Read Chiquitano 1 SAN PEDRO 5 Bible Online

1 SAN PEDRO 5 - Chiquitano bible

1 SAN PEDRO 5

¹Ixhanka xhanuneka ɨmo mayɨriabuka axɨbama ikokoromati Jesús, axɨbama aboma abaxɨpeku, axɨñɨntyo yɨriabuxɨñɨ takana axɨma, sukarɨñɨ tɨkañe axɨmanu nityakisɨrɨkɨxti Cristo. Axtɨ tɨkuatati tato ñana Cristo axtɨ tɨtusiankana uiti ñana axɨmanu champɨ takanache nɨriakaxti iyeboityo ñana sobi axɨmanu nɨriakaxti. Axɨna nixhanunekaka tyone axɨna sane.

²Amasasatɨ yutaku nobixhaka axɨmanio botoxio amemeku uiti Tupax. Amasasatɨ yutaku aɨbu narukux aume takana nixhankaxti Tupax, tapɨ apisamute tyopiki ane bakɨpukux aume, tapɨ apisamutentyo ityobo monixh, ta tyopiki auxianka apaserebi tyakuma.

³Tapɨ apisamute aɨbuma axɨbama toxioma aume uiti Tupax takana axtɨ kumanakaxɨma aume, apapache nikiubu año nauki aisamunema nisɨborikixhimia isiuki nausɨboriki.

⁴Sane axtɨ kuatati tato Cristo ñana, tyonenti naki yɨriabux ɨmoma axɨbama asaramatɨ autaku, toxio ñana aume yarusɨrɨx makumanatax axɨna champɨ nityakɨrux.

⁵Saneityo axaño mayaɨka, apakokonau ɨmo nɨriakaxɨma axɨbama mayɨriabuka aume. Namanaiña apakokonau aumeampatoe aɨbu naupukɨnunku. Tyopiki nantɨ sane iku Nikorox: “Chuxiampɨ ɨmoti Tupax axɨbama au ñakionkoxɨma champɨti kiatax ipiakati pɨrɨkɨma, ta asaratitɨ aɨbu nipukɨruxti tyakuma axɨbama takisɨrɨma.”

⁶Sane naukiche, tapɨ sɨrɨmanax año au napakionko apikoko nɨriakaxti Tupax, tyopiki taruku nɨriakaxti. Axtɨ iñatai axɨmanu nanenes ñana, axti Tupax asaratitɨ aume takana axɨbama taruku nɨriakaxɨma.

⁷Apiñasio nanaiña axɨba nauxiantɨmo mekuti Tupax, tyopiki asaratitɨ autaku.

⁸Amasasatɨ nuxia kɨmenu axɨna kuabotɨ aume, tyopiki axti naki chuxiampɨ uiti aume axti chobores anati takana nuitɨmɨx kɨrɨpɨo bapachero utuburibo.

⁹Apiñasaño kɨmenuti au nɨrixhti Tupax, tyopiki tɨtusiu aume aunanaiña iku axɨna kɨx axɨbama abarukityaiki takisɨrɨma takana axaño.

¹⁰Axtɨ tautakisɨrɨka ñome mantukubatai naneneka, uiti Tupax ane maximiakatax aume, apiña nuxia narukux aume. Tyonenti Tupax ui yarusɨrɨx ñakumananaunkuxti ityasuruti oñɨ basuriu axɨmanu champɨ nityakɨru nanentakax esati chepeti Jesucristo.

¹¹Tari axti Tupax Yɨriabuxti ɨmo nanaiña naskɨbeka. Amén.

¹²Axti Silvano, tyonenti makonomonoti chepeñɨ axɨna nixhakonomoso aume. Tusiu iñemo ta ikokoroti Cristo. Xhakonomoka nauki xhanuneka aume suraboityo ausukarɨ ta nanaiña axɨba omixhia botoxio aume uiti Tupax uixh atusi ta taruku naukuasɨrɨkɨ ɨmoti. Apikoko ta aukuasɨrɨka ɨmoti Tupax.

¹³Axɨbama ikokoromati Jesús au Babilonia ñakiokoxɨma tanu aume. Axɨma takana axaño tyonemaintyo axɨbama samamekanama uiti Tupax. Ñakionkoxtiyo aume axti isaɨ Marcos.

¹⁴Apanki nuxia aumeampatoe aɨbu napatañumeki tyopiki aubaruki año. Taikiana uxia aboi aumeampatoe, axɨbama apikokokati Cristo.