Read Chiquitano 2 SAN PEDRO 1 Bible Online

2 SAN PEDRO 1 - Chiquitano bible

2 SAN PEDRO 1

¹Axɨñɨ Simón Peru yaserebikia ɨmoti Jesucristo anankañɨntyo isiuti, nixhakionko tanu ɨmoma axɨbama ikokoromati Jesús takana axɨsomɨ, tyopiki axti naki Tupax oemo chepeti Jesucristo uxia ñapanaunkuxti.

²Apasusiu yarusɨrɨx nipukɨruxti Tupax, tari uitityo taikiana uxia aboi aumeampatoe tyopiki tausuputakati Tupax axtityo Jesús naki Yɨriabux oemo.

³Axti Tupax ui nɨriakaxti toxio oemo nanaiña axɨna nuxiantɨmo, nauki uisamune nosɨboriki isiu nixhankaxti. Uiti Tupax atoxi oemo nanaiña axɨmanu sane naukiche iyusianakanatiyɨ Jesucristo usukarɨ. Auki nakaxti samamekana oñɨ nauki aye osoi au axɨmanu champɨ takanache nanentakax esati.

⁴Oboi axɨba sane botoxio uiti Tupax oemo axɨmanio ɨriotɨ uiti, axɨba taruku niyubarusɨrɨkɨx tarukuityo niyukuax, nauki yotopiki aye aboi apasuriu nausɨboriki takana nisɨborikixhti Tupax nauki amañekaka ñomɨnana axɨba nomɨnantɨ ikuki axɨna kɨx.

⁵Sane naukiche apapache nikiubu año nauki ñemanauntu axɨna napakokonaunku ɨmoti Tupax, apiña nuxia nauki besɨro nausɨboriki, apapache nikiubu año ausuputarati nuxia Tupax,

⁶tapɨ chebo oboi ɨmo naukɨtɨpɨ apisamune isiu nixhankax. Tapɨ autɨborikiatai aɨbu makiataka, apityoximia nausɨboriki ɨmoti Tupax,

⁷tari akuasɨrɨma aume axɨbama aubarukityaiki au nɨrixhti Cristo, yopɨrɨkɨ nanaiña tari chepe nikuasɨrɨkɨxɨma aume namanaiña.

⁸Axtɨ axaño ausuputakati Jesucristo, apisamute nanaiña axɨba sane taikiana apapache nikiubu año kausane apisamune uxia nuxia. Sane apisamute axɨna uxia au nausɨboriki.

⁹Tapɨti naki chisamutentipɨ sane, tyonenti takanati naki supusuti, takɨrusu ñakionkoxti ta uiti Tupax aixhimiakati axɨba nomɨnantɨ uiti.

¹⁰Sane naukiche masarukityaiki, axti Tupax samamekana año uiti amenotɨ axɨpekuma axɨbama aɨtoxti, apiña nuxia nauki sɨsio aukɨtɨpɨ axɨna sane, axtɨ apisamute sane, chautapenekapɨ ñana aɨbu napakokonaunku.

¹¹Ui axɨna sane aurɨbo aume tyurux nauki amenotɨ esati Yɨriabux Jesucristo ñome nanaiña naskɨbeka axti naki uiche ane maximiakatax oemo.

¹²Sane naukiche taikiana sukanañɨ aume nanaiña axɨna sane, champɨ nɨmoche axtɨ tɨtusiu aume apiñataityo nuxia apikoko axɨmanu ñemanauntu manunekatax aume.

¹³Axɨna isɨborikiaiki, tyone yachɨkoboibo taikiana sukanañɨ aume nanaiña axɨna sane.

¹⁴Axti naki Yɨriabux oemo Jesucristo urapoiti sukarɨñɨ ta tɨsaimia ñana atakɨru nisɨboriki.

¹⁵Tapɨ axɨñɨ yapacheka nikiubuñɨ kausane nauki apakionaño nanaiña axɨba nixhanunekaka aume ñana axtɨ tisonka.

¹⁶Axɨmanu supanunekaka aume kɨtɨpɨ nɨriakaxti Yɨriabux Jesucristo axɨmanuintyo niyekixhti tato, chɨsupapachekataipɨ suburapoboibo, tyopiki axɨsomɨ sumastai niyarusɨrɨkɨ nɨriakaxti naki Yɨriabux oemo.

¹⁷Sumasakati naukiche axti Tupax naki Uyaɨ yarusɨrɨx nɨrixhti uiti, naukiche somonkoi axɨmanu yarusɨrɨx nuraxti Tupax ɨmoti: “Tyonenti Isaɨ axti naki taruku nikuasɨrɨkɨxti iñemo, naki samamekanati sobi.”

¹⁸Axɨsomɨ somonkoi axɨmanu nikɨpura nuraxti auki napes, tyopiki amonkosomɨ chepeti Yɨriabux Jesús onɨ axɨmanu yirityux nesaxti Tupax.

¹⁹Sane naukiche axɨñɨ sukanañɨ ta ñemanauntu axɨmanu nuraxti Tupax urapoimia tɨkañe axɨbama profetas. Apasamu nuxia amonsapesio axɨmanio omixhia manityakax, tyopiki uixh atusi aume kausane apisamune nausɨboriki chepe axtɨ tɨkuatati tato Cristo aisamunenti kiatax nausɨboriki.

²⁰Yopɨrɨkɨ nanaiña tari atusi aume axɨna sane: champɨ ane Nikorox ui noñemaxti Tupax nauki manuneka uixh isiuki nuxianka.

²¹Tyopiki axɨbama profetas tɨkañe, chɨmanityanapɨma auki noñemaxɨmantoe. Namanaiña manityanama ui noñemaxti Tupax, tyopiki anankati Espíritu Santo aɨbuma.