Read Chiquitano SANTIAGO 5 Bible Online

SANTIAGO 5 - Chiquitano bible

SANTIAGO 5

¹¡Amonsapesio axɨna sane, axaño axɨbama taruku namenaxi! ¡Abareo autosibi ui noxoko nanaiña axɨba oboiche autakisɨrɨka au kuantionki naneneka!

²Namenaxi chauki tɨboporeo. Naumoni chepe nabaibi takɨrusu ñana oboi nixhixh.

³Axɨmanu naumoni kiamana aboi au axɨba naneneka kiemo ñana, uixh ñana autusikia autakɨruka uixh ñana takana ui pes.

⁴Axɨmanu bapakatax chɨtoxiopɨ aboi ityobo yachɨkoimia axɨmanuma mañoñɨnka bapakɨtauruma napakiyo, axti yarusɨrɨx Yɨriabux auki napes onkoiti nanaiña axɨna chuxiampɨ apisamute aɨbuma. Axɨmanu monixh chapityoximiatapɨ ɨmoma uixhtyo uraboi nausɨboriki sukarɨti Tupax.

⁵Axaño iku axɨna kɨx tapasutiu namenaxi takanaintyo naupukɨnunku, axaño abaka takana axobe numukianka upaɨro, tɨsaimia ñana axɨmanu nanenes tyakɨrux aume.

⁶Axaño takisɨrɨma aboi koiñomaintyo axɨbama champɨ nipɨnatema, axɨbama champɨ uiche okɨmama tyakumantoe.

⁷Tapɨ axaño masarukityaiki, tapɨ ubata aume chepe axtɨ tɨkuatati tato Cristo. Apisamuse takanati naki mankɨturuti chontarabekotipɨ iyo tyanaunx nauki aye ɨmoti niyakiyoxti.

⁸Saneityo axaño tapɨ ubata aume apiña nuxia, tyopiki konto ñana kuatati tato Yɨriabux Jesús.

⁹Masarukityaiki, tapɨ aburakaño aboiyapatoe, nauki tapɨ ane manityomokotox aume uiti Tupax, tyopiki axti naki uiche asaraiti ñana nosɨboriki, tɨtanati abeu tyurux.

¹⁰Masarukityaiki, apisamuse isiuki nityakisɨrɨkɨxɨma axɨbama urapoimia tɨkañe nuraxti Tupax.

¹¹Axɨsomɨ sumastai taruku nipukɨnunkuxɨma axɨbama takisɨrɨma aɨbu narukux ɨmoma. Axaño apakionkaño ɨmoti Job tɨkañe, iñatati nuxia narukux ɨmoti naukiche takisɨrɨti, tusiuityo aume kausane yachɨkoiti Tupax au nityakɨrux aɨbuti, tyopiki axti Tupax taruku nipukɨruxti.

¹²Pɨrɨkɨ nanaiña masarukityaiki, tapɨ apanityaka au nɨrixhti Tupax, au nɨri axɨna kɨx, au nobɨri pikiataka nisamukuxti Tupax. Axtɨ apanityaka amukanaño: “Sane”, axtɨ ñemanauntu. Tapɨ axtɨ chiñemanauntupɨ amukanaño: “chɨsanempɨ”, tapɨ manityomokonoti Tupax aume.

¹³Axtɨ anati naki abaxɨpeku sucheboti, tari eanti ɨmoti Tupax. Axtɨ pukɨnuñati, tari ñasoninati ɨmoti Tupax.

¹⁴Axtɨ anati naki maunxokonoti abaxɨpekuki, tari aemeti iyo axɨbama mayɨriabuka oemo nauki eama tyakuti, axɨma kaɨma au nɨrixhti Yɨriabux Jesús semanati uimia ui aceite.

¹⁵Axtɨ meaboma aɨbu ñakokonaunkuxɨma ɨmoti Tupax auki neankaxɨma, axti maniki maunxokono uxiankati tato, axtɨ ane nipɨnatenti, xhimiakanaintyo tato nomɨnantɨ uiti.

¹⁶Sane naukiche, aburasaño sukarɨti kiatax axɨba nomɨnantɨ aboi, amea autakuapatoe nauki uxia tato aume. Axɨna ñemanauntu neankaxti naki uxia nisɨborikixhti ane nɨriakax.

¹⁷Axti Elías, naki urapoiti tɨkane noñemaxti Tupax, takana axɨna nusakatai, naukiche onkotitɨ nuxia ɨmoti auki neankaxti tapɨ robeoka, chɨxobeokapɨ ñome trex naskɨbeka seixh panka pɨrɨkɨ.

¹⁸Naukiche tɨmeaboti tatityo, xobeoka auki kaɨma iyebo axɨna sɨro kɨtu.

¹⁹Masarukityaiki, axtɨ anati naki iñokotati ñakokonaunkuxti ɨmo axɨna ñemanauntu iyebo uiti, auki anati kiatax naki uiche makokonaunxti tatityo,

²⁰ixhanka atusi aume axtɨ anati naki uiche kuatati tato esati Tupax naki ane nomɨnantɨ uiti, añekanati auki nakaxti pɨnanaki nikonkoxti sane ane maximiakatax ɨmoti uiti Tupax.