Read Chiquitano SANTIAGO 3 Bible Online

SANTIAGO 3 - Chiquitano bible

SANTIAGO 3

¹Masarukityaiki, tapɨ namanañantai uxianka manuneka. Tyopiki axti Tupax asaratitɨ nuxia ñana oemo pɨnanaki makiataka.

²Namanaiña axoñɨ sɨrɨmana nuipɨnate, axtɨ anati naki champɨ nipɨnatenti auki nuraxti, axti maniki ñoñɨnx besɨro nisɨborikixhti, ipiakatityo asaratitɨ tyakutiatoe.

³Axtɨ uityomoenta naru nubabu numukianx nauki aikoko nubakɨpuku, sane uiñenta nanaiña nikɨtɨpɨx.

⁴Amasasatɨtyo ñome canoa: posɨrɨmanaka tapɨ makiɨtɨx axɨna uiche aipene basukurɨro aɨbu kuchasɨx, maniki mapesɨnakana aɨbu axtɨ ikɨonokotati axɨmanu uiche aepoko sɨrotɨ uiti kauta nixhankaxti.

⁵Saneityo aɨbu nuñutu. Tyone axɨna simiamantai nenaxi nokɨtɨpɨ, yeboka aisamunio axɨba posɨrɨmanaka. ¡Tyone takana chimiantai pes ta yeboka aiñonoko narubaityu nɨunx!

⁶Axɨna utux pes nakax. Tyone yeboka aisamune yarusɨrɨx nomɨnantɨ. Auki nakax mameso nanaiña nosɨboriki, sane uɨkatityo uixh eana pes au infierno.

⁷Axti noñɨnx yebokati amunenti aruki nanaiña numukianka, nutaumanka, noixhoboka takanaintyo numukianka auki narubaityu tux.

⁸Ta champɨti ñoñɨnx naki ichɨbɨ ɨmoti nutuxtiatoe. Axɨna utux tyone takana numukianx axɨna chichɨbɨpɨ mamune, kɨtɨpɨ ane nomɨnantɨ axɨna taruku nipenes.

⁹Ui nuñutu omixhia nusura kɨtɨpɨti Tupax naki Uyaɨ, takanaintyo mapauxamaka ɨmo mañoñɨnka axɨbama aɨtoxti Tupax takana nakaxti.

¹⁰Auki nusaruatoe omixhia numanityaka ɨmoti Tupax takanaintyo mapauxamakax. Masarukityaiki, tapɨ sane osoi.

¹¹Auki taman nantaityux chɨkuapɨtɨ tux usɨña auki kuatityo axɨna pichananene.

¹²Sane takana taman nutanumux chɨtaupɨ nutachenka saneityo nutachanka chobɨtaupɨ nutanumuka, saneityo masarukityaiki, chɨbachebo tux usɨña taman nantaityux axɨna bachebo tux sɨro.

¹³Axtɨ anati abaxɨpeku naki taruku nipiakaxti, tari aityusiankati oboi axɨba omixhia isamutenti, takanati naki taruku nityakisɨrɨkɨxti ui axɨmanu nipiakaxti.

¹⁴Axtɨ axaño ui nauxianka ɨmo nenaxixhti kiatax autɨborikiatai aumeampatoe, auki apisamute nanaiña ui nautɨbori aumeampatoe, auki champɨ tyopokiche aupukɨnunka sane tompɨkana aboi axɨna ñemanauntu.

¹⁵Tyopiki axɨmanu mapanaunkux chɨkuapɨtɨ esakiti Tupax, ta mapanaunkux ikuki axɨna kɨx, ñapanaunku mañoñɨnka ñapanaunkuxtityo chobores.

¹⁶Kauta ane chɨrɨri tyaku nenaxi makiataka, akamanu champɨti ane nɨriakaxti abe aruki nanaiñantai axɨba chomixhampɨ.

¹⁷Tapɨ axɨbama ane uimia ñapanaunkuxti Tupax, chisamutempɨma axɨna chuxiampɨ ta yapachetioma uxia uimia ɨmomantoe, makokonaunxɨma, taruku ñakumananaunkuxɨma aɨbu makiataka. Taruku nipukɨruxɨma tyaku axɨbama takisɨrɨma, taikiana besɨro nisɨborikixhimia isamutema axɨna uia.

¹⁸Axɨbama bapacheroma nikiubuma uxia nisɨboriki namanaiña aɨbumantoe, toxio ñana ɨmoma uiti Tupax maximiakatax.