Read Chiquitano SANTIAGO 2 Bible Online

SANTIAGO 2 - Chiquitano bible

SANTIAGO 2

¹Axaño masarukityaiki, axɨbama apikokokati yarusɨrɨx Yɨriabux Jesucristo, tapɨ taruku nikuasɨrɨkɨxti taman aume pɨnanakiti kiatax.

²Tyopiki axtɨ iñataiti abaxɨpeku tamanti naki taruku nenaxixhti, aɨbu koñoxtai naibixhti nisorotikiaxti oro, isiukai aiñanaitityo kiatax naki champɨ nenaxixhti xɨpɨsa naibixhti.

³Axtɨ axaño amasakatɨ nuxia ɨmoti maniki ane nenaxixhti amukanaño ɨmoti: “Atɨmo auna kauta nisuxatoe”, tapɨ ɨmoti maniki champɨ nenaxixhti amukanaño: “Atɨsai akamanu o atɨmo akamanu akɨatai”,

⁴axtɨ sane aboi, apisamute takana mayɨriabuka axɨbama asaramatɨ nuxia tyakuti taman pɨnanakiti kiatax.

⁵Masarukityaiki, amonsapesio axɨna sane: Axti Tupax samamekanama uiti axɨbama taruku nityakisɨrɨkɨxɨma ikuki axɨna kɨx, nauki nenaxixhimia tyone ñana axɨna ñakokonaunkuxɨma nauki asuriuma enaxiboma nanentakax au napes axɨna ɨriotɨ tɨkañe uiti ɨmoma axɨbama manaunuma ɨmoti.

⁶Tapɨ axaño, takisɨrɨma aboi. ¿Chityonempɨma axɨbama taruku nenaxixhimia axɨbama uiche autakisɨrɨka, axɨmaintyo ityononoma año akɨ niyɨkɨxɨma aupu esa mayɨriabuka?

⁷¿Unka tyonemaintyo axɨbama chuxiampɨ nuraxɨma kɨtɨpɨti Jesús naki Yɨriabux oemo?

⁸Axtɨ axaño apisamute axɨmanu yarusɨrɨx bakɨpukux toxio oemo uiti Tupax, sane uxia napachɨkoi. Sane Nantɨ iku Nikorox: “Akuasɨrɨti aemo naki asɨborisapa takana nakuasɨrɨkɨ aemoantoe.”

⁹Tapɨ axtɨ axaño aboma axɨbama kuasɨrɨma aume pɨnanaki makiataka, ane napipɨnate ɨmo bakɨpikux uiti Tupax.

¹⁰Tyopiki axtɨ axaño apisamute nanaiña axɨmanu bakɨpukux uiti Tupax, axtɨ ane taman chapisamutempɨ, ta takana axtɨ chapisamutempɨ nanaiña.

¹¹Tyopiki axtiatoe Tupax nanti: “Tapɨ chaiñanauntapɨ axtɨ apoka”, nantityo sane: “Tapɨ atabaikia.” Sane naukiche axtɨ aiñanaunta axɨna apoka, auki atabaikia, chauki taityompɨkata axɨmanu bakɨpukux uiti Tupax.

¹²Au axɨmanu tyakɨrux nanenes ñana, axti Tupax astaiti nosɨboriki isiuki axɨmanu bakɨpukux uiche utaesɨbuka eanaki nomɨnantɨ. Sane naukiche, basaraira nuxia axɨna uisamute takanaintyo axɨna numanityaka.

¹³Tyopiki axti Tupax chɨpukɨrusutipɨ ñana tyakuma axɨbama chipukɨrusupɨma tyaku makiataka. Tapɨ axɨbama pukɨrusuma tyakuma makiataka, axtityo Tupax pukɨrusuti tyakuma ñana.

¹⁴Masarukityaiki, ¿isane nanenekiche oemo axtɨ usukana oñɨ uikokokati Tupax, axtɨ champɨ uxia uisamute axɨna uiche atusi? Axtɨ sane champɨ maximiakatax aume.

¹⁵Axtɨ anati naki champɨ naibixhti champɨityo utuburiboti.

¹⁶Champɨ nanenekiche ɨmoti axtɨ ukanɨ ɨmoti: “Taikiana uxia naɨkɨ tanu, aiña akɨtɨpɨkɨ naibi a'aityo chepe nabe”, axtɨ chɨtoxiopɨ obi aibiboti takanaintyo utuburiboti.

¹⁷Saneityo aɨbu axɨna numakokonaunku ɨmoti Tupax, champɨ nanenekiche oemo uikokoroti Tupax axtɨ champɨ uisamute axɨna uiche atusi. Axɨmanu makokonaunkux champɨ nanenekiche.

¹⁸Axtɨ anati naki nanti: “Axɨkɨ aikokokati Tupax, tapɨ axɨñɨ isamute axɨna uxia. Aityusianka sukarɨñɨ axɨmanu nakokonaunku ɨmoti Tupax ui axɨna champɨ uxia aisamute. Tapɨ axɨñɨ, ityusiankana asukarɨkɨ axɨna nixhakokonaunku ɨmoti Tupax oboi axɨba omixhia isamukio.”

¹⁹Axɨkɨ aikokota ta anati kunauntañati Tupax, uxia axɨna sane aisamute. Axɨbama machoboreka ikokotama, paichokokononomaintyo ui nixhukuxɨma.

²⁰Tapɨ chapanaunkapɨ, atusinau aemo axtɨ axɨna numakokonaunku ɨmoti Tupax chichepepɨ niyɨkɨx chepe axɨna aisamute champɨ nanenekiche.

²¹Axti Tupax uxia au nastaxti nisɨborikixhti Abraham naki uyaɨ tɨkañe, ui axɨna isamutenti naukiche iñanati aɨtoxti Isaac iku altar nauki aityabairoti ɨmo ñakumanataxti. Axti Abraham uxia nisɨborikixhti au nastaxti Tupax.

²²Sane astai nisɨborikixhti Abraham axɨmanu ñakokonaunkuxti tusiu oboi axɨba isamutenti, oboi axɨba isamutenti besɨro axɨmanu ñakokonaunkuxti.

²³Sane uxiante axɨmanu nantɨ iku Nikorox: “Axti Abraham ikokoroti Tupax, sane naukiche uxia nisɨborikixhti au nastaxti.”

²⁴Axaño tɨtusiu aume, axti Tupax yasuriuruti oñɨ yotopiki axɨba uxia uisamute, chityopikipɨ axɨnantai uikokokati.

²⁵Saneityo aɨbu Rahab, axɨmanu tyasux. Axti Tupax uxia nisɨborikixh au nastaxti yotopiki axɨmanu uxia isamute, tyopiki barɨkɨroma uixh au nipox axɨmanuma yebomatɨ asuputanema axɨmanio poka, auki sɨromatɨ tato uixh isiuki kiatax kutubiux.

²⁶Sane takana kɨtɨpɨx axɨna champɨ nausɨpɨx chauki tɨkoiño, saneityo axɨna makokonaunkux ɨmoti Tupax tɨkoiño axtɨ champɨ chepe axɨba omixhia uisamute.