Read Chiquitano 1 SAN PEDRO 4 Bible Online

1 SAN PEDRO 4 - Chiquitano bible

1 SAN PEDRO 4

¹Sane, takanati Cristo takisɨrɨti au nikɨtɨpɨxti, apisamusentyo sane isiukiti. Axti naki takisɨrɨti au nikɨtɨpɨxti onkono uiti axɨna nomɨnantɨ,

²nauki aisamunenti nisɨborikixhti isiuki noñemaxti Tupax tapɨ isamutenti isiuki axɨna nixhantɨmo nikɨtɨpɨxti.

³Tɨkoboiyapae tɨkañe apisamute axɨna nausɨboriki takana axɨbama chikokoropɨmati Tupax, chuxiampɨ tɨkañe nausɨboriki, chomixhampɨ nauxiantɨmo, chaiyatai naupukɨnunku naborisɨba, taruku nauchaka apanaunka ɨmo matupaka nisamuku mañoñɨnka.

⁴Tapɨ kaɨma, axɨna chapisamutenkipɨ chepema axɨna chuxiampɨ nisɨborikixhimia, axɨma kiatax ñakionkoxɨma sane naukiche chuxiampɨ nuraxɨma aume.

⁵Axɨma ñana ane tyopikiche asaraiti ɨmoma axti naki ipiakati asaraiti nipɨnatema axɨbama sɨborikomainki takanaintyo axɨbama tɨkoiñoma.

⁶Axɨbama tɨkoiñoma isuputaramatityo Cristo, nauki asɨborimia au nausɨpɨxɨma ui noñemaxti Tupax, sane axtɨ mañoñɨnka tɨtane manityomokotox uimia ɨmoma.

⁷Tɨsaimia nityakɨrux nanaiña axɨna sane. Sane naukiche besɨro nausɨboriki apiña nuxia nameanka.

⁸Tari taruku naukuasɨrɨkɨ aumeampatoe, tyopiki axɨna makumananaunkux ane maximiakatax uixh ñome axɨba nomɨnantɨ.

⁹Apasusiusaño aumeampatoe au naupo, tapɨ chuxiampatai nabura kɨtɨpɨ makiataka.

¹⁰Taikianati taman isiuki axɨna enaunku atoxi ɨmoti uiti Tupax, amasasatɨ tyaku makiataka ui axɨna toxio aume.

¹¹Axtɨ anati naki manityanati, tari anityati takana nuraxti Tupax. Axtɨ anati naki ane yachɨkoiti ɨmoti kiatax, tari aisamunenti aɨbu nanaiña nikusɨuxti axɨna toxio ɨmoti uiti Tupax. Nanaiña axɨna apisamute, apisamuse nauki achampienkama ɨmoti Tupax tyopikiti Jesucristo, naki esache axɨmanu yarusɨrɨx nɨriakax axɨna champɨ nityakɨrux ñana. Amén.

¹²Masarukityaiki, tapɨ aukɨtobɨka axtɨ ane makokotox aume, takana axtɨ champɨ tamastai.

¹³Axtɨ sane, tari taruku naupukɨnunku, tyopiki autakisɨrɨka chepeti Cristo, nauki aupukɨnunkaityo axtɨ tɨkuatati tato aɨbu yarusɨrɨx nɨriakaxti.

¹⁴Tari taruku naupukɨnunku, axtɨ anati naki unuti año tyopikiti Cristo, tyopiki nesaxti Espíritu Tupax taikiana ane auchepe.

¹⁵Axtɨ abaxɨpekuki anati naki takisɨrɨti, tapɨ tyaku yatabaikixhti, nikusɨpɨkɨxti, o tyopiki yasutiuti kiatax chɨrɨri.

¹⁶Axtɨ takisɨrɨti tyopiki ikokoroti Jesús, tapɨ kɨsoboti tari ñachampienkanati ɨmoti Tupax tyopiki axɨmanu.

¹⁷Chauki tiñatai axɨmanu tyakɨrux nanenes auche asaraiti kusɨrɨbo ɨmoma axɨbama ikokoromati Tupax. Axtɨ sane kusɨrɨbo asaraiti nuipɨnate, ¿kausanempɨ ñana nityakisɨrɨkɨxɨma axɨbama chikokotapɨma axɨna uxia manityakax?

¹⁸Axtɨ axti naki uxia nisɨborikixhti chɨtoxinaumpɨ ɨmoti maximiakatax, ¿kausanempɨ ñana aɨbuma axɨbama chuxiampɨ nisɨborikixhimia?

¹⁹Sane naukiche axɨbama takisɨrɨma tyopiki sane nixhankaxti Tupax, tari aiñama nausɨpɨxɨma mekuti Tupax naki isamukuche, tyopiki isamutenti nanaiña axɨna ɨriotɨ uiti.