Read Chiquitano SANTIAGO 4 Bible Online

SANTIAGO 4 - Chiquitano bible

SANTIAGO 4

¹¿Tusiu aume tyopikiche abe chɨtamampatai chɨrɨri aboi aumeampatoe? Ta oboi axɨba chomixhampatai nauxiantɨmo aukɨtɨpɨ.

²Taruku nauxianka ɨmo axɨna champɨ aboi auxianka nanaiñantai ane aboi, axtɨ chiyebopɨ aboi, sane naukiche apaikia, apatabaikia apapacheka nikiubu año nauki ane yarusɨrɨx chɨrɨri. Chiyebopɨ aboi axɨna nauxiantɨmo tyopiki chapankikiapɨ pɨnanakiti Tupax.

³Axtɨ apankikia pɨnanakiti, chɨtoxiopɨ aume tyopiki chuxiampɨ axɨna nɨmoche napankiki, tyopiki axɨna napankiki ta ɨmo axɨna chuxiampɨ nixhantɨmo naukɨtɨpɨ.

⁴Axaño chɨkuasɨrɨtipɨ Tupax aume champɨityo axtɨ apakokonaunka ɨmoti. Unka tusiu aume axti naki nityurapataxti axɨna kɨx tyonenti naki tɨborikotiatai ɨmoti Tupax. ¡Ñemanauntu ta sane! Axtɨ axaño uxia aume axɨba nomɨnantɨ ikuki axɨna kɨx, sane naukiche autɨborikiatai kuatati Tupax.

⁵Sane naukiche nantɨ iku Nikorox: “Axti Tupax taruku nikuasɨrɨkɨ nuyausɨpɨ ɨmoti axɨmanu sɨro uiti okɨtɨpɨ.”

⁶Ñemanaunkuxatoe, axti Tupax taruku nukuasɨrɨkɨ ɨmoti. Sane takana nantɨ iku Nikorox: “Axti Tupax chuxiampɨ ɨmoti axɨbama au ñakionkoxɨma champɨti kiatax pɨrɨkɨma, tapɨ axɨbama takisɨrɨma pukɨrusuti tyakuma.”

⁷Sane naukiche apakokonau ɨmoti Tupax. Apiña nuxia tapɨ autapeneka uiti chobores sane besɨburuti amopɨnanaki.

⁸Amekosi esati Tupax, axtityo kuatati aukɨmenu. ¡Axɨbama chuxiampɨ nausɨboriki, tapɨ abasikia apisamune axɨba nomɨnantɨ, axaño axɨbama auxianka akuasɨrɨti Tupax aume takanaintyo axɨna kɨx!

⁹¡Apiña nuxia nausucheki abareo tyopiki oxonene aume! ¡Tari axɨmanu napiyapoi tyone nareokox, tapɨ naupukɨnunku tyone suchekixh!

¹⁰Apiñoxonkosaño sukarɨti Tupax, sane ane toxiobo uiti aume.

¹¹Masarukityaiki, tapɨ apanityaka axɨna chuxiampɨ kɨtɨpɨ makiataka. Axti naki manityanati axɨna chuxiampɨ kɨtɨpɨti kiatax, chuxiampɨ nuraxti ɨmo axɨmanu bakɨpukux uiti Tupax, tapɨ chuxiampɨ napanityaka ɨmo.

¹²Kunauntañantiatai naki uiche aityoximiati axɨmanu bakɨpukux, tyonentityo naki uiche asaraiti ɨmo namanaiña, tapɨ axɨkɨ, ¿kausane asikia kuata nipɨnatenti naki asɨborisapa?

¹³Amonsapesio nuxia axɨna sane, axaño axɨbama amukanaño: “Kaɨma o tyubaka uɨkatɨ kauta sɨrɨmana poka, akamanu sɨsio oñɨ ɨmo taman nasɨkɨbeka, numasamuku aruki nanaiñantai numapabentekaka nauki aye osoi chama monixh.”

¹⁴¿Kausane apanitya sane, abo chɨtusiupɨ aume kausane axɨna nausɨboriki tyubaka? Axɨna nausɨboriki takana mutusaɨx axtɨ kuatɨ auki ensoro tatityo.

¹⁵Ta uxia axtɨ amukanaño sane: “Axtɨ xhanxti Tupax, osɨborikia nauki uisamune axɨna sane o axɨna kiatax.”

¹⁶Tapɨ axaño, axtɨ apanityaka au napakionko champɨti kiatax ipiakati amopɨnanaki. Axti naki sane nisɨborikixhti tyone axɨna chuxiampɨ.

¹⁷Axti naki tusiu ɨmoti aisamunenti axɨna uxia ta chisamutentipɨ, ane nipɨnatenti.