki axti Tupax champɨ makokotox ɨmoti, sane naukiche champɨ ñakokotoxti oemo nauki uisamune nomɨnantɨ.

¹⁴Axtɨ ane makokotox oemo, ta oboi axɨba chomixhampɨ nixhantɨmo axɨna nokɨtɨpɨ, oboi uɨkatɨ uisamune axɨna chuxiampɨ.

¹⁵Oboi axɨba chomixhampɨ nixhantɨmo axɨna nokɨtɨpɨ, uisamute axɨna nomɨnantɨ. Axtɨ osɨborikia nauki uisamune nomɨnantɨ, tyone axɨna konkox champɨ nityakɨrux.

¹⁶Masarukityaiki, tapɨ autapeneka aboiyapatoe:

¹⁷nanaiña axɨba omixhia axɨna besɨro toxio oemo, kuatɨ auki napes, uiti Tupax, naki uiche aisamunenti nostoñeka iku napes. Axti Tupax kunauntañantai nakaxti, champɨ kiatax nakaxti champɨityo mapankax.

¹⁸Axti Tupax sane nixhankaxti, toxio uiti osɨborikibo oboi axɨmanio ñemanauntu nuraxti, nauki axoñɨ ukusɨrɨka yupu nanaiña axɨba nisamukuxti.

¹⁹Masarukityaiki, amonsapesio nuxia axɨna sukanañɨ aume: namanaiña taikiana amonsapesio nuraxti kiatax, tapɨ autɨborikiatai tapɨ tarukuityo napanityaka.

²⁰Tyopiki axti naki chichepɨ nityɨborixhti, chisamutentipɨ axɨna uxia sukarɨti Tupax.

²¹Sane naukiche, tapɨ abasikia apisamune nomɨnantɨ, tyopiki tɨtarukapae nomɨnantɨ iku axɨna kɨx. Apasusiu axɨmanio omixhia manityakax sɨro au nabausasɨ. Tyopiki axɨmanu manityakax ane nɨriakax nauki aixhimiaka nomɨnantɨ aboi.

²²Champɨ nanenekiche axtɨ amonsapetiatai axɨmanu nuraxti Tupax. Apisamuse nausɨboriki isiuki, tyopiki axtɨ chapisamutempɨ sane, aboiyapatoe autapeneka.

²³Axti naki onkoiti nuraxti Tupax, chisamutentipɨ nisɨborikixhti isiuki, tyonenti takanati naki ñoñɨnx asaratitɨ ɨmo nisuxti au nixhpekux:

²⁴asaratitɨ ɨmotiatoe, axtɨ tɨbasɨkɨbɨkoti tato, chakionotiyɨpɨ kausane naka nisuxti.

²⁵Tapɨ axaño axtɨ chɨtakɨrusupɨ napakionko ɨmo nuraxti Tupax taikianaintyo apisamune nausɨboriki isiuki, chiyaupɨ ñana naupukɨnunku au nanaiña axɨna apisamute. Tyopiki axɨna nuraxti Tupax ta besɨro uixhtyo ane maximiakatax ɨmo nomɨnantɨ aboi.

²⁶Axti naki au ñakionkoxti manaunuti ɨmoti Tupax, tapɨ nuraxti chomixhampɨ, tapenekoti uxhtiatoe champɨ nanenekiche ɨmoti axɨmanu ñanaunkuxti ɨmoti Tupax.

²⁷Axɨna ñemanauntu makokonaunkux ɨmoti Tupax axti naki Uyaɨ tyone axɨna sane: basaratɨ tyakuma axɨbama tɨkoiñoma yaɨtoxɨma axtɨ takisɨrɨma axɨbaityo biuraka, au niyutakisɨrɨkɨx, tapɨ uisamute nomɨnantɨ ikuki axɨna kɨx.